އޭއައި އާއި ޑީޕްފޭކް ބޭނުންކޮށްގެން އެމެރިކާގައި ހިންގާ މަކަރާއި ހީލަތުގެ މުއާމަލާތްތަކުގެ ސަބަބުން 68 ބިލިއަން ޑޮލަރުގެ ގެއްލުން ލިބިއްޖެ - ސާވޭ
1 ޖުލައި 2026 | ބުދަ 08:47އޭއައި އާއި ޑީޕްފޭކް ޓެކްނޮލޮޖީ ބޭނުންކޮށްގެން އެމެރިކާގައި ހިންގާ އޮޅުވާލުންތަކުގެ ސަބަބުން އާންމުންނަށް މާލީ ގޮތުންނާއި ނަފްސާނީ ގޮތުން ބޮޑެތި ގެއްލުންތަކެއް ލިބެމުންދާކަން ގެލަޕްގެ އާ ދިރާސާއަކުން ވަނީ ހާމަވެފައި. މިފަދަ މަކަރާއި ހީލަތުގެ މުއާމަލާތްތަކުގައި ބޭންކު މުވައްޒަފުންނާއި ސަރުކާރުގެ އޮފިޝަލުންގެ ސިފަ ޖައްސައިގެން މީހުންގެ އިތުބާރު ހޯދާއިރު، މީގެ ސަބަބުން ލިބޭ ގެއްލުންތަކުގެ އަސަރު ދަށް އާމްދަނީ ލިބޭ އާއިލާތަކަށް މާ ބޮޑަށް ކުރޭ.
ވޮޝިންގޓަން ޑީސީގައި 18 ޖުލައި 2023 ގައި ތައްޔާރުކޮށްފައިވާ މި ފޮޓޯ އިލަސްޓްރޭޝަނުން ފެންނަނީ، އާޓިފިޝަލް އިންޓެލިޖެންސް (އޭއައި) ބޭނުންކޮށްގެން އަންހެން ކުދިންގެ ފޮޓޯ އުފެއްދުމަށް ކޮށްފައިވާ އިޝްތިހާރެއް. | ގެޓީ އިމޭޖަސް
އާޓިފިޝަލް އިންޓެލިޖެންސް (އޭއައި) އާއި ޑީޕްފޭކް ޓެކްނޮލޮޖީ ބޭނުންކޮށްގެން އެމެރިކާގައި ހިންގާ މަކަރާއި ހީލަތުގެ މުއާމަލާތްތަކުގެ ސަބަބުން 68 ބިލިއަން ޑޮލަރުގެ ގެއްލުން ލިބިފައިވާކަމަށް އާ ދިރާސާއަކުން ދައްކައިފި އެވެ.
މި ދިރާސާގައިވާ ގޮތުން 2025 ވަނަ އަހަރު އެމެރިކާގެ ގާތްގަނޑަކަށް 15 މިލިއަން މީހުންގެ އަތުން މަކަރާއި ހީލަތުން ފައިސާ އަތުލާފައިވާއިރު، މީގެ ތެރެއިން ފާހަގަކޮށްލެވޭ ބޮޑު ބައެއްގައި ބޭނުންކޮށްފައިވަނީ އޭއައި މެދުވެރިކޮށް އުފައްދާފައިވާ ކޮންޓެންޓާއި ޑީޕްފޭކް ވީޑިއޯތަކެވެ. މިދިޔަ އަހަރު މުޅި އެމެރިކާގައި ޖުމްލަ 68 ބިލިއަން ޑޮލަރުގެ ގެއްލުން ލިބިފައިވާއިރު، މިއީ ކޮންމެ ދުވަހަކު އެވްރެޖްކޮށް 186 މިލިއަން ޑޮލަރު މިކަމުގެ ތެރެއިން ހޯދާފައިވާ ކަމުގެ ހެކިދޭ އަދަދެކެވެ.
"ޔުނައިޓެޑް ސްޓޭޓްސް އޮފް ސްކޭމްސް: ދަ ފައިނޭންޝަލް އެންޑް އިމޯޝަނަލް ފޯލްއައުޓް" ގެ ނަމުގައި އަންގާރަ ދުވަހު އާންމުކުރި މި ރިޕޯޓަކީ ގެލަޕް އާއި ސްޓޮޕް ސްކޭމްސް އެލަޔަންސް ގުޅިގެން އެމެރިކާގެ 5،000 އަށްވުރެ ގިނަ ބޮޑެތި މީހުންގެ މެދުގައި ކުރިއަށްގެންދިޔަ ސާވޭއެއްގެ މައްޗަށް ބިނާކޮށް ތައްޔާރުކޮށްފައިވާ ރިޕޯޓެކެވެ.
މި ސާވޭގައި ބައިވެރިވި މީހުންގެ ތެރެއިން 6 އިންސައްތަ މީހުން ބުނެފައިވަނީ އެމީހުންނަށް މިފަދަ އޮޅުވާލުންތަކާ ކުރިމަތިވެފައިވާ ކަމަށެވެ. އަދި އިތުރު 4 އިންސައްތަ މީހުން ބުނި ގޮތުގައި އެމީހުންގެ ގޭބިސީގެ އެހެން މެންބަރަކަށް ވަނީ މިފަދަ ލަނޑެއް ލިބިފައި ކަމަށެވެ. ޖުމްލަ ގޮތެއްގައި ބަލާއިރު، އެމެރިކާގެ ބޮޑެތި މީހުންގެ ތެރެއިން 24 އިންސައްތަ މީހުންނަށް އެމީހުންގެ ހަޔާތުގެ ކޮންމެވެސް ހިސާބެއްގައި މިފަދަ މަކަރާއި ހީލަތުގެ މުއާމަލާތެއް ކުރިމަތިވެފައިވާއިރު، 10 އިންސައްތަ މީހުންނަކީ އެއް ފަހަރަށްވުރެ ގިނަ ފަހަރު މިފަދަ ކަންކަމުގެ ޝިކާރައަކަށް ވެފައިވާ މީހުންނެވެ.
މިފަދަ ދެރަތައް ލިބުނު ކޮންމެ 10 މީހަކުން އެކަކަށްވުރެ ގިނަ މީހުން (12 އިންސައްތަ) ބުނެފައިވަނީ އެމީހުންނަށް އޮޅުވާލާފައިވަނީ އޭއައި ނުވަތަ ޑީޕްފޭކް ބޭނުންކޮށްގެން ކަމަށެވެ. ނަމަވެސް، އޭއައި މެދުވެރިކޮށް އުފައްދާ ކޮންޓެންޓަކީ ދެނެގަންނަން އުނދަގޫ އެއްޗަކަށް ވާތީ، ހަގީގަތުގައި މި އަދަދު މިއަށްވުރެ މާ މަތިވުން އެކަށީގެންވާ ކަމަށް މި ރިޕޯޓް ތައްޔާރުކުރި ފަރާތްތަކުން ފާހަގަކުރެ އެވެ.
މަކަރާއި ހީލަތް ހިންގުމުގައި އެންމެ އާންމުކޮށް ބޭނުންކޮށްފައިވާ ގޮތްތަކުގެ ތެރޭގައި، މާލީ މައުލޫމާތު ވަގަށް ނެގުމަށް ހަދާފައިވާ ފޭކް ވެބްސައިޓްތައް (40 އިންސައްތަ)، އެޑްވާންސް ފީ ދައްކަންޖެހޭ ގޮތަށް ހިންގާ ރޭވުންތައް (24 އިންސައްތަ) އަދި އޮޅުވާލައިގެން އިންވެސްޓްމަންޓް ފުރުސަތުތައް ހުށަހެޅުން (19 އިންސައްތަ) ހިމެނެ އެވެ. މީހުންގެ އިތުބާރު ހޯދުމަށްޓަކައި ސްކޭމް ކުރާ ފަރާތްތަކުން އެންމެ ގިނައިން ހެދިގެން އުޅެނީ ޓެކް ސަޕޯޓް މުވައްޒަފުން (19 އިންސައްތަ)، ބޭންކް މުވައްޒަފުން (15 އިންސައްތަ) ނުވަތަ ސަރުކާރުގެ އޮފިޝަލުން (14 އިންސައްތަ) ކަމަށް ދައްކައިގެންނެވެ.
ފާއިތުވި އަހަރުތަކުގައި އޭއައި ބޭނުންކޮށްގެން ހިންގާ މަކަރާއި ހީލަތުގެ މުއާމަލާތްތައް ވަނީ އެކި ސިފަސިފައިގައި އިތުރުވެފަ އެވެ. މީގެ ތެރޭގައި އާއިލާގެ މެންބަރެއް ނުވަތަ ކުންފުންޏެއްގެ އިސްވެރިއެއްގެ އަޑު ކޮޕީކޮށްގެން (ވޮއިސް ކްލޯނިންގ) އެހީއަށް އެދި ގުޅުމާއި، އޭއައި ބޭނުންކޮށްގެން ފޭކް ސިފަތަކާއި ފޮޓޯ އުފައްދައިގެން ހިންގާ "ރޮމޭންސް ސްކޭމް" ތަކުގެ އިތުރުން، ކުންފުނިތަކަށް އޮޅުވާލުމަށް ވަގުތުން ވަގުތަށް ބޭނުންކުރާ ޑީޕްފޭކް ވީޑިއޯ ކޯލްތައް ހިމެނެ އެވެ.
މިފަދަ ޑީޕްފޭކް ވީޑިއޯ ބޭނުންކޮށްގެން ހިންގި އެންމެ ބޮޑު އެއް ޖަރީމާ ހިނގާފައިވަނީ 2024 ވަނަ އަހަރުގެ ޖެނުއަރީ މަހުއެވެ. އިނގިރޭސިވިލާތުގެ އިންޖިނިއަރިން ފާމެއް ކަމަށްވާ "އަރަޕް" ގެ ފައިނޭންސް މުވައްޒަފަކު ވަނީ 25 މިލިއަން ޑޮލަރަށްވުރެ ގިނަ ފައިސާ މަކަރުވެރިންނަށް ޓްރާންސްފާ ކޮށްފަ އެވެ. އެ މުވައްޒަފަށް މި ލަނޑު ލިބުނީ އޭނާ ބައިވެރިވި ވީޑިއޯ ކޯލެއްގައި ތިބި ހުރިހާ "މުވައްޒަފުންނަކީ" އޭއައި ބޭނުންކޮށްގެން އުފައްދާފައިވާ ފޭކް ބައެއްކަން ނޭނގި އޮތުމުންނެވެ. އެ ބައްދަލުވުމުގައި ކުންފުނީގެ ސީއެފްއޯގެ ސިފަ ޖައްސާފައިވާ މީހަކު ވެސް އިނެވެ.
ސާވޭއިން ދައްކާ ގޮތުގައި މިދިޔަ އަހަރު ހިންގި ސްކޭމްތަކުގެ ދެބައިކުޅަ އެއްބަޔަށްވުރެ ގިނަ މުއާމަލާތުގައި (56 އިންސައްތަ) ގެއްލުނު ފައިސާގެ އަދަދު އުޅެނީ 500 ޑޮލަރަށްވުރެ ދަށުގައެވެ. ނަމަވެސް، ބައެއް ރޭވުންތަކުގައި އެތައް ހާސް ޑޮލަރެއް އަތުލާފައިވާތީ، ކޮންމެ ހާދިސާއެއްގައި އެވްރެޖްކޮށް 5،578 ޑޮލަރުގެ ގެއްލުން ލިބިފައިވެ އެވެ. މިކަމުގެ އަސަރުކުރި ގޭބިސީތަކުގެ ތެރެއިން 21 އިންސައްތަ މީހުން ބުނެފައިވަނީ މިއީ މާލީ ގޮތުން ކުރިމަތިވި "ވަރަށް ބޮޑު ތަކްލީފެއް" ކަމަށެވެ. އަދި އަހަރަކު 80،000 ޑޮލަރަށްވުރެ މަދުން އާމްދަނީ ލިބޭ މީހުންގެ ތެރެއިން މި އަދަދު ހުރީ 28 އިންސައްތައިގަ އެވެ.
މާލީ ގެއްލުންތަކުގެ އިތުރުން، މިކަމުގެ ސަބަބުން ނަފްސާނީ ގޮތުން ބޮޑެތި ގެއްލުންތަކެއް ލިބޭކަން ވެސް ސާވޭއިން ވަނީ ހާމަވެފަ އެވެ. މިގޮތުން، ސްކޭމްގެ ޝިކާރައަކަށްވި މީހުންގެ ތެރެއިން 73 އިންސައްތަ މީހުން ބުނެފައިވަނީ އެމީހުންގެ ނަފްސާނީ ދުޅަހެޔޮކަމަށް މީގެ ނޭދެވޭ އަސަރުކޮށްފައިވާ ކަމަށެވެ. މީގެ ތެރެއިން 28 އިންސައްތަ މީހުން ސިފަކުރި ގޮތުގައި އެމީހުންނަށް ކުރި އަސަރަކީ "ވަރަށް ބޮޑު ނޭދެވޭ" އަސަރެކެވެ.
