ޕީޖީ އޮފީހުގެ ޤާނޫނީ ލިޔުންތައް ދިރާސާ ކުރުމާއި ދައުވާ ކުރުމާ ގުޅޭ ކަންކަމުގައި އޭއައިގެ އެހީ ހޯދާ ޕްރޮގްރާމް ރައީސް އިފްތިތާހު ކޮށްދެއްވައިފި
11 އޯގަސްޓު 2026 | އަންގާރަ 07:56ޕީޖީ އޮފީހުގެ ޚިދުމަތްތައް 2028 އާ ހަމައަށް ފުރިހަމައަށް ޑިޖިޓަލައިޒްކުރުމުގެ އަމާޒާއެކު، އޭއައި ބޭނުންކޮށްގެން "މަފިނި" ސިސްޓަމް ތަރައްޤީކޮށް ޤާނޫނީ ދިރާސާތަކާއި ލިޔެކިޔުންތައް އަވަސްކުރުމަށް ވަނީ ނިންމާފައި. މީގެ އިތުރުން، އޮންލައިންކޮށް ޚިދުމަތް ހޯދޭނެ "އީދޮރޯށި" ޕޯޓަލްއާއި ޖިނާއީ ނިޒާމުގެ އެންމެހައި ޤާނޫނުތަކާއި ކޯޓު ނިންމުންތައް ބަލާލެވޭ "ލެތުން" އެޕްލިކޭޝަން މިހާރު ވަނީ ތައާރަފުކޮށްފައި
ރައީސް މުއިއްޒު، ޕީ.ޖީ.އޯ 2.0 އިފްތިތާހުކޮށްދެއްވައިފި | ރައީސް އޮފީސް
ޕްރޮސެކިއުޓަރ ޖެނެރަލްގެ އޮފީހުން ކުރިއަށްގެންދަވާ އަރޓިފިޝަލް އިންޓެލިޖެންސް (އޭއައި) އާއި ޑިޖިޓަލް އިސްތިރާޖީ ޕްރޮގްރާމް، "ޕީޖީއޯ 2.0" އިފްތިތާހު ކޮށްފި އެވެ.
މި ޕްރޮގްރާމްތައް އިފްތިތާހު ކޮށްދެއްވީ ރައީސް ޑޮކްޓަރ މުހައްމަދު މުއިއްޒު އެވެ.
ކުރިއަށް އޮތް ދެ އަހަރެއްހާ ދުވަހުގެ ތެރޭގައި ފުރިހަމަކުރުމަށް ހަމަޖެހިފައިވާ މި ޕްރޮގްރާމުގެ މައިގަނޑު ތަސައްވުރަކީ 2028 ވަނަ އަހަރާ ހަމައަށް އަންނައިރު، ޕްރޮސެކިއުޓަރ ޖެނެރަލް (ޕީޖީ) އޮފީހަކީ، އިންސާނީ ހައްޤުތައް ކޮންމެ މަރުހަލާއެއްގައި ވެސް ރައްކާތެރިކުރެވިފައިވާ، އަމިއްލަ ސިޔާދަތީ ބާރުލިބިގެންވާ، ފުރިހަމައަށް ޑިޖިޓަލައިޒްކުރެވިފައިވާ، ސުލޫކީ ހެޔޮ މިންގަނޑުގައި ނަޒާހަތްތެރިކަމާއެކު، ދެފުށް ފެންނަ ޕްރޮސެކިއުޝަން ޚިދުމަތެއްދޭ ތަނަކަށް ހެދުން ކަމަށް އެ އޮފީހުން މައުލޫމާތު ދެ އެވެ.
މި ޕްރޮގްރާމުގެ ދަށުން ޕީޖީ އޮފީހުގައި މިހާރު ބޭނުންކުރަމުން އަންނަ ކޭސް މެނޭޖްމަންޓް ސިސްޓަމް "މަފިނި" އިތުރަށް ފުރިހަމަކޮށް، އޭއައިގެ ޤާބިލުކަން އެ ސިސްޓަމާ ގުޅުވާލެވޭނެކަމަށް ވެސް ޕީޖީ އޮފީހުން ފާހަގަ ކުރެ އެވެ. މީގެތެރޭގައި ޤާނޫނީ ލިޔެކިޔުންތައް ދިރާސާކުރުމާއި ދައުވާ ފޯމުތަކުގެ ޚުލާސާ އެކުލަވާލުމާއި އައިޑެންޓިޓީ ޗެކްކުރުމާއި ހެކިބަހާއި ލިޔެކިޔުންތައް ރައްކާތެރިކަމާއެކު ބެލެހެއްޓުމުގެ އިތުރުން، އާންމުންނަށް މައުލޫމާތާއި އިރުޝާދު ފޯރުކޮށްދޭ "ސިޓިޒަން އޭޖެންޓް" ހިމެނެ އެވެ.
ޕީޖީ އޮފީހުން މައުލޫމާތު ދޭ ގޮތުގައި މައްސަލަތަކުގެ މައުލޫމާތާއި ސިސްޓަމްތައް ބެލެހެއްޓޭނީ ދިވެހިރާއްޖޭގެ އަމިއްލަ ސިޔާދަތީ ކޮންޓްރޯލްގެ ދަށުގައި، ޕީޖީ އޮފީހުގެ އަމިއްލަ ބިނާރުގަ އެވެ.
އޭއައި ވަސީލަތްތައް ބޭނުންކުރި ކަމުގައިވީނަމަވެސް، ކުށުގެ ދައުވާކުރުމާއި ނުކުރުމުގެ ފަހު ނިންމުން ނިންމާނީ އޭއައި ނޫންކަމަށާއި، އެ ފަދަ އެންމެހައި ނިންމުންތައް ނިންމުމުގެ ފުރިހަމަ އިޚްތިޔާރާއި މަސްއޫލިއްޔަތު އޮންނާނީ ޤާނޫނީގޮތުން އައްޔަންކުރެވިފައިވާ ޕްރޮސެކިއުޓަރުންގެ އަތްމަތީގައިކަމަށް ޕީޖީ އޮފީހުން ބުނެ އެވެ.
މީގެ އިތުރުން، ޕްރޮސިކިއުޓަރ ޖެނެރަލްގެ އޮފީހުން ފޯރުކޮށްދެއްވާ ޚިދުމަތްތައް އޮންލައިންކޮށް ހޯއްދެވުމަށް އެ އޮފީހުން ތައްޔާރުކުރެއްވި "އީދޮރޯށި" އިފްތިތާހުކުރެއްވުމާއި، ޖިނާއީ އަދުލުގެ ނިޒާމާ ގުޅުންހުރި އެންމެހައި ޤާނޫނުތަކާއި، ޤަވާއިދުތަކާއި، އުސޫލުތަކާއި، މަތީ މަރުހަލާގެ ކޯޓުތަކުގެ ނިންމުންތައް އެއްތަނަކުން ފެންނާނެ ގޮތަށް ފަރުމާކުރެވިފައިވާ ވެބްސައިޓް އަދި މޯބައިލް އެޕްލިކޭޝަން "ލެތުން" އިފްތިތާހުކުރެއްވުން ވެސް މި ރަސްމިއްޔާތުގައި އޮތެވެ.
ޕީޖީ އޮފީހުން މައުލޫމާތު ދޭ ގޮތުގައި އަލަށް ތައާރަފް ކުރި އޭއައި މޮޑެލްއަކީ ޕްރޮސިކިއުޓަރުން ނިންމާ ނިންމުންތަކުގެ ބަދަލުގައި ބޭނުންކުރާ އެއްޗެއްގެ ބަދަލުގައި، އެ ނިންމުންތައް ނިންމުމުގައި އެހީތެރިވެދޭނެ ވަސީލަތެކެވެ.
ދައުވާ ކުރުމާ ގުޅޭގޮތުން ނިންމާ ކޮންމެ ނިންމުމެއް ނިންމާނީ ކުރިއެކޭ ވެސް އެއްފަދައިން ގާނޫނީ ގޮތުން ޝަރުތު ހަމަވާ ޕްރޮސިކިއުޓަރުންނެވެ. އޭއައިގެ އެހީތެރިކަން ޕްރޮސިކިއުޓަރުންނަށް ލިބިގެންދާނީ ލިޔެކިޔުންތައް ދިރާސާކުރުމުގައާއި، މައްސަލަތަކުގައި ހުންނަ ފުށުއެރުންތައް ދެނެގަތުމުގައާއި، ދިރާސާތައް ކުރުމުގެ އިތުރުން ތަކުރާރުކޮށް ކުރަންޖެހޭ އިދާރީ މަސައްކަތްތައް މަދުކުރުމުގަ އެވެ. ގާނޫނީ ގޮތުން ނިންމަންޖެހޭ އެންމެ ފަހުގެ ނިންމުންތައް ނިންމުމުގެ އިޚްތިޔާރު އަބަދުވެސް އޮންނާނީ ޕްރޮސިކިއުޓަރުންގެ އަތްމަތީގައިކަން އެ އޮފީހުން ފާހަގަ ކުރެ އެވެ.
މި ނިޒާމަކަށް އަމިއްލައަށް ދައުވާ އުފުލުމެއް ނުވަތަ މީހެއްގެ މައްޗަށް ކުށް ސާބިތުވާކަން ކަނޑައެޅުމެއް ފަދަ ކަންކަމެއް ނުކުރެވޭނެކަން ވެސް ޕީޖީ އޮފީހުން ވަނީ ފާހަގަކޮށްފަ އެވެ. އަދި ޕްރޮސިކިއުޓަރުންނަށް ލިބިދީފައިވާ ގާނޫނީ އިޚްތިޔާރުތަކުގެ ބަދަލުގައި މި ނިޒާމު ބޭނުން ނުކުރެވޭނެކަމަށާއި ބޭރުގެ އެއްވެސް އޭއައި ފޯރުކޮށްދޭ ފަރާތަކަށް ޕްރޮސިކިއުޝަންގެ ނިންމުންތައް ކޮންޓްރޯލް ކުރުމުގެ ފުރުސަތެއް ނޯންނާނެކަމަށް ވެސް އެ އޮފީހުން ބުނެ އެވެ.
ޕީޖީ އޮފީހުން މައުލޫމާތު ދޭ ގޮތުގައި ޕްރޮސިކިއުޝަނާ ގުޅޭ އެންމެހާ މައުލޫމާތުތައް ރައްކާތެރިކަމާއެކު ބަލަހައްޓާނީ ޕްރޮސިކިއުޓަރ ޖެނެރަލްގެ އޮފީހުގެ ފުރިހަމަ ބާރު ހިނގާ އިންފްރާސްޓްރަކްޗަރގެ ތެރޭގަ އެވެ.
