ސިއްރުން ޓްރަމްޕްގެ ފްލައިޓް ބަދަލު ކުރަން ޖެހުނު މައްސަލައިގެ ތަފްސީލު ހިއްސާ ކުރުމަށް، ޑިމޮކްރެޓިކް ޕާާޓީ އިން ގޮވާލައިފި

އީރާން އިން ދީފާނެ ކަމަށް ބެލެވޭ ހަމަލާއެއްގެ ނުރައްކަލާ ގުޅިގެން، އެމެރިކާގެ ރައީސް ޑޮނަލްޑް ޓްރަމްޕް މިދިޔަ މަހު ތުރުކީ އިން ސިއްރިއްޔާތުގައި ފުރާވަޑައިގެންނެވި މައްސަލައިގައި ކޮންގްރެސް އަށް މައުލޫމާތު ދިނުމަށް އިދިކޮޅު ޑިމޮކްރެޓިކް ޕާޓީ އިން ވައިޓް ހައުސް އަށް ގޮވާލައިފި އެވެ.

ސެނެޓުގެ މައިނޯރިޓީ ލީޑަރު ޗަކް ޝޫމާ މިކަމަށް ގޮވާލެއްވީ، ޓްރަމްޕްގެ ދަތުރުފުޅު ސިއްރު ކުރުމަށްޓަކައި ވައިޓް ހައުސް އިން އޮޅުވާލުންތަކެއް ގެންގުޅުނުކަން "ވޮޝިންޓަން ޕޯސްޓް" ނޫހުން ރިޕޯޓު ކުރުމާ ގުޅިގެން އަންގާރަ ދުވަހު ނެރުއްވި ބަޔާނެއްގައި އެވެ.

މިދިޔަ ޖުލައި މަހުގެ 8 ވަނަ ދުވަހު ހިނގި މި ހާދިސާގައި، ޓްރަމްޕް ކުރީގެ އެއަރ ފޯސް ވަން މަތިންދާ ބޯޓަށް އަރާވަޑައިގަންނަވާ މަންޒަރު ކެމެރާތަކަށް ދެއްކުމަށް ފަހު، އޭނާ ވަނީ ސިއްރިއްޔާތުގައި ކޭޓަރިން ޓްރަކެއްގެ އެހީގައި ސީ-32އޭ މަރުކާރުގެ އަސްކަރީ ބޯޓަކަށް ބަދަލުކޮށްފައި އެވެ.

މިކަން އެ ބޯޓުގައި ތިބި މީޑިއާގެ މީހުންނާއި ވައިޓް ހައުސްގެ ބައެއް މުވައްޒަފުންނަށް ވެސް އެނގިފައި ނުވެ އެވެ. ޝޫމާ ވިދާޅުވީ، މިފަދަ ނުރައްކާތެރި ހާދިސާއެއްގެ މައުލޫމާތު ކޮންގްރެސް އަށް ނޭނގި އޮއްވާ، ނޫސްތަކަށް އެނގުމަކީ ބަލައިގަނެވޭނެ ކަމެއް ނޫން ކަމަށެވެ.

މި އޮޕަރޭޝަންގެ މައުލޫމާތު ކޮންގްރެސްގެ "ގޭންގް އޮފް އެއިޓް" ނުވަތަ އެންމެ ނުފޫޒުގަދަ އަށް މެންބަރުންނަށް ވެސް ހިއްސާކޮށްފައި ނުވާކަން މިހާރު ވަނީ ހާމަވެފައި އެވެ. ޝޫމާގެ އިތުރުން ސެނެޓް އިންޓެލިޖެންސް ކޮމިޓީގެ އިސް މެންބަރު މާކް ވޯނަރަށް ވެސް މިކަމުގެ މައުލޫމާތު ދީފައި ނުވާ ކަމަށް އޭނާގެ އޮފީހުން ބުނެ އެވެ. ނަމަވެސް، ރިޕަބްލިކަން ޕާޓީގެ ލީޑަރުން ކަމަށްވާ ސެނެޓަރު ޖޯން ތޫން އާއި ހައުސް ސްޕީކަރު މައިކް ޖޯންސަން މިކަމާ ގުޅޭ ގޮތުން އެއްވެސް އެއްޗެއް ވިދާޅުވެފައި ނުވެ އެވެ. 

މި ހާދިސާއާ ގުޅިގެން ސަރުކާރުގެ ދެފުށް ފެންނަ މިންވަރާމެދު ސުވާލު އުފެދިފައިވާއިރު، ކުރީގެ ރައީސް ޖޯ ބައިޑަން ސަރުކާރުގެ އޮފިޝަލެއް ކަމަށްވާ ނެޑް ޕްރައިސް ވިދާޅުވީ، ހާދިސާ ހިނގިތާ ހަފުތާ ލތަކެއް ވީއިރު ވެސް ވައިޓް ހައުސް އިން ރައްޔިތުންނަށް ތެދު މައުލޫމާތު ދެމުން ނުދާ ކަމަށެވެ. އަދި ސެނެޓަރު ރިޗަޑް ބްލޫމެންތާލް ވިދާޅުވީ، ރައީސްގެ ސަލާމަތަށްޓަކައި ސީކްރެޓް ސަރވިސް އިން އެޅި ފިޔަވަޅުތަކަށް ތައުރީފު ކުރެއްވި ނަމަވެސް، ރައީސް ނެތި ކުރީގެ އެއަރ ފޯސް ވަންގައި ދަތުރުކުރި މުވައްޒަފުންނާއި ނޫސްވެރިންގެ ސަލާމަތަށް އެޅި ފިޔަވަޅުތައް ސާފު ކުރަން ބޭނުންވާ ކަމަށެވެ.

ވައިޓް ހައުސް އިން މިހާތަނަށް މި މައްސަލައިގައި ވަކި އެއްޗެއް ބުނެފައި ނުވެ އެވެ. އަންގާރަ ދުވަހު އޯހިއޯ އަށް ކުރެއްވި ދަތުރުފުޅުގައި ވެސް ޓްރަމްޕް ނޫސްވެރިންނާ ވާހަކަ ދައްކަވާފައި ނުވެ އެވެ. ޓްރަމްޕް މިހާރު ދަތުރު ކުރައްވަނީ ޤަތަރުން ހަދިޔާ ކޮށްފައިވާ އައު އެއަރ ފޯސް ވަން މަތިންދާ ބޯޓުގައި އެވެ.

އާންމު އުސޫލުން ރައީސުންގެ މިފަދަ ސިއްރު ދަތުރުފުޅުތަކަށް ފަހު މައުލޫމާތު ހާމަކުރި ނަމަވެސް، މިފަހަރު އެކަން ކޮށްފައި ނުވާތީ ޑިމޮކްރެޓިކް ޕާޓީ އިން ދަނީ ކަންބޮޑުވުން ފާޅު ކުރަމުންނެވެ.