ރަސްމީ ބައްދަލުވުމެއްގައި އަނެއްކާ ވެސް ޓްރަމްޕް ނިދިޖެހިފައި އިންނެވި ވީޑިއޯ އާއެކު، ފާޑު ކިޔުން އަމާޒުވަނީ

އެމެރިކާާގެ ރިޔާސީ ގަނޑުވަރު، ވައިޓް ހައުސްގައި ބޭއްވި ރަސްމީ ބައްދަލުވުމެއްގައި އެ ޤައުމުގެ ރައީސް ޑޮނަލްޑް ޓްރަމްޕް އަނެއްކާ ވެސް ނިދިޖެހިފައި އިންނެވި ވީޑިއޯ އާންމުވެ، ސޯޝަލް މީޑިއާގައި އެތައް ބައެއްގެ ފާޑު ކިޔުން އަމާޒުވެއްޖެ އެވެ. 

މި ހާދިސާ ހިނގާފައިވަނީ ކުޑަކުދިންނަށް ދޭ ވެކްސިންތަކުގެ އަދަދު މަދުކުރުމަށާއި ހިމަބިހި ފަދަ ބަލިތަކުން ރައްކާތެރިވުމަށް ދޭ އެމްއެމްއާރް ވެކްސިން ތިން ބަޔަކަށް ބަހައިގެން ދިނުމަށް އެކުލަވާލި ރިޔާސީ ގަރާރެއްގައި ސޮއިކުރެއްވުމަށް ހޯމަ ދުވަހު ބޭއްވި ރަސްމިއްޔާތެއްގައި އެވެ.

މިއީ ވެކްސިންގެ ރައްކާތެރިކަމާ މެދު ސުވާލު އުފައްދަވާ އެމެރިކާގެ ހެލްތު އެންޑް ހިއުމަން ސަރވިސަސް ސެކްރެޓަރީ ރޮބަޓް އެފް ކެނެޑީ ޖޫނިއާ އިސްވެ ހުންނަވައިގެން ގެންނަވާ ބަދަލެކެވެ.

އުމުރުފުޅުން 80 އަހަރުގެ ޓްރަމްޕް އޯވަލް އޮފީހުގެ ރެޒޮލިއުޓް ޑެސްކު ކައިރީގައި އިންނެވިއިރު، ކެނެޑީ އާއި ނޭޝަނަލް އިންސްޓިޓިއުޓްސް އޮފް ހެލްތުގެ ޑިރެކްޓަރު ޖޭ ބަޓަޗާރިޔާ ވާހަކަ ދައްކަވަމުން ދިޔައިރު، ތަކުރާރުކޮށް ލޯފުޅު މެރުނު މަންޒަރު ފެންނަ ވީޑިއޯތައް ވަނީ އާންމުވެފައި އެވެ.

ސޯޝަލް މީޑިއާގައި މި ވީޑިއޯތަކަށް ކޮމެންޓު ކުރި ބައެއް މީހުން ބުނެފައިވަނީ، ޓްރަމްޕް އިރުކޮޅަކު ލޯ ހުޅުވާލެއްވުމަށް ފަހު އަނެއްކާ ވެސް "ހުވަފެނީ ދުނިޔެއަކަށް" ގެނބިގެންދާ މަންޒަރަކީ މަޖާ ކަމެއް ނަމަވެސް، މިއީ ސީރިއަސް މައްސަލައެއް ކަމަށެވެ. އަދި ކުރީގެ ރައީސް ޖޯ ބައިޑަން އަށް "ސްލީޕީ ޖޯ" ގެ ނަމުން މަލާމާތް ކުރެއްވި ޓްރަމްޕްގެ މި އަމަލުފުޅަށް ގިނަ ބަޔަކު ވަނީ ފާޑުކިޔާފައި އެވެ.

މި ފާޑުކިޔުންތަކާ ގުޅިގެން ވައިޓް ހައުސް އިން ވަނީ ޓްރަމްޕްގެ ދިފާއުގައި ވާހަކަ ދައްކާފައި އެވެ. ވައިޓް ހައުސް އިން ބުނީ ޓްރަމްޕް އަކީ އެމެރިކާގެ ތާރީޚުގައި ވެސް ފެނުނު އެންމެ ހަކަތަ ހުރި އަދި ވިސްނުން ތޫނު ރައީސް ކަމަށާއި، އޭނާ މަސައްކަތް ކުރައްވަނީ ރައްޔިތުންނަށް ވެވަޑައިގެންނެވި ވައުދުތައް ފުއްދެވުމަށް ކަމަށެވެ. އަދި ބައިޑަންގެ ސިއްހީ ހާލަތު މީޑިއާތަކުން ފޮރުވަން މަސައްކަތް ކުރި ނަމަވެސް، ޓްރަމްޕްގެ ހާލަތު މާ ރަނގަޅު ކަމަށް ވައިޓް ހައުސް އިން ބުނެފައިވެ އެވެ.

ނަމަވެސް ސިއްހީ މާހިރުން ގެންދަނީ ޓްރަމްޕްގެ ސިއްހަތާ މެދު ކަންބޮޑުވުން ފާޅު ކުރަމުންނެވެ. އެގޮތުން ސީއެންއެންގެ މެޑިކަލް އެނަލިސްޓް ޑރ. ޖޮނަތަން ރައިނާ ވިދާޅުވީ، ޓްރަމްޕްގެ ކިބައިން ދުވާލު ގަޑީގައި އާދަޔާ ޚިލާފަށް ނިދި އަންނަ ބަލި ނުވަތަ "ސިވިއާ ޑޭޓައިމް ސޮމްނޮލެންސް" ފެންނަ ކަމަށެވެ. މީގެ ކުރިން ލިންޑްސީ ގްރަހަމްގެ ޖަނާޒާގައި ވެސް ޓްރަމްޕް އަށް ނިދި ޖެހުނުކަން ފާހަގަ ކުރެވިފައިވާއިރު، މިއީ އުމުރުން ދުވަސްވީ މީހުންނަށް ޑިމެންޝިއާ ފަދަ ބަލިތަކުގެ ނުރައްކާ އޮތް ކަމުގެ ނިޝާނެއް ކަމަށް އެ ޑޮކްޓަރު ވިދާޅުވި އެވެ.

އެމެރިކާގެ ރައީސް ކަމުގެ ހުވާކުރެއްވި އެންމެ އުމުރުން ދުވަސްވީ ބޭފުޅާގެ ރެކޯޑް އޮތް ޓްރަމްޕް ވަނީ އޭނާގެ ސިއްހަތު ހުރީ އެންމެ ރަނގަޅަށް ކަމަށް ވިދާޅުވެފައި އެވެ. މިދިޔަ މެއި މަހު ވޯލްޓަރ ރީޑް ހޮސްޕިޓަލް އިން ހެއްދެވި މެޑިކަލް ޗެކަޕްތަކުގެ ނަތީޖާ ވަރަށް ރަނގަޅު ކަމަށް ވެސް އޭނާ ވަނީ ސޯޝަލް މީޑިއާގައި ހާމަ ކުރައްވާފައި އެވެ.