ޗައިނާއިން ޕްރައިމަރީން ފެށިގެން ޔުނިވަރސިޓީއަށް އޭއައި ކިޔަވައިދޭން ނިންމައިފި
1 ޖުލައި 2026 | ބުދަ 08:06ޗައިނާގެ ތައުލީމީ ނިޒާމު ހަރުދަނާކުރުމަށް އެކުލަވާލި އާ ޕްލޭނުގެ ދަށުން، ކިޔަވައިދިނުމާއި އިމްތިހާނުތައް ބޭއްވުމުގައި އާޓިފިޝަލް އިންޓެލިޖެންސް (އޭއައި) ބޭނުންކުރުމަށް ވަނީ ނިންމާފައި. މި ބަދަލާއެކު ދަރިވަރުންގެ ފެންވަރު ވަޒަންކުރުމާއި ސްކޫލްތައް ހިންގުމުގައި ޑިޖިޓަލް ވަސީލަތްތަކުގެ އެހީތެރިކަން ހޯދާއިރު، ރަޝިޔާ ފަދަ ގައުމުތަކުން ވެސް ދަނީ ތައުލީމީ އަދި އިގްތިސާދީ ދާއިރާތަކުގައި އޭއައި ހިމެނުމަށް ބޮޑެތި މަޝްރޫއުތަކެއް ހިންގަމުން. މި މަސައްކަތްތަކުގެ މައިގަނޑު މަގްސަދަކީ އައު އީޖާދުތަކަށް މަގުފަހިކޮށް، ބައިނަލްއަގުވާމީ ފެންވަރުގައި ޓެކްނޮލޮޖީގެ ރަންގަޅު ނަތީޖާ ހާސިލުކުރުން.
އެޕަލް ސްޓޯރެއްގެ ތެރޭގައި ދައްކާލުމަށް ބަހައްޓާފައި ހުރި އައިޕެޑްތަކެއް ކުޑަކުދިންތަކެއް ބޭނުންކޮށް، ބަލައިލަނީ | ގެޓީ އިމޭޖަސް
ޗައިނާގެ ސްޓޭޓް ކައުންސިލުން އަލަށް އެކުލަވާލި ފަސް އަހަރުގެ ޕްލޭނެއްގެ ދަށުން، ޕްރައިމަރީ ގްރޭޑްތަކުން ފެށިގެން ޔުނިވަރސިޓީއާ ހަމައަށް ތައުލީމީ ނިޒާމުގެ ތެރޭގައި އާޓިފިޝަލް އިންޓެލިޖެންސް (އޭއައި) ހިމެނުމަށް އެ ގައުމުން ނިންމައިފި އެވެ.
މިދިޔަ ހޯމަ ދުވަހު އާންމުކުރި މި ލިޔުމުގައި ބަޔާންކޮށްފައިވަނީ، ދަރިވަރުންގެ އޭއައި ހޭލުންތެރިކަން އިތުރުކުރުމަށާއި، އެ ޓެކްނޮލޮޖީ ދެނެގަނެ، މައްސަލަތައް ދެނެގަތުމަށާއި ހައްލުކުރުމަށް އެ ބޭނުންކުރަން ދަސްކޮށްދިނުމަށްޓަކައި، ތައުލީމީ ހުރިހާ މަރުހަލާއެއްގައި އޭއައި ކިޔަވައިދޭން ޖެހޭނެ ކަމަށެވެ.
މި ޕްލޭނަކީ ޗައިނާގެ ތައުލީމީ ނިޒާމު އިތުރަށް ހަރުދަނާކުރުމަށް ކުރާ މަސައްކަތުގެ ބައެއްގެ ގޮތުގައި ވަނީ ފާހަގަކޮށްފަ އެވެ. މީގެ ދަށުން ސައިންސާއި، ބިނާކުރަނިވި ވިސްނުމާއި، އައު އީޖާދުތަކުގެ އިތުރުން ތައުލީމާއި، ދިރާސާކުރުމާއި، ސިނާއަތްތަކާ ދެމެދު އޮންނަ ގުޅުމަށް ބޮޑު އިސްކަމެއް ދިނުމަށް ވަނީ ހަމަޖެހިފަ އެވެ.
މީގެ އިތުރުން، އިމްތިހާނުތަކާއި، ދަރިވަރުންގެ ފެންވަރު ވަޒަންކުރުމާއި، ސްކޫލްތައް ހިންގުމުގައި އޭއައި އާއި ބިގް ޑޭޓާ ފަދަ ޑިޖިޓަލް ވަސީލަތްތައް ބޭނުންކުރުމަށް މި ޕްލޭންގައި ގޮވާލާފައިވެ އެވެ. ހަމައެއާއެކު، އަޚްލާގީ މިންގަނޑުތަކާއި ސަލާމަތީ ކަންކަން ބެލެހެއްޓުން ހަރުދަނާކުރުމަށް ވެސް ވަނީ ހިމަނާފަ އެވެ.
ޗައިނާގެ ބައެއް ސްކޫލްތަކުން މިހާރުވެސް ދަނީ ދުވަހުން ދުވަހަށް ނަގައިދޭ ފިލާވަޅުތަކުގައި މި ޓެކްނޮލޮޖީ ބޭނުންކުރެވޭނެ މިންވަރު ޓެސްޓުކުރަމުންނެވެ. އެގޮތުން ރީތިކޮށް ލިޔަން ދަސްކޮށްދިނުމާއި، ލިޔުންތައް ވަޒަންކުރުމާއި، ބަސް ދަސްކޮށްދިނުމުގެ އިތުރުން، މުދައްރިސުން ފިލާވަޅުތައް ތައްޔާރުކުރުމަށާއި، ކުދިންގެ ފެންވަރު ބެލުމަށާއި، ކޮންމެ ކުއްޖަކަށް ވަކިން ހާއްސަ މަސައްކަތްތައް ހަވާލުކުރުމަށް އޭއައި ބޭނުންކުރަމުންދެ އެވެ.
ޗައިނާގެ މި ނިންމުން އައިސްފައިވަނީ ދުނިޔޭގެ އިގްތިސާދީ ބޮޑެތި އެހެން ގައުމުތަކުން ވެސް ގައުމީ ތަރައްގީގެ ޕްލޭންތަކުގައި އޭއައި ހިމެނުމަށް މަސައްކަތް ކުރަމުންދާ ދަނޑިވަޅެއްގަ އެވެ. އެގޮތުން މިދިޔަ އޭޕްރީލް މަހު ރަޝިޔާގެ ރައީސް ވްލަޑިމިއަރ ޕުޓިން ވަނީ، ސިނާއަތްތަކާއި، ލޮޖިސްޓިކްސް އިން ފެށިގެން ހަކަތައާއި ތައުލީމީ ދާއިރާއާ ހަމައަށް ހުރިހާ ދާއިރާއެއްގައި އޭއައި ހިމެނުމަށް ގައުމީ ޕްލޭނެއް ތައްޔާރުކުރުމަށް އެ ގައުމުގެ ސަރުކާރަށް އަމުރުކުރައްވާފަ އެވެ.
އޭއައިގެ ސަބަބުން ގައުމުގެ މުޅި ދިރިއުޅުން ބަދަލުވަމުންދާކަން ފާހަގަކުރައްވައި ޕޫޓިން ވިދާޅުވީ، ރަޝިޔާއަކީ އެންމެ ކުރިއަރާފައިވާ ޓެކްނޮލޮޖީތައް ހުރި ގައުމަކަށް ވާންޖެހޭނެ ކަމަށާއި، ހާއްސަކޮށް ދިފާއީ އަދި ސަލާމަތީ ކަންކަމުގައި ގައުމުގެ އަމިއްލަ އުފެއްދުންތަކަށް ބަރޯސާވާންޖެހޭނެ ކަމަށެވެ.
ރަޝިޔާގެ ޔުނިވަރސިޓީތަކުން ވެސް ދަނީ އޭއައިއާ ގުޅުންހުރި ތަމްރީނުތައް ފުޅާކުރަމުންނެވެ. އެގޮތުން މޮސްކޯ ސްޓޭޓް ޔުނިވަރސިޓީން ދާދިފަހުން ވަނީ އޭއައިއަށް ހާއްސަ ފެކަލްޓީއެއް އުފައްދައި، ބެޗްލަރސް އަދި މާސްޓަރސް ޑިގްރީއަށް ޖުމްލަ 72 ޖާގަ ހުޅުވާލާފަ އެވެ. އަދި ޓިއުމެން ސްޓޭޓް ޔުނިވަރސިޓީން ވަނީ، މުދައްރިސުން އިރުޝާދުދޭ މީހުންގެ ގޮތުގައި ތިބޭއިރު، އޭއައި އަކީ ދަރިވަރުންނަށް މައުލޫމާތުދޭ މާހިރެއްގެ ގޮތުގައި ބޭނުންކުރެވޭނެ މޮޑެލްއެއް ހުށަހަޅާފަ އެވެ.
މީގެ އިތުރުން، މިދިޔަ މޭ މަހު ރައީސް ޕުޓިން ވަނީ އެކި ގައުމުތަކުގެ ސައިންސްވެރިންނާއި، ތައުލީމީ ދާއިރާގެ ބޭފުޅުންނާއި، ވިޔަފާރިވެރިން ހިމެނޭ ބައިނަލްއަގުވާމީ އޭއައި އިއްތިހާދެއް އުފެއްދުމުގެ ޕްލޭންތައް އިއުލާންކުރައްވާފަ އެވެ. މި އިއްތިހާދުގެ މަގްސަދަކީ އަމިއްލަ އޭއައި މޮޑެލްތައް އުފެއްދުމުގައާއި، ކޮމްޕިއުޓިން އަދި ހަކަތައިގެ އިންފްރާސްޓްރަކްޗަރ ގާއިމުކުރުމުގައާއި، އެކި ސަރަހައްދުތަކުގެ ބޭނުންތަކަށް އޭއައި ފައްކާކުރުމުގައި ބައިނަލްއަގުވާމީ އެއްބާރުލުން އިތުރުކުރުން ކަމަށް ރައީސް ޕޫޓިން ވިދާޅުވި އެވެ.
