ޖަޕާނުން މިލްކުވެރިކަމަށް ދައުވާކުރާ ކޫރީލް އައިލެންޑްސްއަށް ރަޝިޔާގެ ރައީސް ޕޫޓިން ޒިޔާރަތް ކުރެއްވުމާ ގުޅިގެން، ޖަޕާނު ސަރުކާރުން އެކަން ވަރަށް ބޮޑަށް ކުށްވެރިކޮށްފި

ރަޝިޔާގެ ބާރުގެ ދަށުގައި އޮތް، ނަމަވެސް ޖަޕާނުން މިލްކުވެރިކަމަށް ދައުވާކުރާ ކޫރީލް އައިލެންޑްސްއަށް ރަޝިޔާގެ ރައީސް ވުލަޑީމިއަރ ޕޫޓިން ފުރަތަމަ ފަހަރަށް ޒިޔާރަތް ކުރެއްވުމާ ގުޅިގެން، ޖަޕާނު ސަރުކާރުން އެކަން ވަރަށް ބޮޑަށް ކުށްވެރިކޮށްފި އެވެ.

ރަޝިޔާގެ ދައުލަތުގެ މީޑިއާތަކުން ރިޕޯޓްކޮށްފައިވާ ގޮތުގައި، ބުރާސްފަތި ދުވަހު ޕޫޓިން ވަނީ ކޫރީލް އައިލެންޑްސްގެ އެންމެ ދެކުނަށް އޮންނަ އިޓުރުޕް ރަށަށް ޒިޔާރަތްކުރައްވައި، އެ ސަރަހައްދުގެ ގަވަރުނަރާ ބައްދަލުކުރައްވާފަ އެވެ. އަދި މި ދަތުރުފުޅުގައި އެ ރަށުގައި ހުންނަ މަސް ބަންދުކުރާ ކާރުޚާނާއަކަށާއި، ހޮސްޕިޓަލަކަށް އަދި ސުކޫލަކަށް ވެސް އެމަނިކުފާނު ޒިޔާރަތްކުރެއްވި އެވެ.

މި ޖަޒީރާ ރަށްތަކުގެ ތެރެއިން އެންމެ ދެކުނަށް އޮތް ހަތަރު ރަށަކީ ޖަޕާނުގެ މިލްކެއް ކަމަށް އެ ގައުމުން ބުނަމުންދާއިރު، ޖަޕާނުން އެ ރަށްތަކަށް ކިޔަނީ "ނޮދަން ޓެރިޓަރީޒް" އެވެ. ދެވަނަ ބޮޑު ހަނގުރާމައިގެ ތެރޭގައި ސޯވިއެޓް ޔޫނިއަނުން ހިފި މި ރަށްތަކުގެ މައްސަލައަކީ މޮސްކޯ އާއި ޓޯކިޔޯއާ ދެމެދު އޮންނަ ގުޅުމަށް އަބަދުވެސް ހުރަސްއެޅެމުންދާ މައިގަނޑު ސަބަބެވެ.

ޖަޕާނުގެ ބޮޑުވަޒީރު ސަނައޭ ޓަކައިޗީ ވިދާޅުވީ، ޕޫޓިން އެ ސަރަހައްދަށް ކުރެއްވި ޒިޔާރަތަކީ "ދުވަހަކުވެސް ބަލައިގަނެވޭނެ ކަމެއް ނޫން" ކަމަށާއި، އެއީ ޖަޕާނުގެ ރައްޔިތުންގެ އިހުސާސްތަކަށް ދިން ވަރަށް ބޮޑު އަނިޔާއެއް ކަމަށެވެ.

ނޫސްވެރިންނާ ވާހަކަދައްކަވަމުން ޓަކައިޗީ ވިދާޅުވީ، ރަޝިޔާގެ ރައީސްގެ މަގާމުގައި ހުންނެވި ބޭފުޅަކު އެ ސަރަހައްދަށް ޒިޔާރަތްކުރެއްވުމަކީ، "ނޮދަން ޓެރިޓަރީޒް" އާ މެދު ޖަޕާނުން ޒަމާނުއްސުރެ ގެންގުޅެމުންދާ ސިޔާސަތާ މުޅިން ޚިލާފު ކަމެއް ކަމަށެވެ.

ޖަޕާނުގެ ޚާރިޖީ ވަޒީރު ތޮޝިމިޓްސޫ މޮޓެގީ ވެސް ވަނީ ޕޫޓިންގެ މި ދަތުރުފުޅަށް ފާޑުވިދާޅުވެފަ އެވެ. އޭނާ ވިދާޅުވީ ތާރީޚީ ގޮތުންނާއި ބައިނަލްއަގުވާމީ ގާނޫނުތަކަށް ބަލާއިރު ވެސް އެ ރަށްތަކަކީ ޖަޕާނުގެ އަމިއްލަ ފަސްގަނޑެއް ކަމަށެވެ. ޖަޕާނުގެ ފޮރިން މިނިސްޓްރީން ބުނި ގޮތުގައި، މި މައްސަލައިގައި ރަޝިޔާގެ ސަފީރު ހާޒިރުކޮށް، ޕޫޓިންގެ ދަތުރުފުޅާ މެދު އޮތް ނުރުހުން ފާޅުކޮށް ވަނީ ވަރަށް ބޮޑަށް އިހުތިޖާޖުކޮށްފަ އެވެ.

ރަޝިޔާއިން ޖަޕާނަށް ބިރުދައްކަމުން ނުދާ ކަމަށް ޕޫޓިން ވިދާޅުވުން

2022 ވަނަ އަހަރު ޔޫކްރެއިންގައި ފެށުނު ހަނގުރާމައާ ގުޅިގެން ޓޯކިޔޯ އާއި މޮސްކޯގެ ގުޅުން ވަނީ ވަރަށް ބޮޑަށް ގޯސްވެފަ އެވެ. ޖީ7 ގެ ގައުމުތަކާ ގުޅިގެން ޖަޕާނުން ވަނީ ރަޝިޔާއާ ދެކޮޅަށް ދަތިކުރުމުގެ ފިޔަވަޅުތައް އަޅައި، ޔޫކްރެއިނަށް ފައިސާގެ އެހީއާއި ހަތިޔާރު ނޫން ދިފާއީ ސާމާނު ފޯރުކޮށްދީފަ އެވެ.

ބުދަ ދުވަހު ވާހަކަދައްކަވަމުން ޕޫޓިން ވިދާޅުވީ، ޖަޕާނުން ރަޝިޔާއާ ދެކޮޅަށް ފިޔަވަޅު އަޅާފައިވަނީ އެއްވެސް އަސާސެއް ނެތި ކަމަށެވެ.

ޕޫޓިން ވިދާޅުވީ، ޖަޕާނުން ރަޝިޔާއަކީ އެ ގައުމަށް އޮތް އެންމެ ބޮޑު ނުރައްކާ ކަމަށް ސިފަކޮށްފައިވާ ކަމަށާއި، ނަމަވެސް ރަޝިޔާއިން ޖަޕާނަށް އެއްވެސް ބިރެއް ނުދައްކާ ކަމަށެވެ. އަދި އޭގެ ބަދަލުގައި ރަޝިޔާގެ ބިމުގެ މިލްކުވެރިކަމަށް ދައުވާކުރަނީ ޖަޕާނުން ކަމަށް ވެސް އެމަނިކުފާނު ފާހަގަކުރެއްވި އެވެ.

މައްސަލަ ޖެހިފައިވާ ކޫރީލްގެ ހަތަރު ރަށަކީ، ރަޝިޔާގެ ކަމްޗަޓްކާ ޕެނިންސިއުލާ އިން ފެށިގެން ޖަޕާނުގެ އުތުރުގެ މައި ރަށް ކަމަށްވާ ހޮކައިޑޯއާ ހަމައަށް ދެމިގެން ގޮސްފައިވާ އަލިފާން ފަރުބަދަތަކުގެ މައްޗަށް އެކުލެވޭ ޖަޒީރާ ރަށްތަކެކެވެ.

މި ރަށްތަކަށް ދެ ގައުމުން ކިޔާ ނަންތައް ދާދި އެއްގޮތެވެ. ރަޝިޔާ ބަހުން ކުނާޝިރް، ހަބޮމާއީ، ޝިކޮޓާން އަދި އިޓުރުޕް ކިޔާއިރު، ޖަޕާނު ބަހުން ކިޔަނީ ކުނާޝިރީ، ހަބޮމާއީ، ޝިކޮޓާން އަދި އެޓޮރޯފޫ އެވެ.

ގާތްގަނޑަކަށް 20،000 ރަޝިޔާ ރައްޔިތުން ދިރިއުޅޭ މި ރަށްތަކަކީ މޫސުން ވަރަށް ގޯސް ސަރަހައްދެއް ނަމަވެސް، އެތަނަކީ ރަނާއި ރިހި ފަދަ މަޢުދަނުތަކުން މުއްސަނދި، އަދި މަސްވެރިކަމަށް ވަރަށް ރަނގަޅު ސަރަހައްދެކެވެ.

1945 ވަނަ އަހަރު ރަޝިޔާއިން މި ރަށްތައް ހިފުމަށްފަހު، އެތަނުގައި ދިރިއުޅެމުންދިޔަ 17،000 އެއްހާ ޖަޕާނު ރައްޔިތުން ވަނީ އެ ސަރަހައްދުން ބޭރުކޮށްލާފަ އެވެ.

އޭގެ ފަހުން، ފިނި ހަނގުރާމައިގެ ދުވަސްވަރު ސޯވިއެޓް ޔޫނިއަނުން އެމެރިކާއާއި އެމެރިކާގެ އެންމެ ގާތް ބައިވެރިޔާ ކަމަށްވާ ޖަޕާނާ ދެކޮޅަށް ކުރި މަސައްކަތުގައި، މި ރަށްތަކަކީ ކަނޑާއި ވައިގެ އަސްކަރީ މަރުކަޒުތައް ގާއިމުކުރި އިސްތިރާތީޖީ ގޮތުން މުހިންމު ތަނަކަށް ވެގެންދިޔަ އެވެ. އަދި ފާއިތުވި އަހަރުތަކުގައި ރަޝިޔާއިން ވަނީ އެ ރަށްތަކުގައި އެ ގައުމުގެ އަސްކަރީ ބާރު ވަރަށް ބޮޑަށް ވަރުގަދަކޮށްފަ އެވެ.

ޕޫޓިން ކޫރީލް އައިލެންޑްސްއަށް ވަޑައިގަތީ، ބުދަ ދުވަހު ރަޝިޔާގެ ކަނޑުގެ ސިފައިން ތަމްރީނުތަކެއް ކުރިއަށްގެންދިޔަ ސަކާލިން ރަށަށް ކުރެއްވި ޒިޔާރަތަށް ފަހުގަ އެވެ.

ރަޝިޔާގެ މީޑިއާތަކުން ބުނާ ގޮތުގައި، ސަކާލިންގައި ހުންނަވައިގެން ޕޫޓިން ވަނީ ރަޝިޔާގެ އިރުމަތީ ބޯޑަރުތަކުގެ ސަލާމަތާއި ރައްކާތެރިކަން ކަށަވަރުކުރުމާ ގުޅޭގޮތުން ޚާއްސަ ބައްދަލުވުމެއް ބާއްވަވާފަ އެވެ.