އެއް ލައްކަ މެންބަރުން ހަމަވި ކަމަށް ބުނެ އުފާފާޅުކުރި ޕީއެންސީގެ މެންބަރުންގެ އަދަދު އަނެއްކާވެސް ދަށަށް
20 ނޮވެމްބަރު 2026 | ހުކުރު 07:43ޕީއެންސީގެ މެންބަރުންގެ އަދަދު އެއްލައްކައަށް އެރިކަން އިއުލާނުކުރިތާ ކުޑަވަގުތުކޮޅެއްގެ ތެރޭގައި، އިލެކްޝަންސް ކޮމިޝަނުގެ ދަފްތަރުން އެ އަދަދު އަނެއްކާ ވެސް ވަނީ ދަށަށް ގޮސްފައި. މި ޓާގެޓް ހާސިލުކުރުމަށްޓަކައި ސަރުކާރުގެ ކުންފުނިތަކުގެ މުވައްޒަފުންނަށް މަޖުބޫރުކުރުމާއި، ބޮޑެތި އަދަދުތަކުން ފައިސާ ޚަރަދުކުރި ކަމުގެ ސީރިއަސް ތުހުމަތުތަކެއް ވަނީ ފެންމަތިވެފައި


ޕީއެންސީ ކޮންގްރެސްގެ ތެރެއިން | ޕީއެންސީ
ވެރިކަންކުރާ ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ދަފްތަރުގައި އެއް ލައްކަ މެންބަރުން ހަމަވެއްޖެ ކަމަށް ބުނެ ބުރާސްފަތި ދުވަހު އުފާފާޅުކޮށްފައި ވަނިކޮށް، އެ ޕާޓީގެ މެންބަރުންގެ އަދަދު އަނެއްކާ ވެސް އެއް ލައްކައިން ދަށަށް ވެއްޓިއްޖެ އެވެ.
އިލެކްޝަންސް ކޮމިޝަންގެ ވެބްސައިޓުގައިވާ މައުލޫމާތުތަކަށް ބަލާއިރު، ބުރާސްފަތި ދުވަހުގެރޭގެ ވަގުތެއްގައި ޕީއެންސީގެ މެންބަރުންގެ އަދަދު ހުރީ 100،083 ގަ އެވެ. އެއާއެކު، ޕީއެންސީން ވަނީ އެ ޕާޓީއަކީ ރާއްޖޭގެ ތާރީހުގައި ވެސް އެއް ލައްކަ މެންބަރުން ހަމަވި ފުރަތަމަ ސިޔާސީ ޕާޓީ އަދި ރާއްޖޭގެ އެންމެ މެންބަރުން ގިނަ ޕާޓީ ކަމަށް ބުނެ އުފާފާޅުކޮށްފަ އެވެ.

އީސީގެ ދަފްތަރުން މިހާރު ދައްކާ ގޮތުގައި އެ ޕާޓީގެ މެންބަރުންގެ އަދަދަކީ 99،930 | އިލެކްޝަންސް ކޮމިޝަން
ނަމަވެސް، އީސީގެ ދަފްތަރުން މިހާރު ދައްކާ ގޮތުގައި އެ ޕާޓީގެ މެންބަރުންގެ އަދަދަކީ 99،930 އެވެ. މިއާއެކު، އަނެއްކާ ވެސް ޕީއެންސީގެ މެންބަރުންގެ އަދަދު މިވަނީ އެއް ލައްކައިން ތިރިއަށް ވެއްޓިފަ އެވެ. މިއާއެކު ޖުމްލަ 153 މެންބަރުން ވަކިވެފައިވާ ކަމަށް ދައްކަ އެވެ.
ރައީސް ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގެންނެވި އިރު، ޕީއެންސީގެ ދަފްތަރުގައި ތިބީ އެންމެ 3،000 އެއްހާ މެންބަރުންނެވެ.
ސަރުކާރަށް 3 އަހަރު ފުރުމާ ދިމާކޮށް ބޭއްވި ޖަލްސާގެ ކުރިން އެ ޕާޓީގެ މެންބަރުންގެ އަދަދު އެއް ލައްކައަށް އެރުވުމަށް ގިނަ މަސައްކަތްތަކެއް ކުރި އެވެ. އެހެންނަމަވެސް، އެ ތާރީހަށް އެ އަދަދު ހަމަކުރުމަށް ކުރި މަސައްކަތް ވަނީ ނާކާމިޔާބުވެފަ އެވެ.
މީގެއިތުރުން، ޕީއެންސީއަށް މެންބަރުން އިތުރުކުރުމުގެ ތެރޭގައި ސަރުކާރު ހިއްސާވާ ކުންފުނިތަކުގެ މުވައްޒަފުންނާއި، ސިވިލް ސަރވިސްގެ މުވައްޒަފުންނަށް މަޖުބޫރުކޮށްގެން ފޯމު ފުރުވިކަމުގެ ތުހުމަތުތަކާއި ފާޑުކިޔުންތައް ވެސް ވަނީ ފެންމަތިވެފަ އެވެ.
ރާއްޖެއެމްވީ އަށް އިތުބާރު ހުރި މަސްދަރަކުން މައުލޫމާތު ދިން ގޮތުގައި އެ ޕާޓީއަށް 1 ލައްކަ މެންބަރު ހަމަ ކުރުމުގެ މަސައްކަތައް އަންގާރަ ދުވަހު ވަނީ 1 މިލިއަން ޔޫއެސް ޑޮލަރު މާރުކޮށްފަ އެވެ. މައުލޫމާތު ލިބިފައިވާ ގޮތުގައި އެ ފައިސާ ރައްޔިތުންގެ މަޖިލީހުގެ ބައެއް މެންބަރުންނަށާއި ބައެއް އެސްއޯއީތަކުގެ އިސް ފަރާތްތަކަށް ވަނީ ފޯރުކޮށްދީފަ އެވެ. އަދި މި ފައިސާ ދީފައިވަނީ ސީދާ ޕާޓީގެ ދަފްތަރަށް މެންބަރުން ވެއްދުމުގެ ޓާގެޓްތައް ހާސިލުކުރުމަށް ކަމަށް މައުލޫމާތު ލިބެ އެވެ.











