ހަނގުރާމައިގައި ހަމަލާ ދިނުމަށް ރާއްޖޭގެ ވައިގެ ސަރަހައްދު ބޭނުން ކުރުމުގެ ހުއްދަ އަށް އެދުނު ޤައުމުގެ ނަން ރައީސް އަށް އެނގިވަޑައި ނުގަންނަވާ
ރާއްޖޭގެ ވައިގެ ސަރަހައްދު ބޭނުން ކުރުމުގެ ހުއްދަ އަކަށް އެދުނު ކަމަށާއި، އެކަން ރިޖެކްޓު ކޮށްފައިވާ ކަމަށް މިނިސްޓަރު ޚަލީލް ވިދާޅުވި ނަމަވެސް، އެ ޤައުމެއްގެ ނަމާއި އެކަމުގެ މައުލޫމާތު އެމަނިކުފާނާ ހަމައަށް އައިސްފައި ނުވާ ކަމަށް ރައީސް ވިދާޅުވި.
2026 މާޗު 23 ވަނަ ދުވަހު ރައީސުލްޖުމްހޫރިއްޔާގެ އޮފީހުގައި އޮތް ނޫސްވެރިންގެ ބައްދަލުވުމުގައި ރައީސް މުޢިއްޒު ވާހަކަ ދައްކަވަނީ | ރައީސް އޮފީސް
އެމެރިކާ އާއި އިޒްރޭލް އިން އީރާންއާ ދެކޮޅަށް ކުރިއަށް ގެންދާ ހަނގުރާމައިގެ ތެރޭގައި، ރާއްޖޭގެ ވައިގެ ސަރަހައްދު ބޭނުން ކުރުމުގެ ހުއްދަ އަށް އެދުނު ޤައުމުގެ ނަން އެނގި ވަޑައި ނު ގަންނަވާ ކަމަށް ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު ވެސް ވިދާޅުވެ، އެ ޤައުމުގެ ނަން ހާމަކުރެއްވުމަށް ދެކޮޅު ހައްދަވައިފި އެވެ.
މާޗު މަހުގެ 12 ވަނަ ދުވަހު ރައީސުލްޖުމްހޫރިއްޔާގެ އޮފީހުގައި އޮތް ނޫސްވެރިންގެ ބައްދަލުވުމުގައި ފޮރިން މިނިސްޓަރު ޑޮކްޓަރު ޢަބްދުﷲ ޚަލީލް ވަނީ، ރާއްޖޭގެ ވައިގެ ސަރަހައްދު ބޭނުން ކުރުމުގެ ހުއްދަ އަށް އެދުނު ކަމަށް ހާމަ ކުރައްވައިފަ އެވެ. ނަމަވެސް، ރާއްޖެ އިން އެ ހުއްދަ ދީފައި ނުވާ ކަމަށާއި، އެއްވެސް ޤައުމަކަށް އެ ފުރުސަތު ނުދެއްވާނެ ކަމަށް ވެސް އެ ދުވަހު ޚަލީލް ވިދާޅުވި އެވެ.
އޭގެ ފަހުން އާދީއްތަ ދުވަހު އޮތް ނޫސްވެރިންގެ ބައްދަލުވުމުގައި އެއީ ކޮން ޤައުމެއްތޯ ސުވާލު ކުރުމުން، ޚަލީލް ވަނީ އެ ޤައުމު ހާމަ ކުރެއްވުމަށް އިންކާރު ކުރައްވައިފަ އެވެ. އޭގެ ބަދަލުގައި ޚަލީލް ވިދާޅުވީ، ޤައުމުތަކާ އެކު ކުރެވޭ އެކަހަލަ މުއާމަލާތް ތަކަކީ އެ ޤައުމު ތަކުގެ އިޒުނައާ އެކު ނޫނީ ހާމަކުރާ މައުލޫމާތު ތަކެއް ނޫން ކަމަށެވެ.
ހަނގުރާމައިގެ ހަމަލާ ދިނުމަށް ރާއްޖޭގެ ވައިގެ ސަރަހައްދު ބޭނުން ކުރުމުގެ ހުއްދަ އަށް އެދުނު ކަމަށް ފޮރިން މިނިސްޓަރު ޚަލީލް ވިދާޅުވެއްޖެ
ހޯމަ ދުވަހު ރައީސް މުޢިއްޒު ބޭއްވި ނޫސްވެރިންގެ ބައްދަލުވުމުގައި ރާއްޖެ ޓީވީ އިން ވަނީ، ވައިގެ ސަރަހައްދު ބޭނުން ކުރުމުގެ ހުއްދަ އަށް އެދުނު ޤައުމު ހާމަ ކޮށްދިނުމަށް ސުވާލު ކޮށްފަ އެވެ. އެގޮތުން އެމެރިކާ އާއި އިޒްރޭލް އިން ހަނގުރާމަ ކުރަމުން އަންނައިރު، އިޒްރޭލް އަކީ ރާއްޖެ އިން އެއްވެސް ގުޅުމެއް ބާއްވާ ޤައުމަކަށް ނުވާއިރު، ދެން އޮތީ އެމެރިކާ ކަމަށާއި، އެ ހުއްދަ އަށް އެދުނީ އެމެރިކާ އިންތޯ ސުވާލު ކޮށްފައިވެ އެވެ.
އެ ސުވާލަށް ޖަވާބު ދެއްވަމުން ރައީސް މުޢިއްޒު ވިދާޅުވީ، ރާއްޖޭގެ ވައިގެ ސަރަހައްދު ބޭނުން ކުރުމުގެ ހުއްދަ އަށް އެދުނީ ކޮން ޤައުމެއްކަން އެނގި ވަޑައި ނުގަންނަވާ ކަމަށެވެ. މީގެ އިތުރުން ރާއްޖޭގެ ވައިގެ ސަރަހައްދު ބޭނުން ކުރުމުގެ ހުއްދަ އަކަށް އެދުނު ކަމަށާއި، އެކަން ރިޖެކްޓު ކޮށްފައިވާ ކަމަށް މިނިސްޓަރު ޚަލީލް ވިދާޅުވި ނަމަވެސް، އެ ޤައުމެއްގެ ނަމާއި އެކަމުގެ މައުލޫމާތު އެމަނިކުފާނާ ހަމައަށް އައިސްފައި ނުވާ ކަމަށް ރައީސް ވިދާޅުވި އެވެ.
އެމެރިކާ އާއި އިޒްރޭލް އިން އީރާންއާ ދެކޮޅަށް ކުރިއަށް ގެންދާ ހަނގުރާމައިގައި، ރާއްޖެ އިން ވަނީ އެމެރިކާ އާއި އިޒްރޭލްގެ ހަމަލާތައް ކުށްވެރި ކުރުމަށް ވެސް ފަސް ޖެހިފަ އެވެ. އެގޮތުން މާޗު މަހުގެ ދެ ވަނަ ދުވަހު އޮތް ނޫސްވެރިންގެ ބައްދަލުވުމުގައި ރައީސް މުޢިއްޒު ވިދާޅުވެފައި ވަނީ، ރާއްޖެ އޮންނާނީ އަރަބި އަދި އިސްލާމީ ޤައުމުތަކާ އެކު އެއް ބްލޮކެއްގައި ކަމަށެވެ.
ރައީސް އެހެން ވިދާޅުވެފައިވާއިރު، އެމެރިކާ އާއި އިޒްރޭލް އިން އީރާންއާ ދެކޮޅަށް ކުރިއަށް ގެންދާ ހަނގުރާމައިގައި އަރަބި އަދި އިސްލާމީ ޤައުމު ތަކުން ވަނީ އީރާން ކުށްވެރި ކޮށްފަ އެވެ. އެމެރިކާ އާއި އިޒްރޭލް އިން ދިން ހަމަލާތައް ކުށްވެރި ކުރުމުގެ ބަދަލުގައި، އެ ޤައުމު ތަކުން ކުށްވެރި ކޮށްފައި ވަނީ ރައްދުގައި އީރާން އިން ދެމުން އަންނަ ހަމަލާ ތަކެވެ. އަދި އެ ޤައުމު ތަކުން ވަނީ އީރާންއާ ދެކޮޅަށް އިންޒާރު ވެސް ދީފަ އެވެ.
