ހުއްދައާ އެކު ހޮރްމޫޒް ކަނޑު އޮޅިން ދަތުރު ކުރެވޭނެ، ބަންދު ކުރީ ދުޝްމަނުންނަށް އެކަނި: އީރާން

އީރާންގެ ހުއްދައާ އެކު ބޭރުގެ އުޅަނދު ފަހަރަށް ހޮރްމޫޒް ކަނޑު އޮޅިން ދަތުރު ކުރެވޭނެ ކަމަށް، އިންޓަނޭޝަނަލް މެރިޓައިމް އޯގަނައިޒޭޝަން (އައިއެމްއޯ) އަށް އީރާން އިން ކަނޑަ އަޅާފައި ހުންނަވާ މަންދޫބު އަލީ މޫސަވީ ވިދާޅުވެއްޖެ އެވެ.

މޫސަވީ މިހެން ވިދާޅުވީ ސަލާމަތީ އަދި ރައްކާތެރި ކަމުގެ ފިޔަވަޅުތަކާ ބެހޭ ގޮތުން އީރާން ސަރުކާރާ އެކު ވިލަރެސްކޮށްގެން ބޭރުގެ އުޅަނދު ފަހަރަށް އެ ސަރަހައްދުން ދަތުރު ކުރުމުގެ ފުރުސަތު އަދި ވެސް އޮތްކަން ހާމަ ކުރައްވަމުންނެވެ. 

އިނގިރޭސިވިލާތަށް އީރާން އިން ކަނޑަ އަޅާފަފައި ހުންނަވާ ސަފީރުގެ މަގާމު ވެސް ފުރުއްވަމުން ގެންދަވާ މޫސަވީ، އީރާންގެ މެހެރު ނިއުސް އެޖެންސީ އަށް ދެއްވި ބަސްދީ ގަތުމެއްގައި ވިދާޅުވީ ބައިނަލްއަޤުވާމީ ގޮތުން އުފުލަން ޖެހޭ ޒިންމާތަކާ އެކު، އީރާންގެ ސަރަހައްދީ ނަޒާހަތްތެރިކަމަށާއި، އެ ޤައުމުގެ ޙައްގު ތަކަށް ވެސް އިޙުތިރާމް ކުރަން ޖެހޭނެ ކަމަށެވެ.

ކަނޑު ދަތުރު ފަތުރުގެ ރައްކާތެރިކަން އިތުރު ކުރުމަށާއި، ކަނޑު ފަޅުގައި މަސައްކަތް ކުރާ މީހުންގެ ހިމާޔަތުގައި އައިއެމްއޯ އާއި އެހެނިހެން ޤައުމުތަކާ އެކު ގުޅިގެން މަސައްކަތް ކުރުމަށް އީރާން އޮތީ ތައްޔާރަށް ކަމަށް ވެސް މޫސަވީ ވަނީ ވިދާޅުވެފަ އެވެ.

މޫސަވީ އިތުރަށް ވިދާޅުވި ގޮތުގައި ހޮރްމޫޒް ކަނޑު އޮޅި ބަންދު ކުރެވިފައި ވަނީ ހަމައެކަނި އީރާންގެ ދުޝްމަނުންނަށެވެ. އަދި ގަލްފު ސަރަހައްދާއި، ހޮރްމޫޒް ކަނޑު އޮޅީގައި މިހާރު އުފެދިފައިވާ ނުތަނަވަސްކަމުގެ އަސްލަކީ އެމެރިކާ އާއި އިޒްރޭލް އިން ކުރަމުން އަންނަ ހަނގުރާމަ ކަމަށް ވެސް އޭނާ ތުހުމަތު ކުރެއްވި އެވެ. 

ދުނިޔޭގެ ތެލުގެ ވިޔަފާރީގައި މުހިންމު ދައުރެއް އަދާ ކުރާ ހޮރްމޫޒް ކަނޑު އޮޅީގެ ސަލާމަތީ ކަންކަމާ ގުޅޭ ގޮތުން އީރާން އިން މި މޭރުމުން ވާހަކަ ދައްކާފައި މި ވަނީ، އެ ސަރަހައްދުގެ މަސްރަހު ވަރަށް ބޮޑަށް ހޫނުވެފައިވާ ވަގުތެއްގަ އެވެ.