ހަނގުރާމަ ހުއްޓާ ނުލައި، ދުޝްމަނުން ފުނޑު ފުނޑު ކޮށްލަން ޖެހޭ: އިޒްރޭލްގެ ސެކިއުރިޓީ މިނިސްޓަރު

އެމެރިކާ އާއި އިޒްރޭލް އިން އީރާންއާ ދެކޮޅަށް ކުރިއަށް ގެންދާ ހަނގުރާމަ ހުއްޓާ ނުލައި، އީރާން ފުނޑު ފުނޑު ކޮށްލަން ޖެހޭ ކަމަށް އިޒްރޭލްގެ ސެކިއުރިޓީ މިނިސްޓަރު އިޓަމާ ބެން ގްވީރު ވިދާޅުވެއްޖެ އެވެ. 

އީރާން އިން އިޒްރޭލްގެ އަރާދު ސަރަހައްދަށް އަމާޒުކޮށް ހަމަލާ ތަކެއް ދީފައިވާއިރު، ބެން ގްވީރު ވަނީ އެ ސަރަހައްދަށް ޒިޔާރާތް ކޮށްފަ އެވެ. އެ ސަރަހައްދުގެ ޙާލަތު ބައްލަވައިލެއްވުމަށް ކުރެއްވި ޒިޔާރަތަށް ފަހު ބެން ގްވީރު ވިދާޅުވީ، އޭނާ އެ ސަރަހައްދަށް ވަޑައިގެންނެވީ އެ ސަރަހައްދުގެ ރައްޔިތުންނަށް ހިތްވަރުދީ، އިޒްރޭލްގެ ސަރުކާރުން އޮތީ އެމީހުންނާ އެކުކަން ހާމަ ކުރުމަށް ކަމަށެވެ. 

އިޒްރޭލްގެ ރައްޔިތުންނަކީ ވަރަށް ވަރުގަދަ އަދި އެހާމެ އަޒުމު ވަރުގަދަ ބައެއް ކަމަށް ވެސް ބެން ގްވީރު ވަނީ ވިދާޅުވެފަ އެވެ. އަދި އިޒްރޭލްގެ ރައްޔިތުން ތިބީ ވަރަށް ސާބިތުކަމާ އެކު ކަމަށް ވެސް އޭނާ ވިދާޅުވި އެވެ. 

މީގެ އިތުރުން ބެން ގްވީރު ވިދާޅުވީ އިޒްރޭލްގެ ދުޝްމަނުން މަސައްކަތް ކުރަނީ އެ ޤައުމަށް ގެއްލުން ދިނުމަށް ކަމަށެވެ. ނަމަވެސް، އިޒްރޭލް އޮތީ ހަނގުރާމައެއްގެ ތެރޭގައިކަން ހަނދާން ކުރަން ޖެހޭ ކަމަށާއި، އެ ހަނގުރާމަ ކާމިޔާބު ކުރުމަށްޓަކައި ހުއްޓުމެއް ނެތް ހަމަލާ ތަކެއްދީ، ދުޝްމަނުން ފުނޑު ފުނޑު ކޮށްލަން ޖެހޭ ކަމަށް ވެސް ބެން ގްވީރު ވިދާޅުވި އެވެ. 

އިޒްރޭލްގެ ހަމަލާ ތަކަށް ރައްދު ދިނުމުގެ ގޮތުން އީރާން އިން ވެސް ގެންދަނީ ވަރުގަދަ ހަމަލާ ތަކެއް ދެމުންނެވެ. އެ ހަމަލާތަކާ ގުޅިގެން އިޒްރޭލްގެ ހަރުކަށި ފިކުރުގެ މިނިސްޓަރުން ގެންދަވަނީ ވަރަށް ވަރުގަދަ އިންޒާރުތައް ދެއްވަމުންނެވެ. އެގޮތުން ބެން ގްވީރުގެ މި ވާހަކަ ތަކަކީ ވެސް ހަނގުރާމަ އިތުރަށް ފުޅާކޮށް، އަސްކަރީ ގޮތުން ވަރުގަދަ ފިޔަވަޅު ތަކެއް އެޅުމަށް ސަރުކާރަށް ބާރު އެޅުމުގެ ގޮތުން ދެއްކެވި ވާހަކައެއް ކަމަށް މަސްރަހު ދިރާސާ ކުރާ ފަރާތް ތަކުން ފާހަގަ ކުރެ އެވެ. 

އިޒްރޭލްގެ ސަލާމަތީ ކަންކަމާ ބެހޭ މިނިސްޓަރު މި މޭރުމުން ވާހަކަ ދައްކަވާފައި މި ވަނީ، މެދު އިރުމަތީގެ މަސްރަހު ވަނީ ބޮޑު ނުތަނަވަސް ކަމެއްގެ ތެރޭގައި އެވެ.