ޓްރަމްޕް އަކީ އަމިއްލަ އަށް ވާހަކަ ދެއްކޭނެ މީހެއް، އަހަރަމެން ޖަވާބު ދޭކަށް ނުޖެހޭނެ: އިނގިރޭސިވިލާތުގެ ހައުސިން ސެކްރެޓަރީ

އެމެރިކާގެ ރައީސް ޑޮނަލްޑް ޓްރަމްޕް އަކީ އަމިއްލަފުޅަށް ވާހަކަ ދެއްކެވޭނެ ބޭފުޅެއް ކަމަށާއި، ޓްރަމްޕްގެ ވާހަކަތަކާ ގުޅިގެން އިނގިރޭސިވިލާތުން ޖަވާބުދާރީ ވާން ނުޖެހޭނެ ކަމަށް، އެ ޤައުމުގެ ހައުސިންގ ސެކްރެޓަރީ ސްޓީވް ރީޑް ވިދާޅުވެއްޖެ އެވެ.

މީޑިއާތަކާ ވާހަކަ ދައްކަވަމުން އިނގިރޭސިވިލާތުގެ ހައުސިންގ ސެކްރެޓަރީ މިހެން ވިދާޅުވީ، ކުރިއަށް އޮތް 48 ގަޑިއިރުގެ ތެރޭގައި އީރާން އިން ހޮރްމޫޒް ކަނޑު އޮޅި މުޅިން އެއްކޮށް ހުޅުވާ ނުލައިފި ނަމަ، އެ ޤައުމުގެ ކަރަންޓު އުފައްދާ މަރުކަޒު ތަކަށް ހަމަލާދީ، އެ ތަންތަން ނައްތާލާނެ ކަމުގެ އިންޒާރު ޓްރަމްޕް ދެއްވާފައި ވަނިކޮށެވެ. 

އެކަމާ ގުޅޭ ގޮތުން ހައުސިންގ ސެކްރެޓަރީ ސްޓީވް ރީޑް ވިދާޅުވީ، ޓްރަމްޕް އަކީ އަމިއްލަފުޅަށް ވާހަކަ ދެއްކެވުމުގެ ޤާބިލުކަން ހުރި ބޭފުޅެއް ކަމަށެވެ. އަދި ޓްރަމްޕް ދައްކަވާ ވާހަކަ ތަަކަށް އިނގިރޭސިވިލާތުގެ ސަރުކާރުން ޖަވާބުދާރީ ވާން ނުޖެހޭނެ ކަމަށް ވެސް އޭނާ ވަނީ ވިދާޅުވެފަ އެވެ. 

އިނގިރޭސި ސަރުކާރުގެ ސިޔާސަތު ހާމަ ކުރައްވަމުން ރީޑް ވިދާޅުވީ، އިނގިރޭސިވިލާތުން އެއްވެސް ހަނގުރާމައެއްގެ ތެރެއަށް ނުވަންނާނެ ކަމަށާއި، އެ ފުުރުސަތު ވެސް ނުދޭނެ ކަމަށެވެ. ނަމަވެސް، ޤައުމުގެ މަަސްލަޙަތު ހިމާޔަތް ކުރުމުގައި ދެމި އޮންނާނެ ކަމަށާއި، މެދު އިރުމަތީގެ މަސްރަޙު ފިނި ކުރުމަށްޓަކައި ބައިނަލްއަޤުވާމީ ބައިވެރިންނާ ގުޅިގެން މަސައްކަތް ކުރަމުންދާނެ ކަމަށް ވެސް އޭނާ ވަނީ ފާހަގަ ކުރައްވައިފަ އެވެ. 

މީގެ އިތުރުން އިނގިރޭސިވިލާތުގެ އަމާޒަކީ ސަރަހައްދީ ހަމަޖެހުން ޤާއިމު ކުރުން ކަމަށާއި، ހަމަޖެހުންތައް އިތުރަށް ގޯސް ވިޔަ ނުދިނުމަށް ޓަކައި ޑިޕްލޮމެޓިކް އުސޫލުން މަސައްކަތްތައް ކުރިއަށް ގެންދާނެ ކަމަށް ވެސް ރީޑް ވަނީ ވިދާޅުވެފަ އެވެ. ޓްރަމްޕްގެ އިންޒާރުތަކާ އެކު، މެދު އިރުމަތީގައި ބޮޑު ހަނގުރާމައެއް ފެށިދާނެ ކަމުގެ ބިޑު އިންތިހާ އަށް ބޮޑުވެފައިވާ ދަނޑިވަޅެއްގައި، އިނގިރޭސިވިލާތުން މި ވަނީ އެ ޤައުމުން އިސްކަން ދޭނީ ސުލްޙަވެރިކަން އިސް ކުރުމަށް ކަމަށް ހާމަ ކޮށްފަ އެވެ. 

އީރާން އާއި އެމެރިކާއާ ދެމެދު އޮތް ނުތަނަވަސްކަން އިތުރުވެފައި ވަނީ، ދުނިޔޭގެ ތެލުގެ ވިޔަފާރީގެ މުހިންމު މަގަކަށްވާ ހޮރްމޫޒް ކަނޑު އޮޅި ބަންދު ކުރުމާ ގުޅިގެންނެވެ.