އީރާން އިން ސައުދީ އަށް ދިން ހަމަލާތައް ފަލަސްޠީނުން ކުށްވެރި ކޮށްފި

އެމެރިކާ އާއި އިޒްރޭލް އިން އީރާންއާ ދެކޮޅަށް ކުރަމުން އަންނަ ހަނގުރާމައިގެ ރައްދުގައި އީރާން އިން ސައުދީ އަރަބިއްޔާ އާއި މެދު އިރުމަތީގައި ހުރި އެމެރިކާގެ ބޭސް ތަކަށް އަމާޒުކޮށް ހަމަލާ ދެމުން އަންނައިރު، ސައުދީ އަރަބިއްޔާ އަށް ދީފައިވާ ހަމަލާތައް ކުށްވެރި ކުރާ ކަމަށް ފަލަސްޠީނުން ހާމަ ކޮށްފި އެވެ. 

މިކަން ހާމަ ކޮށްފައި ވަނީ ފަލަސްޠީނުގެ އިންޓީރިއާ މިނިސްޓަރު ޒިޔާދު ހަބް އައްރީހް އާއި، ސައުދީ އަރަބިއްޔާގެ އިންޓީރިއާ މިނިސްޓަރު ޕްރިން ޢަބްދުލް ޢަޒީޒް ބިން ސައުދު ނާއިފް ފޯނުން ގުޅުއްވައި ދެއްކެވި ވާހަކައިގަ އެވެ. އެ ފޯނު ކޯލުގައި ދެ ބޭފުޅުން ވަނީ މެދު އިރުމަތީގެ ސަރަހައްދުގައި މިހާރު ހިނގަމުން އަންނަ ކަންތައްތަކާ ގުޅޭ ގޮތުން މަޝްވަރާ ކުރައްވައިފަ އެވެ. 

ސައުދީގެ ޕްރެސް އެޖެންސީ އިން ބުނެފައިވާ ގޮތުގައި، އެ ފޯނު ކޯލުގައި ފަލަސްޠީނުގެ އިންޓީރިއާ މިނިސްޓަރު ވަނީ އިސްލާމީ ޤައުމު ތަކަށާާއި ސަރަހައްދަށް އީރާން އިން ދެމުން ގެންދާ ހަމަލާތަކާ ދެކޮޅު ކަމަށް ހާމަ ކުރައްވައިފަ އެވެ. އަދި އީރާންގެ އަމަލުތައް ފަލަސްޠީނުން ކުށްވެރި ކުރާ ކަމަށް އިންޓީރިއާ މިނިސްޓަރު ވިދާޅުވެފައިވާ ކަމަށް ޕްރެސް އެޖެންސީ އިން ވަނީ ބުނެފަ އެވެ. 

އެމެރިކާ އާއި އިޒްރޭލް އިން އީރާާންއާ ދެކޮޅަށް ހަނގުރާމަ ފެށި ފަހުން، އީރާން އިން ގެންދަނީ މެދު އިރުމަތީގެ ސަރަހައްދުގައި ހުރި އެމެރިކާގެ އަސްކަރީ ބޭސް ތަކަށް އަމާޒުކޮށް ހަމަލާ ދެމުންނެވެ. އެ ހަމަލާތައް ހުއްޓުވަން މަސައްކަތް ކުރުމުގެ ތެރޭގައި، ބައެއް ޤައުމު ތަކުގެ އެކި އެކި ސަރަހައްދު ތަކަށް ހަމަލާ އަމާޒުވެފައިވެ އެވެ.