އީރާނުގެ ބަސީޖް ފޯސްގެ ޑެޕިއުޓީ ކޮމާންޑަރު އަވަހާރަ ކޮށްލައިފި

އީރާންގެ ބަސީޖް ފޯސްގެ ޑެޕިއުޓީ ކޮމާންޑަރު އަޒީމް އިސްމާއީލީ އަވަހާރަ ކޮށްލާފައިވާ ކަމަށް އަލް އަރަބިއްޔާ އިން ރިޕޯޓު ކޮށްފި އެވެ.

ހޮނިހިރު ދުވަހު އަލް އަރަބިއްޔާ އިން މި ޚަބަރު ރިޕޯޓު ކޮށްފައި ވަނީ އީރާންގެ މީޑިއާތަކާ ހަވާލާދީ އެވެ. 

މިދިޔަ ފެބްރުވަރީ މަހުގެ 28 ވަނަ ދުވަހުން ފެށިގެން އެމެރިކާ އާއި އިޒްރޭލް އިން ދަނީ އީރާނާ ދެކޮޅަށް ވަރުގަދަ ހަމަލާ ތަކެއް ދެމުންނެވެ. އެ ހަމަލާ ތަކުގައި އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއަރުޖީސީ) އާއި ބަސީޖް ފޯސްގެ އިތުރުން، އަސްކަރީ އިސް ކޮމާންޑަރުންނާއި، ސިޔާސީ ލީޑަރުންނަށް އަމާޒުކޮށް ދެމުން އަންނަ ހަމަލާތައް ވަނީ އިތުރު ކޮށްފަ އެވެ. 

އަޒީމް އިސްމާއީލީ އަވަހާރަ ކޮށްލާފައި މިވަނީ އީރާންގެ އަސްކަރީ އަދި ސިޔާސީ އިސް ފަރާތްތައް ނައްތާލުމަށް އިޒްރޭލް އާއި އެމެރިކާ އިން ހިންގަމުން އަންނަ ޚާއްސަ އޮޕަރޭޝަންގެ ތެރެއިންނެވެ. މިހާތަނަށް މި ހަމަލާ ތަކުުގައި އީރާންގެ އަސްކަރިއްޔާގެ ގިނަ އަދަދެއްގެ އިސްވެރިން ވަނީ އަވަހާރަ ކޮށްލައިފަ އެވެ. 

ބަސީޖް ފޯސް އަކީ އީރާންގެ އިސްލާމިކް ރިވޮލިއުޝަނަރީ ގާޑް ކޯޕްސްގެ ދަށުން ހިންގާ، އެ ޤައުމުގެ ދާޚިލީ ސަލާމަތާއި އަސްކަރީ ކަންކަމުގައި މުހިންމު ދައުރެއް އަދާ ކުރާ ފައުޖެކެވެ. މަސްރަހު ދިރާސާ ކުރާ ފަރާތް ތަކުން ބުނާ ގޮތުގައި މި ފައުޖުގެ ޑެޕިއުޓީ ކޮމާންޑާރު އަވަހާރަ ކޮށްލުމަކީ އީރާންގެ އަސްކަރީ އޮނިގަނޑަށް ލިބުނު ގެއްލުމަކަށް ވާނެ އެވެ.