ސައުދީގެ ވަލީ އަހުދު މުޙައްމަދާއި، މިޞްރުގެ ރައީސް އައް ސީސީ އީރާންއާ ދެކޮޅަށް އިންޒާރެއް ދެއްވައިފި

ސައުދީީ އަރަބިއްޔާގެ ވަލީ އަހުދު މުޙައްމަދު ބިން ސަލްމާން އާއި، މިޞްރުގެ ރައީސް ޢަބްދުލް ފައްތާޙު އައް ސީސީ ބައްދަލު ކުރައްވައި، ގަލްފުގެ ޤައުމު ތަކަށް އަމާޒުކޮށް އީރާން އިން ދެމުންދާ ހަމަލާ ތަކަކީ މުޅި ސަރަހައްދުގެ ހަމަ ޖެހުމަށް އޮތް ނުރައްކަލެއް ކަމަށް ވިދާޅުވެ، އިންޒާރު ދެއްވައިފި އެވެ.

ސައުދީގެ ޕްރެސް އެޖެންސީ އިން ބުނެފައިވާ ގޮތުގައި މުޙައްމަދު ބިން ސަލްމާން އާއި އައް ސީސީ ބައްދަލު ކުރައްވާފައި ވަނީ ސައުދީ އަރަބިއްޔާގެ ޖިއްދާގަ އެވެ. ހޮނިހިރު ދުވަހު ކުރިއަށް ގެންދިޔަ މި ބައްދަލު ކުރެއްވުމުގައި ދެ ބޭފުޅުން ވަނީ، މެދު އިރުމަތީގެ ސަރަހައްދުގައި މިހާރު ހިނގަމުން އަންނަ ހަމަ ނުޖެހުންތަކާއި، އޭގެ ސަބަބުން ސަރަހައްދީ އަދި ބައިނަލްއަޤުވާމީ ސަލާމަތަށް ކުރާނެ އަސަރުތަކާ ގުޅޭ ގޮތުން ފުޅާ ދާއިރާއެއްގައި މަޝްވަރާ ކުރައްވައިފަ އެވެ. 

އެ ބައްދަލު ކުރެއްވުުމުގައި ދެ ޤައުމުގެ ލީޑަރުން ވަނީ ގަލްފު ކޯޕަރޭޝަން ކައުންސިލް (ޖީސީސީ)ގެ ޤައުމު ތަކަށާއި، އެ ޤައުމު ތަކުގެ މުހިންމު އުމްރާނީ ވަސީލަތް ތަކަަށް އަމާޒުކޮށް އީރާން އިން ތަކުރާރުކޮށް ދެމުންދާ ހަމަލާ ތަކަކީ، ނުރައްކާތެރި ކަމެއްގެ ގޮތުގައި ސިފަ ކުރައްވައިފަ އެވެ. އަދި މިފަދަ އަމަލު ތަކުގެ ސަބަބުން ސަރަހައްދުގެ ރައްކާތެރިކަމާއި، ހަމަޖެހުމަށް ބޮޑެތި ގޮން ޖެހުން ތަކެއް ކުރިމަތިވަމުންދާ ކަމަށް ދެ ބޭފުޅުން ވަނީ ފާހަގަ ކުރައްވައިފަ އެވެ.

މީގެ އިތުރުން މިޞްރުގެ ރައީސް އައް ސީސީ ވަނީ ސައުދީ އަރަބިއްޔާ އަށާއި، ސަރަހައްދުގެ އެހެން ޤައުމު ތަަކަށް އަމާޒުކޮށް އީރާން އިން ދޭ ހަމަލާތައް ހަރުކަށި އިބާރާތުން ކުށްވެރި ވެސް ކުރައްވައިފަ އެވެ. އަދި ހަމަ އެހެންމެ، ސައުދީގެ އިސްތިޤުލާލަށާއި، ސަލާމަތަށް ކުރިމަތިވާ ކޮންމެ ނުރައްކަލަކާ ދެކޮޅަށް އެ ޤައުމާ އެކު ސާބިތުކަމާ އެކު މިޞްރު ދެމި އޮންނާނެ ކަމުގެ ޔަޤީންކަން، އައް ސީސީ ވަނީ ވަލީ އަހުދު މުޙައްމަދު ބިން ސަލްމާން އަށް ދެއްވައިފަ އެވެ.

މިޞްރުގެ ރައީސް އައް ސީސީ، ސައުދީ އަރަބިއްޔާ އަށް ކުރެއްވި ދަތުރުފުޅަކީ ސަރަހައްދީ މަސްލަހަތު ހިމާޔަތް ކުރުމަށާއި، ގަލްފުގެ ޤައުމުތަކާ އެކު އޮތް ގުޅުން ބަދަހި ކުރުމަށް ފެށްޓެވި ދަތުރުގެ ތެރެއިން ކުރެއްވި ޒިޔާރަތެއް ކަމަށް ބުނެފައިވެ އެވެ. ސައުދީ އަށް ވަޑައިގެންނެވުމުގެ ކުރިން މިޞްރުގެ ރައީސް އައް ސީސީ ވަނީ ބަހްރެއިން އަށް ވަޑައިގެން، އެ ޤައުމުގެ ރަސްގެފާނު ޙަމަދު ބިން އީސާ އަލް ޚަލީފާއާ ވެސް ބައްދަލު ކުރައްވައިފަ އެވެ.