އިނގިރޭސިވިލާތަށް ހަމަލާ ދެވޭ ފެންވަރުގެ މިސައިލް އީރާން އަތުގައި ހުރި ކަމުގެ އިންޒާރު، ބޮޑު ވަޒީރު ސްޓާމާ އަށް ދީފި

އީރާން އިން އުފައްދާފައިވާ ދުރު ރާސްތާގެ މިސައިލް ތަކުން މިހާރު، އިނގިރޭސިވިލާތުގެ ވެރި ރަށް ލަންޑަން އަށް ހަމަލާ ދިނުމުގެ ޤާބިލުކަން ލިބިފައިވާ ކަމުގެ އިންޒާރު، އިނގިރޭސިވިލާތުގެ ބޮޑު ވަޒީރު ކިއާ ސްޓާމާ އަށް ދީފި އެވެ. 

މި އިންޒާރު ދީފައި ވަނީ ޗާގޯސް ޖަޒީރާގައި އޮންނަ ޑިއޭގޯ ގާސިއާގައި ހުންނަ އިނގިރޭސިވިލާތާއި އެމެރިކާގެ އަސްކަރީ މަރުކަޒަށް އަމާޒުކޮށް އީރާން އިން މިސައިލް ހަމަލާ ތަކެއް ދީފައިވާ ކަމުގެ ރިޕޯޓުތައް އައިސްފައި ވަނިކޮށެވެ. ނަމަވެސް، އީރާންގެ އިސް އޮފިޝަލަކު އަލް ޖަޒީރާ އަށް ވިދާޅުވެފައި ވަނީ، އެ ޤައުމުން އެފަދަ ހަމަލާއެއް ދީފައި ނުވާ ކަމަށެވެ. 

އިޒްރޭލްގެ ޑިފެންސް ފޯސް (އައިޑީއެފް) އިން ބުނެފައިވާ ގޮތުގައި، އެ ހަމަލާ އިން ދޭހަ ވަނީ އީރާންގެ ޓެރަރިސްޓު ސަރުކާރަކީ މުޅި ދުނިޔެ އަށް އޮތް ނުރައްކަލެއް ކަމަށެވެ. އަދި އެ ޤައުމުގެ މިސައިލްތައް މިހާރު އިނގިރޭސިވިލާތުގެ ވެރި ރަށް ލަންޑަންގެ އިތުރުން، ފްރާންސްގެ ވެރި ރަށް ޕެރިހާއި، ޖަރުމަނުގެ ވެރި ރަށް ބާލިން އަދި ޔޫރަޕުގެ ބޮޑެތި ސިޓީ ތަކަށް ވެސް ފޯރާނެ ކަމަށް އައިޑީއެފް އިން ބުނެފައިވެ އެވެ. 

ޑިއޭގޯ ގާސިއާ އަކީ އެމެރިކާ އިން މެދު އިރުމަތީގައި ހިންގާ އަސްކަރީ އޮޕަރޭޝަން ތަކުގައި ބޭނުން ކުރާ މުހިންމު މަރުކަޒެކެވެ. އެ ތަނުގައި ބޮޑު އެއާ ފީލްޑަކާއި، ތެޔޮ ރައްކާ ކުރާ ނިޒާމު ތަކާއިި، ރާޑަރު ތަކުގެ އިތުރުން ފުން ކަނޑުގެ ބަނދަރެއް އޮވެ އެވެ. އެ ރަށުގައި ގާތް ގަނޑަކަށް 2500 އެއްހާ ސިފައިން ހަރަކާތްތެރިވާއިރު، އޭގެ ތެރޭގައި ގިނައީ އެމެރިކާގެ ސިފައިންނެވެ. 

އިނގިރޭސިވިލާތުގެ ފޮރިން ސެކްރެޓަރީ އިވެޓް ކޫޕާ ވަނީ، އީރާން އިން ހަމަލާ ހަރުކަށި އިބާރާތުން ކުށްވެރި ކުރައްވާ ކަމަށް ވިދާޅުވެފަ އެވެ. ނަމަވެސް، އީރާން އަށް އަމާޒުކޮށް އެމެރިކާ އިން ދެމުންދާ ހަމަލާ ތަކުގައި އިނގިރޭސިވިލާތުން ބައިވެރި ނުވާ ކަމަށް އޭނާ ވިދާޅުވި އެވެ. ކޫޕާ ވިދާޅުވީ، އިނގިރޭސިވިލާތުގެ އަމާޒަކީ މި ހަމަ ނުޖެހުން ތަކަށް ވީހާ ވެސް އަވަހަކަށް ޙައްލެއް ހޯދުން ކަމަށާއި، އިނގިރޭސި ސިފައިން ޙަރަކާތްތެރި ވަނީ ހަމައެކަނި ދިފާއީ ކަންކަމުގައި ކަމަށެވެ. 

އެ ހަމަލާތައް ދީފައިވާ ކަމަށް ރިޕޯޓު ކޮށްފައިވާއިރު، އިނގިރޭސިވިލާތުގެ އިދިކޮޅު ފަރާތް ތަކުން އަންނަނީ ބޮޑު ވަޒީރު ސްޓާމާ އާއި، ސަރުކާރަށް ވަރަށް ބޮޑަށް ފާޑު ކިޔަމުންނެވެ.