ޑިއޭގޯ ގާސިއާ އަށް އަމާޒުކޮށް ހަމަލާ ނުދޭ ކަމަށް އީރާން އިން ބުނެފި
އާދީއްތަ ދުވަހު އީރާންގެ އިސް އޮފިޝަލަކު އަލް ޖަޒީރާ އަށް މައުލޫމާތު ދެއްވަމުން ވިދާޅުވީ، ޑިއޭގޯ ގާސިއާ މަރުކަޒަށް ދިން ހަމަލާ ތަކުގެ ޒިންމާ އެ ޤައުމުން ނުއުފުލާނެ ކަމަށް. އަދި އެއީ އީރާން އިން ކުރި ކަމެއް ނޫން ކަމަށް ވެސް އެ އޮފިޝަލު ވަނީ ވިދާޅުވެފައި.
އިންޑިއާ ކަނޑުގެ މެދުގައި އޮންނަ ޗާގޯސް އާކިޕެލާގޯގެ ނުވަތަ ފޯޅަވަހީގެ އެންމެ ބޮޑު ރަށް ކަމަށްވާ ޑިއޭގޯ ގާސިއާ، މި ރަށުގައި އެމެރިކާގެ އަސްކަރީ މުހިންމު ބޭހެއް ގާއިމު ކޮށްފައިވޭ | ރޮއިޓާސް
އިންޑިއާ ކަނޑުގައި އޮންނަ ޑިއޭގޯ ގާސިއާގައި ހުންނަ އަސްކަރީ މަރުކަޒަށް އަމާޒުކޮށް ދިން މިސައިލް ހަމަލާ ތަކުގެ ފަހަތުގައި އޮތީ އެ ޤައުމު ނޫން ކަމަށް، އީރާން އިން ބުނެފި އެވެ.
އާދީއްތަ ދުވަހު އީރާންގެ އިސް އޮފިޝަލަކު އަލް ޖަޒީރާ އަށް މައުލޫމާތު ދެއްވަމުން ވިދާޅުވީ، ޑިއޭގޯ ގާސިއާ މަރުކަޒަށް ދިން ހަމަލާ ތަކުގެ ޒިންމާ އެ ޤައުމުން ނުއުފުލާނެ ކަމަށެވެ. އަދި އެއީ އީރާން އިން ކުރި ކަމެއް ނޫން ކަމަށް ވެސް އެ އޮފިޝަލު ވަނީ ވިދާޅުވެފަ އެވެ.
އީރާން އިން މިކަން ދޮގު ކޮށްފައިވާއިރު، މިދިޔަ ހުކުރު ދުވަހުގެ ރޭ އެމެރިކާގެ ވޯލް ސްޓްރީޓް ޖާނަލްގައި ބުނެފައި ވަނީ، ޑިއޭގޯ ގާސިއާ އަށް އަމާޒުކޮށް އީރާން އިން ހަމަލާ ދީފައިވާ ކަމަށެވެ. އެ ރިޕޯޓުގައި ބުނެފައި ވަނީ، އީރާން އިން ދެ މިސައިލެއް ފޮނުވާލި ނަމަވެސް، އޭގެ ތެރެއިން އެއްވެސް ހަމަލާއެއް އެ މަރުކަޒަށް އަރާފައި ނުވާ ކަމަށެވެ.
މިކަމާ ގުޅިގެން ބައެއް ނޫސް މީޑިއާ ތަކުން ވަނީ އެމެރިކާގެ ސެކްރެޓެރީ އޮފް ވޯ އާއި، ޕެންޓަގަންގެ ބަހެއް ހޯދުމަށް މަސައްކަތް ކޮށްފަ އެވެ. ނަމަވެސް، މިހާތަނަށް އެ އިދާރާ ތަކުން ވަކި އެއްޗެއް ބުނެފައި ނުވެ އެވެ. އެމެރިކާގެ އިތުރުން އިނގިރޭސިވިލާތުން ވެސް މިކަމުގައި ވަކި އެއްޗެއް ބުނެފައި ނުވެ އެވެ.
އީރާނުން ޑިއޭގޯ ގާސިއާ އަށް އަމާޒުކޮށް ހަމަލާ ދީފި
ޑިއޭގޯ ގާސިއާ އަކީ، އީރާންއާ ދެކޮޅަށް ކުރިއަށް ގެންދާ ހަނގުރާމަ އާއި އަސްކަރީ ޙަރަކާތް ތަކުގައި ބޭނުން ކުރުމަށް އިނގިރޭސިވިލާތުން އެމެރިކާ އަށް ހުއްދަ ދީފައިވާ ދެ މަރުކަޒުގެ ތެރެއިން އެއް މަރުކަޒެވެ. އީރާން އިން ވަނީ އެ ޤައުމަށް އަމާޒުކޮށް ހަމަލާ ދޭ ކޮންމެ ބޭސް އަކީ، އެ ޤައުމުގެ ޓާގެޓަކަށް ވާނެ ކަމުގެ އިންޒާރު ވެސް ދީފަ އެވެ.
އީރާން އިން ޑިއޭގޯ ގާސިއާ އަށް ހަމަލާ ދިން ކަމުގެ ރިޕޯޓާ އެކު، ގިނަ ބައެއްގެ ސަމާލުކަން ވަނީ އެކަމަށް ހުއްޓިފަ އެވެ. ޑިއޭގޯ ގާސިއާ އާއި އީރާންއާ ދެމެދު 4000 ކިލޯ މީޓަރު، ނުވަތަ 2،485 މޭލު ހުންނާނެ އެވެ. އީރާންގެ ފޮރިން މިނިސްޓަރު އައްބާސް އަރާގްޗީ ވަނީ، އީރާން އަށް އެއްވެސް ހަމަލާއެއް ދިނުމަށް އެ ޤައުމުގައި ހުރި ބޭސް ތަކެއް ބޭނުން ކޮށްފި ނަމަ، އެއީ އީރާންއާ ދެކޮޅަށް ހިންގާ އަސްކަރީ ޙަރަކާތުގައި ބައިވެރިވުން ކަމަށް ބަލާނެ ކަމުގެ އިންޒާރު އިނގިރޭސިވިލާތަށް ދީފަ އެވެ.
އިންޑިއާގެ ކަނޑުގެ މެދު ތެރޭގައި އޮންނަ ޗާގޯސް އާކިޕެލާގޯގެ އެންމެ ބޮޑު ރަށް ކަމަށްވާ ޑިއޭގޯ ގާސިއާގައި، 1970ގެ އަހަރު ތަކުން ފެށިގެން އެމެރިކާ އާއި އިނގިރޭސިވިލާތުގެ ގުޅިފައިވާ އަސްކަރީ މަރުކަޒެއް އަންނަނީ ހިންގަމުންނެވެ. މި ރަށަކީ ދުރު ރާސްތާގެ ބޮން އަޅާ ބޯޓު ފަހަރާއި، އެ ނޫން ވެސް އިސްތިރާތީޖީ އަސްކަރީ ވަސީލަތްތައް ޤާއިމު ކޮށްފައިވާ މުހިންމު މަރުކަޒެކެވެ.
މަސްދަރު: އަލް ޖަޒީރާ
