އީރާނުން ޑިއޭގޯ ގާސިއާ އަށް އަމާޒުކޮށް ހަމަލާ ދީފި

އިންޑިއާ ކަނޑުގައި އޮންނަ އެމެރިކާާ އާއި އިނގިރޭސިވިލާތުގެ އަސްކަރީ މަރުކަޒެއް ކަމަށްވާ، ޑިއޭގޯ ގާސިއާ އަަށް އަމާޒުކޮށް އީރާނުން ހަމަލާ ފޮނުވާލާފައިވާ ކަމަށް ރިޕޯޓު ކޮށްފި އެވެ.

ވޯލް ސްޓްރީޓް ޖާނަލްގައި ރިޕޯޓު ކޮށްފައި ވަނީ، ޑިއޭގޯ ގާސިއާ އަށް އަމާޒުކޮށް އީރާނުން ފޮނުވާފައި ވަނީ މެދު ރާސްތާގެ ދެ ބެލިސްޓިކް މިސައިލް ކަމަށެވެ. އެމެރިކާގެ ސަރުކާރުގެ އިސް އޮފިޝަލުންނާ ހަވާލާދީ އެ ނޫހުގައި ބުނެފައިވާ ގޮތުގައި، އީރާނުން ހަމަލާ ދޭން މަސައްކަތް ކުރި ނަމަވެސް، އެއްވެސް މިސައިލެއް އެ މަރުކަޒަށް އަރާފައި ނުވެ އެވެ. 

އެ ހާދިސާގައި އީރާނުން ފޮނުވާލި ދެ މިސައިލްގެ ތެރެއިން އެއް މިސައިލް، ދަތުރު މަތީގައި ފެއިލްވެފައިވާ ކަމަށް ރިޕޯޓުތައް ބުނެ އެވެ. އަދި ދެ ވަނަ މިސައިލް އަމާޒަށް ދަތުރު ކުރަމުން ދަނިކޮށް، އެމެރިކާގެ އަސްކަރީ މަނަވަރަކުން އެސްއެމް-3 މަރުކާޒުގެ އިންޓަސެޕްޓަރެއް ބޭނުން ކޮށްގެން އެ މިސައިލް ވައްޓާލުމަށް މަސައްކަތް ކުރި ކަމަށް ވޯލް ސްޓްރީޓް ޖާނަލްގައި ބުނެފައިވެ އެވެ. ނަމަވެސް، އެމެރިކާގެ މަނަވަރުން ދިން ހަމަލާ ކާމިޔާބުވެ، މިސައިލް ވައްޓާލެވުނުކަން އަދި ކަށަވަރު ކުރެވެފައި ނުވާ ކަމަށް ބުނެފައިވެ އެވެ. 

އެކަމާ ގުޅިގެން އެމެރިކާގެ ރިޔާސީ ގަނޑުވަރު ވައުޓް ހައުސް އާއި، އެމެރިކާގައި ހުންނަ އިނގިރޭސިވިލާތުގެ އެމްބަސީ އާއި، އިނގިރޭސިވިލާތުގެ މިނިސްޓްރީ އޮފް ޑިފެންސްގެ ބަހެއް ހޯދުމަށް ރޮއިޓާސް އިން މަސައްކަތް ކޮށްފައި ވީ ނަމަވެސް، އެއްވެސް އިދާރާ އަކުން ބަހެއް ބުނެފައި ނުވެ އެވެ. 

ޑިއޭގޯ ގާސިއާ އަކީ އިންޑިއާގެ ކަނޑުގެ މެދު ތެރޭގައި އޮންނަ، އެމެރިކާ އާއި އިނގިރޭސިވިލާތުގެ އަސްކަރީ ބޭނުން ތަކަށް ބޭނުން ކުރާ ވަރަށް މުހިންމު ސްޓްރެޓީޖިކް މަރުކަޒެކެވެ. މި މަރުކަޒަށް އަމާޒުކޮށް އީރާން އިން ހަމަލާއެއް ދިނުމަށް މަސައްކަތް ކުރި ކަމަށް ފެންމަތިވި ރިޕޯޓު ތަކަކީ، މެދު އިރުމަތީގެ މަސްރަހު ނުތަނަވަސްވެފައިވާ ދަނޑިވަޅެއްގައި ފެންމަތިވި ސީރިއަސް މައުލޫމާތު ތަކެކެވެ.