އީރާނުން ދުނިޔޭގެ ފަތުރުވެރިކަމުގެ މަންޒިލްތަކަށް ހަމަލާދޭނެ ކަމުގެ އިންޒާރު ދީފި
ދުނިޔޭގެ އެކި ކަންކޮޅުތަކުގައި ހުރި ފަތުރުވެރިކަމާއި މުނިފޫހިފިލުވުމަށް ޚާއްސަ މަންޒިލްތަކަށް ހަމަލާދޭނެ ކަމުގެ އިންޒާރު އީރާނުން ދިނުމާ ގުޅިގެން، މެދުއިރުމަތީގެ ބޭރުން އެކި ސަރަހައްދުތަކަށް ނުރައްކާ އޮތް ކަމުގެ ބިރުވެރިކަން ވަނީ ބޮޑުވެފައި. އިޒްރޭލުން އީރާނުގެ ގޭސް ފީލްޑަކަށް ދިން ހަމަލާގެ ބަދަލުހިފުމުގެ ގޮތުން، އީރާނުގެ ޑްރޯންތަކުން ކުވެއިތުގެ އެންމެ ބޮޑު އެއް ތެޔޮ ސާފުކުރާ ކާރުޚާނާއަށް ހަމަލާދީ ބޮޑެތި ގެއްލުންތަކެއް ވަނީ ދީފައި. މި ހަމަލާތަކާއެކު ގަލްފުގެ އަރަބި ގައުމުތަކުގައި ހުރި ހަކަތަ އުފައްދާ މަރުކަޒުތަކަށް އޮތް ނުރައްކާ މިހާރު ވަނީ އިތުރަށް ބޮޑުވެފައި.
12 ނޮވެމްބަރު 2008 ގައި، އީރާނުގެ ހާމަނުކުރާ ސަރަހައްދަކުން އެ ގައުމުގެ "ސަޖީލް" މަރުކާގެ ބިމުން ބިމަށް ފޮނުވާލެވޭ މިސައިލެއް އުދުއްސާލަނީ. | ގެޓީ އިމޭޖަސް
އެމެރިކާ އާއި އިޒްރޭލުން އީރާނާ ދެކޮޅަށް ފެށި ޣައިރު ގާނޫނީ ހަނގުރާމައަށް ތިން ހަފުތާ ވެފައިވާއިރު، ދުނިޔޭގެ އެކި ކަންކޮޅުތަކުގައި ހުރި ފަތުރުވެރިކަމުގެ މަންޒިލްތަކަށް ހަމަލާދޭނެ ކަމުގެ އިންޒާރު އީރާނުން ދީފިއެވެ.
އީރާނުން ބަދަލުހިފުމުގެ ގޮތުން ދޭ ހަމަލާތައް ފުޅާކޮށް، ދުނިޔޭގެ އެކި ސަރަހައްދުތަކުގައި ހުރި މުނިފޫހިފިލުވުމާއި ފަތުރުވެރިކަމަށް ޚާއްސަ ތަންތަނަށް ހަމަލާދޭނެ ކަމަށް އެ ގައުމުން ވަނީ ބުނެފައެވެ.
އީރާނުގެ އަސްކަރިއްޔާގެ އިސް ތަރުޖަމާނު ޖެނެރަލް އަބުލްފަޒްލް ޝެކަރްޗީ އިންޒާރު ދެއްވި ގޮތުގައި، ދުނިޔޭގެ އެކި ކަންކޮޅުތަކުގައި ހުރި ޕާކުތަކާއި، މުނިފޫހިފިލުވާ ސަރަހައްދުތަކުގެ އިތުރުން ފަތުރުވެރިކަމުގެ މަންޒިލްތަކަކީ އެ ގައުމުގެ ދުޝްމަނުންނަށް ރައްކާތެރި ތަންތަނެއް ނޫނެވެ.
މި އިންޒާރާއެކު، މެދުއިރުމަތީގެ ބޭރުން އެކި ސަރަހައްދުތަކަށް އަމާޒުކޮށް ނުރަސްމީ އުސޫލުތަކުން ހަމަލާދީ، ނުފޫޒު ފޯރުވުމަށް އީރާނުން އަލުން މަސައްކަތް ކޮށްފާނެ ކަމުގެ ބިރުވެރިކަން ވަނީ ބޮޑުވެފައެވެ.
މި ހަފުތާގެ ކުރީކޮޅު އިޒްރޭލުން އީރާނުގެ ކަނޑުގެ ސަރަހައްދުގައި އޮންނަ "ސައުތު ޕާސް" ގޭސް ފީލްޑަށް ބޮން އެޅުމާ ގުޅިގެން، އީރާނުން ވަނީ ގަލްފުގެ އަރަބި ގައުމުތަކުގައި ހުރި ހަކަތަ އުފައްދާ މަރުކަޒުތަކަށް ދޭ ހަމަލާތައް ވަރުގަދަކޮށްފައެވެ.
އެގޮތުން ހުކުރު ދުވަހުގެ ހެނދުނުގެ ވަގުތެއްގައި އީރާނުގެ ޑްރޯންތަކުން ކުވެއިތުގެ ތެޔޮ ސާފުކުރާ ކާރުޚާނާއަކަށް ދިން ދެ ހަމަލާއެއްގައި އެތަނުގައި ވަނީ އަލިފާން ރޯވެފައެވެ. ހަމަލާ އަމާޒުވި "މިނާ އަލް އަހްމަދީ" ރިފައިނަރީއަކީ ދުވާލަކު 730،000 ފީފާ ތެޔޮ ސާފުކުރުމުގެ ގާބިލުކަން ހުރި، މެދުއިރުމަތީގައި ހުރި އެންމެ ބޮޑު އެއް ކާރުޚާނާއެވެ.
މަސްދަރު: އަލް ޖަޒީރާ
