އީރާނުގެ ކަރަންޓު ނެޓްވޯކަށް ހަމަލާއެއް ދީފިނަމަ، ސަރަހައްދުގައި ހުރި ހަކަތައާއި ފެނުގެ ވަސީލަތްތަކަށް ހަމަލާދޭނެކަމުގެ އިންޒާރު ދީފި
އީރާނުގެ ކަރަންޓު އުފައްދާ މަރުކަޒުތަކަށް ހަމަލާދީފިނަމަ، މެދުއިރުމަތީގައި ހުރި އެމެރިކާއާއި އިޒްރޭލުގެ ހަކަތައާއި ފެނުގެ ވަސީލަތްތަކަށް ވަރުގަދަ ހަމަލާތަކެއް ދޭނެކަމުގެ އިންޒާރު އެ ގައުމުގެ އަސްކަރިއްޔާއިން ދީފި. ޑޮނަލްޑް ޓްރަމްޕް ދެއްވި އިންޒާރަކާ ގުޅިގެން ދިން މި ރައްދުގައި، އީރާނުގެ ކަރަންޓު ނެޓްވޯކަށް ގެއްލުމެއް ދީފިނަމަ ބައިގަޑިއިރު ތެރޭގައި މުޅި ސަރަހައްދުން ކަރަންޓު ދުއްވާލާނެ ކަމަށް ވެސް އެ ގައުމުން ވަނީ ބުނެފައި.
މާރިޗު 8، 2026 ވީ އާދީއްތަ ދުވަހުގެ ރޭގެ ވަގުތެއްގައި ތެހެރާންގެ ހުޅަނގު އުތުރުގައި ހުންނަ ޝަހްރާން ތެޔޮ ރިފައިނަރީއަށް ދިން ވައިގެ ހަމަލާތަކާ ގުޅިގެން ރޯވި އަލިފާންގަނޑުން އުފެދުނު ބޯ ދުން އެ ސަރަހައްދަށް ފެތުރެނީ. | ގެޓީ އިމޭޖަސް
އީރާނުގެ ކަރަންޓު އުފައްދާ މަރުކަޒުތަކަށް އަމާޒުކޮށް ހަމަލާއެއް ދީފިނަމަ، މެދުއިރުމަތީގައި ހުރި އެމެރިކާއާއި އިޒްރޭލާ ގުޅުންހުރި ހަކަތައިގެ ހުރިހާ ވަސީލަތްތަކަށް ހަމަލާދޭނެކަމުގެ އިންޒާރު އީރާނުގެ އަސްކަރިއްޔާއިން ވަނީ ދީފައެވެ.
އީރާނުގެ ޚާތަމް އަލް-އަންބިޔާ ސެންޓްރަލް ކޮމާންޑުގެ ތަރުޖަމާނު އިބްރާހީމް ޒުލްފަގާރީ ވިދާޅުވީ، އެމެރިކާއާއި އިޒްރޭލާ ގުޅުންހުރި ކަނޑުގެ ލޮނުފެން މީރުފެނަށް ބަދަލުކުރާ ޕްލާންޓްތަކަށާއި، އިންފޮމޭޝަން ޓެކްނޮލޮޖީގެ ވަސީލަތްތަކަށް ވެސް އީރާނުން ހަމަލާދޭނެ ކަމަށެވެ.
އީރާނުން މި އިންޒާރު ދީފައިވަނީ، 48 ގަޑިއިރު ތެރޭގައި ހޮރްމޫޒް ކަނޑުއޮޅި އަލުން ހުޅުވާނުލައިފިނަމަ، އެ ގައުމުގެ ކަރަންޓު އުފައްދާ މަރުކަޒުތަކަށް ހަމަލާދޭނެ ކަމަށް ބުނެ ޑޮނަލްޑް ޓްރަމްޕް އިންޒާރު ދެއްވާފައި ވަނިކޮށެވެ.
މީގެ އިތުރުން، އީރާނުގެ ސުޕްރީމް ނޭޝަނަލް ސެކިއުރިޓީ ކައުންސިލްގެ ކުރީގެ ސެކްރެޓަރީ ޖެނެރަލް އަލީ ލަރީޖާނީ ދެއްވާފައިވާ އިންޒާރަކާ ހަވާލާދީ ފާރްސް ނިއުސް އެޖެންސީން ރިޕޯޓުކޮށްފައިވާ ގޮތުގައި، އީރާނުގެ ކަރަންޓު ނެޓްވޯކަށް ހަމަލާއެއް ދީފިނަމަ، ބައިގަޑިއިރު ތެރޭގައި މުޅި ސަރަހައްދުން ކަރަންޓު ދުއްވާލާނެ އެވެ.
