އީރާން ހަނގުރާމައާ ދެކޮޅު ހެދުމުގެ ގޮތުން އިސްތިއުފާ ދެއްވި ޖޯ ކެންޓްގެ މައްސަލައެއް އެފްބީއައި އިން ތަހުގީގު ކުރަނީ

އެމެރިކާ އިން އީރާންއާ ދެކޮޅަށް ކުރިއަށް ގެންދާ ހަނގުރާމައާ ދެކޮޅު ހެދުމުގެ ގޮތުން މަގާމުން އިސްތިއުފާ ދެއްވި އެމެރިކާގެ ނޭޝަނަލް ކައުންޓަޓެރަރިޒަމް ސެންޓަރުގެ ކުރީގެ ޑިރެކްޓަރު ޖޯ ކެންޓްގެ މައްސަލައެއް، އެފްބީއައި އިން ތަހުގީގު ކުރަން ފަށައިފި އެވެ. 

އެމެރިކާގެ ރައީސް ޑޮނަލްޑް ޓްރަމްޕް އަށް ސިޓީއެއް ފޮނުވުމަށް ފަހު، ޖޯ ކެންޓް މަގާމުން އިސްތިއުފާ ދެއްވާފައި ވަނީ އަންގާރަ ދުވަހު އެވެ. އެގޮތުން އޭނާ ވިދާޅުވެފައި ވަނީ، އެމެރިކާ އިން އީރާންއާ ދެކޮޅަށް ކުރިއަށް ގެންދާ ހަނގުރާމަ އަށް ތާއީދު ކުރެވެން ނެތް ކަމަށެވެ. އަދި އެއީ އޭނާގެ އަމިއްލަ ޟަމީރު ޤަބޫލު ކުރާ ކަމެއް ނޫން ކަމަށް ވެސް ވިދާޅުވެފައިވެ އެވެ. އެ ސިޓީގައި އޭނާ ވަނީ، އީރާންގެ ފަރާތުން އެމެރިކާ އަށް އެއްވެސް ނުރައްކަލެއް ނެތް ކަމަށް ފާހަގަ ކުރައްވައިފަ އެވެ. 

ނިއުޔޯކް ޓައިމްސް އާއި ސީބީއެސް އިން ރިޕޯޓު ކޮށްފައިވާ ގޮތުގައި، މައުލޫމާތު ތަކެއް ލީކު ކުރި ކަމަށް ބުނެ އެފްބީއައި އިން ވަނީ ޖޯ ކެންޓްގެ މައްސަލަ ތަހުގީގު ކުރަން ފަށައިފަ އެވެ. އަދި އެއީ އޭނާ މަގާމުން އިސްތިއުފާ ދެއްވުމުގެ ކުރިން ފަށާފައިވާ ތަހުގީގެއް ކަމަށް ވެސް ބުނެފައިވެ އެވެ. އެގޮތުން ބައެއް މީޑިއާ ތަކުގައި ބުނެފައި ވަނީ އެ ތަހުގީގު ކުރިއަށް ގެންދާތާ މިހާރު ގާތް ގަނޑަކަށް މަސް ދުވަސް ވެފައިވާ ކަމަށެވެ. 

އެކަމާ ގުޅޭ ގޮތުން އެފްބީއައި އިން ވަކި އެއްޗެއް ބުނެފައި ނުވެ އެވެ. 

Raajje.mv

އީރާންއާ ދެކޮޅަށް ޓްރަމްޕް ކުރިއަށް ގެންދާ ހަނގުރާމައާ ދެކޮޅު ހެދުމުގެ ގޮތުން، އެމެރިކާގެ ކައުންޓަޓެރަރިޒަމް ޑިރެކްޓަރު އިސްތިއުފާ ދެއްވައިފި

ކެންޓް އަކީ އެމެރިކާގެ ރައީސް ޓްރަމްޕްއާ ވަރަށް ގާތް ގުޅުމެއް އޮންނަ މީހަކަށްވާއިރު، އޭނާ އަކީ ޓްރަމްޕްގެ ވަފާތެރި ސަޕޯޓަރެކެވެ. ޓްރަމްޕްގެ ވެރި ކަމުގައި އޭނާ އައްޔަން ކުރެއްވީ ނޭޝަނަލް ކައުންޓަޓެރަރިޒަމް ސެންޓަރުގެ ޑިރެކްޓަރުގެ މަގާމަށެވެ. އެ މަގާމަށް އޭނާ އައްޔަން ކުރައްވާފައި ވަނީ 2025 ވަނަ އަހަރުގެ ޖުލައި މަހުގެ 31 ވަނަ ދުވަހު އއެވެ. އޭނާ އަކީ ޓެރަރިޒަމްގެ ކަންކަމުގައި އެމެރިކާގެ ރައީސް އަށް ލަފާ ވެސް އަރުވަން ހުންނެވި ބޭފުޅާ އެވެ. 

ކެންޓް އިސްތިއުފާ ދެއްވުމާ އެކު ޓްރަމްޕް ވިދާޅުވެފައި ވަނީ، އޭނާ މަގާމުން އިސްތިއުފާ ދެއްވުމަކީ ރަނގަޅު ކަމެއް ކަމަށެވެ. އަދި ކެންޓް އަކީ ސަލާމަތީ ކަންކަމުގައި ވަަރަށް ބަލިކަށި މީހެއް ކަމަށް ވެސް ޓްރަމްޕް ފާހަގަ ކުރައްވާފައިވެ އެވެ. ޓްރަމްޕްގެ އިތުރުން، ވައިޓް ހައުސްގެ ޕްރެސް ސެކްރެޓަރީ ކެެރޮލިން ލެވިޓް ވަނީ، އިސްތިއުފާގެ ސިޓީގައި ކެންޓް ފާހަގަ ކޮށްފައިވާ ކަންކަން ދޮގު ކޮށްފަ އެވެ.