ފްލޮރިޑާގައި ހުންނަ ސެންޓްރަލް ކޮމާންޑު ބޭސް އަށް އިންޒާރެއް، ރައްކާތެރި ކަމުގެ ފިޔަވަޅު އަޅަން ފަށައިފި

އެމެރިކާގެ ފްލޮރިޑާގައި ހުންނަ އެ ޤައުމުގެ ސެންޓްރަލް ކޮމާންޑުގެ ބޭސް އަކަށް ލިބުނު އިންޒާރެއްގެ ސަބަބުން، އެ ބޭސްގައި ތިބި ހުރިހާ އެންމެން ވެސް ރައްކާތެރި ހިސާބު ތަކެއްގައި ތިބުމަށް އަންގައިފި އެވެ. 

ޓެމްޕާގައި ހުންނަ މެކްޑިލް އެއާފޯސް ބޭސް އިން ސޯޝަލް މީޑިއާގައި ކުރި ޕޯސްޓެއްގައި ބުނީ، ހުރިހާ އިންޒާރު ތަކަކީ ވެސް ސީރިއަސް އިންޒާރުތަކެއްގެ ގޮތުގައި ދެކޭ ކަމަށާއި، އެ ބޭސްގެ ރައްކާތެރިކަން ކަށަވަރު ކުރުމަށް އެކަށީގެންވާ ފިޔަވަޅުތައް އަޅަމުން އަންނަ ކަމަށެވެ. މި ބޭސްގައި އެމެރިކާގެ ސެންޓްރަލް ކޮމާންޑް މަރުކަޒު ހިންގަ އެވެ. 

ލިބުނު އިންޒާރުގެ ތަފްސީލެއް، އަދި އަޅަމުން އަންނަ ރައްކާތެރި ކަމުގެ ފިޔަވަޅު ތަކުގެ އެއްވެސް ތަފްސީލެއް ބޭސް އިން ހާމަ ކޮށްފައި ނުވެ އެވެ. އެހެން ނަމަވެސް، މައުލޫމާތު ލިބެމުން އަންނަ މިންވަރަކު އިތުރު ތަފްސީލް ހާމަ ކުރާނެ ކަމަށް ބުނެފައިވެ އެެވެ. 

އެ އެންގުން އަންގާފައި ވަނީ މި ހަފުތާގެ ކުރީ ކޮޅު، އެ ބޭސްގެ ރައްކާތެރި ކަމުގެ ދަރަޖް އެފްޕީކޮން ޗާލީ އަށް މަތި ކުރުމަށް ފަހު އެވެ. ހޯމަ ދުވަހު ކުރި ޕޯސްޓެއްގައި މެކްޑިލް ވޭސް އިން ބުނީ، މި ފިޔަވަޅަކީ ރައްކާތެރި ކަމުގެ ފިޔަވަޅުތައް ކުރިން ވިސްނައިގެން އަޅަން ފުރުސަތު ލިބޭ ގޮތަށް އަޅާ ފިޔަވަޅެއް ކަމަށެވެ. 

ހުރިހާ މުވައްޒަފުންނަށް ވަރަށް ސަމާލުކަމާ އެކު ތިބުމަށާއި، ރައްކާތެރި ކަމުގެ ބާރު ތަކުގެ އިރުޝާދު ތަކަށް ސަމާލުކަން ދިނުމާ އެކު، ޞައްޙަ މައުލޫމާތު ވަގުތުން ރިޕޯޓު ކުރުމަށް ވެސް އަންގާފައިވެ އެވެ. 

ސެންޓްރަލް ކޮމާންޑް މަރުކަޒަކީ އެ ސަރަހައްދުގައި އެމެރިކާގެ އަސްކަރީ އޮޕަރޭޝަންތައް ހިންގުމުގައި މުހިންމު ދައުރެއް އަދާ ކުރާ މަރުކަޒެކެވެ. އެމެރިކާ އިން އީރާންއާ ދެކޮޅަށް ހިންގާ ހަނގުރާމަ އާއި ދެމުން އަންނަ ހަމަލާ ތަކުގެ އޮޕަރޭޝަން އެޕިކް ފިއުރީގެ ޙަރަކާތްތައް ވެސް މި މަރުކަޒުން ކޯޑިނޭޓު ކުރެ އެވެ. 

މިއީ ފަހަކަށް އައިސް އެމެރިކާގެ އަސްކަރީ ބޭސް ތަކަށް ލިބެމުންދާ އިންޒާރުތައް އިތުރުވެފައިވާ ދަނޑިވަޅެއްގައި ހިނގި ހާދިސާ އެކެވެ.