ލަރިޖާނީ އަވަހާރަ ކޮށްލުމަަކީ ބަލައި ގަނެވޭނެ ކަމެއް ނޫން ކަމަށް ޗައިނާ އިން ބުނެފި

އިޒްރޭލް އިން ދިން ހަމަލާ ތަކެއްގައި އީރާންގެ ޤައުމީ ސަލާމަތާ ބެހޭ އެންމެ އިސްވެރިޔާ އަލީ ލަރިޖާނީ އަވާހަރަ ކޮށްލި ހާދިސާ ޗައިނާ އިން ކުށްވެރި ކޮށްފަ އެވެ. 

ޗައިނާގެ ފޮރިން މިނިސްޓްރީގެ ތަރުޖަމާނު ލިން ޖިއާން ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމެއްގައި ވިދާޅުވީ، ބައިނަލްއަޤުވާމީ ގުޅުން ތަކުގައި ބާރުގެ ބޭނުން ކުރުމާ ޗައިނާ  އިން އަބަދު ވެސް ދެކޮޅު ހަދާ ކަމަށެވެ. އަދި އީރާންގެ ދައުލަތުގެ އިސްވެރިން އަވަހާރަ ކޮށްލުމާއި، އާންމުން ދިރިއުޅޭ ތަންތަނަށް އަމާޒުކޮށް ހަމަލާ ދިނުމަކީ އެއްގޮތަކަށް ވެސް ބަލައި ގަނެވާނެ އަމަލު ތަކެއް ނޫން ކަމަށް ވެސް އޭނާ ވިދާޅުވި އެވެ. 

ލަރިޖާނީ އަވަހާރަ ކޮށްލި ހާދިސާއާ ގުޅޭ ގޮތުން ނޫސްވެރިން ކުރި ސުވާލު ތަކަށް ޖަވާބު ދެއްވަމުން ތަރުޖަމާނު އިތުރަށް ވިދާޅުވީ، މިފަދަ އަމަލު ތަކުގެ ސަބަބުން ސަރަހައްދީ މަސްލަހަތު އިތުރަށް ގޯސް ވެގެން ދާނެ ކަމަށެވެ. ޗައިނާ އިން ވަނީ، އިޒްރޭލް އިން ދިން އެ ހަމަލާ އަކީ ބައިނަލްއަޤުވާމީ ޤާނޫނުތަކާ ޚިލާފު އަމަލެއްގެ ގޮތުގައި ސިފަ ކޮށްފަ އެވެ. 

އިޒްރޭލް އިން ދެމުން އަންނަ ހަމަލާތަކާ ގުޅިގެން މެދު އިރުމަތީގެ މަސްރަހު ވަރަށް ބޮޑަށް ނުތަނަސްވެފައިވާއިރު، ޗައިނާ އިން ވަނީ ހުރިހާ ފަރާތް ތަކުން ވެސް ކެތްތެރިކަން އިސް ކުރުމަށް ގޮވާލައިފަ އެވެ. ނަމަވެސް، އީރާންގެ އިސްވެރިންނަށް އަމާޒުކޮށް ދޭ ހަމަލާ ތަކަކީ ސަރަހައްދީ ހަމަޖެހުމަށް އޮތް ބޮޑު ހުރަކެއް ކަމަށް ޗައިނާގެ ފޮރިން މިނިސްޓްރީ އިން ދެކެ އެވެ. 

ލަރިޖާނީ އަވަހާރަ ކޮށްލުމާ ގުޅިގެން، އީރާން އިން ވަނީ އެކަމުގެ ބަދަލު ހިފާނެ ކަމުގެ އިންޒާރު ވެސް ދީފަ އެވެ. ލަރިޖާނީ އަކީ އީރާންގެ އަސްކަރިއްޔާގެ އިތުރުން، ސިޔާސީ މައިދާނުގައި ވެސް ވަރަށް ނުފޫޒު ގަދަ ބޭފުޅެކެވެ. ބުދަ ދުވަހު އީރާން އިން ވަނީ ލަރިޖާނީގެ ޖަނާޒާ ބާއްވައިފަ އެވެ.