އީރާންއާ ދެކޮޅަށް ޓްރަމްޕް ކުރިއަށް ގެންދާ ހަނގުރާމައާ ދެކޮޅު ހެދުމުގެ ގޮތުން، އެމެރިކާގެ ކައުންޓަޓެރަރިޒަމް ޑިރެކްޓަރު އިސްތިއުފާ ދެއްވައިފި

އީރާންއާ ދެކޮޅަށް އެމެރިކާ އިން ކުރިއަށް ގެންދާ ހަނގުރާމައާ ގުޅިގެން، އެމެރިކާގެ ނޭޝަނަލް ކައުންޓަޓެރަރިޒަމް ސެންޓަރުގެ ޑިރެކްޓަރު ޖޯ ކެންޓް މަގާމުން އިސްތިއުފާ ދެއްވައިފި އެވެ.

ނޭޝަނަލް ކައުންޓަޓެރަރިޒަމް ސެންޓަރަކީ ޓެރަރިޒަމްގެ ނުރައްކާތަކާ ގުޅޭ ގޮތުން އެ ޤައުމުގެ ރައީސް ޑޮނަލްޑް ޓްރަމްޕް އަށާއި، ޑިރެކްޓަރު އޮފް ނޭޝަނަލް އިންޓެލިޖެންސް އަށް ލަފާދޭ މުހިންމު އިދާރާ އެކެވެ.

ސޯޝަލް މީޑިއާގައި އާންމު ކުރެއްވި އިސްތިއުފާގެ ސިޓީގައި ޖޯ ކެންޓް ވިދާޅުވީ، މިހާރު ކުރިއަށްދާ ހަނގުރާމަ އަށް ތާއީދު ކުރުމަކީ އޭނާގެ ޟަމީރު ޤަބޫލު ކުރާ ކަމެއް ނޫން ކަމަށެވެ. އީރާންގެ ފަރާތުން އެމެރިކާ އަށް ކުރިމަތިވާ ނުރައްކަލެއް ނެތް ކަމަށާއި، އެ ހަނގުރާމަ ފަށަން ޖެހުނީ އިޒްރޭލް އާއި އެމެރިކާގައި އޮންނަ އިޒްރޭލްގެ ނުފޫޒު ގަދަ ލޮބީ ގުރޫޕު ތަކުގެ ފިއްތުން ތަކުގެ ސަބަބުން ކަމަށް އޭނާ ވިދާޅުވި އެވެ.

މީގެ އިތުރުން ބޭރުގެ އެހެން ޤައުމުތަކާ ދެކޮޅަށް ކުރާ ހަނގުރާމަތައް ހުއްޓާލުމަށް ރައީސް ޓްރަމްޕް މީގެ ކުރިން ވެވަޑައިގެންފައިވާ ވައުދު ތަކަށް ކެންޓް ވަނީ އިޝާރާތް ކުރައްވައިފަ އެވެ. 

މިއީ އީރާންގެ ހަނގުރާމައާ ދެކޮޅު ހެދުމުގެ ގޮތުން އެމެރިކާގެ ސަރުކާރުން އިސްތިއުފާ ދެއްވި ފުރަތަމަ ބޭފުޅާ އެވެ.