ރައްދުގައި އީރާން އިން ދިން ހަމަލާތަކާ ގުޅިގެން ޓްރަމްޕް ފަސް ޖެހިއްޖެ، ވިދާޅުވީ ސައުތު ޕާސް އަށް އިޒްރޭލް އިން އިތުރު ހަމަލާއެއް ނުދޭނެ ކަމަށް
އެކަމާ ގުޅިގެން ޓްރަމްޕް ވިދާޅުވީ، ވަރަށް އަގު ހުރި އަދި މުހިންމު ތަނެއްގެ ގޮތުގައި ބެލެވޭ ސައުތު ޕާސް ފީލްޑް އަށް އިޒްރޭލް އިން ދެން އިތުރު ހަމަލާއެއް ނުދޭނެ ކަމަށް. ނަމަވެސް، ޤަތަރަށް ހަމަލާ ދިނުމަކީ އީރާން އިން ނިންމު ބުއްދިވެރި ނިންމުމެއް ނޫން ކަަމަށާއި، އެއްވެސް ކުށެއް ނެތް ޤަތަރަށް އިތުރު ހަމަލާއެއް ދީގެން ނުވާނެ ކަމަށް ޓްރަމްޕް ވިދާޅުވި.
އެމެރިކާގެ ރައީސް ޑޮނަލްޑް ޓްރަމްޕް | ގެޓީ އިމޭޖަސް
އީރާންގެ ސައުތު ޕާސް ގޭސް ފީލްޑް އަށް އިޒްރޭލް އިން ދިން ހަމަލާ އަކީ އެމެރިކާ އަށް އެނގިގެން ދީފައިވާ ހަމަލާއެއް ނޫން ކަމަށާއި، އެ ހަމަލާގައި ޤަތަރުގެ އެއްވެސް ބައިވެރިވުމެއް ނެތް ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.
ބުދަ ދުވަހުގެ ރޭ ޓްރަމްޕް، އޭނާގެ ޓުރުތު ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ، އީރާންގެ ސައުތު ޕާސް ގޭސް ފީލްޑް އަށް ވަރުގަދަ ހަމަލާއެއް ދީފައިވާ ކަމަށެވެ. ނަމަވެސް، އެ ހަމަލާގެ އެއްވެސް މައުލޫމާތެއް އެމެރިކާ އަށް ކުރިން ލިބިފައި ނުވާ ކަމަށާއި، އަދި ޤަތަރަކީ އެއްވެސް ސިފައެއްގައި އެކަމުގައި ބައިވެރިވި، ނުވަތަ އެފަދަ ކަމެއް ހިންގާފާނެ ކަމުގެ މައުލޫމާތު އެނގިފައި އޮތް ޤައުމެއް ނޫން ކަމަށް ވެސް ޓްރަމްޕް ވިދާޅުވި އެވެ.
އިޒްރޭލްގެ ހަމަލާއާ ގުޅިގެން އެކަމުގެ ބަދަލު ހިފުމުގެ ގޮތުން އީރާން އިން ވަނީ، ޤަތަރުގެ ރަސް ލައްފާންގައި ހުންނަ ގޭސް ފެސިލިޓީ އަކަށް ހަމަލާ ދީފަ އެވެ. އެކަމާ ގުޅިގެން ޓްރަމްޕް ވިދާޅުވީ، ވަރަށް އަގު ހުރި އަދި މުހިންމު ތަނެއްގެ ގޮތުގައި ބެލެވޭ ސައުތު ޕާސް ފީލްޑް އަށް އިޒްރޭލް އިން ދެން އިތުރު ހަމަލާއެއް ނުދޭނެ ކަމަށެވެ. ނަމަވެސް، ޤަތަރަށް ހަމަލާ ދިނުމަކީ އީރާން އިން ނިންމި ބުއްދިވެރި ނިންމުމެއް ނޫން ކަަމަށާއި، އެއްވެސް ކުށެއް ނެތް ޤަތަރަށް އިތުރު ހަމަލާއެއް ދީގެން ނުވާނެ ކަމަށް ޓްރަމްޕް ވިދާޅުވި އެވެ.
އެއާ އެކު، އީރާން އަށް ވަރުގަދަ އިންޒާރެއް ދެއްވަމުން ޓްރަމްޕް ވިދާޅުވީ، ޤަތަރަށް އިތުރު ހަމަލާއެއް ދީފި ޙާލަތެއްގައި، އިޒްރޭލްގެ އެހީތެރިކަމާ އެކު ނުވަތަ އިޒްރޭލްގެ އެހީތެރިކަމާ ނުލައި ވިތަސް، އެމެރިކާ އިން ނިކުމެ ސައުތު ޕާސް ގޭސް ފީލްޑް އެއްކޮށް ގޮއްވާލާނެ ކަމަށެވެ. އަދި އެ ހަމަލާ އަކީ އީރާން އިން ދުވަހަކު ވެސް ދެކެފައި ނުވާ ފަދަ ބާރުގަދަ އަދި ނުރައްކާތެރި ހަމަލާ އަކަށް ވާނެ ކަމަށް ވެސް ޓްރަމްޕް ވިދާޅުވި އެވެ.
މި ހާދިސާއާ ގުޅިގެން މެދު އިރުމަތީގެ މަސްރަހު ވަނީ ވަރަށް ބޮޑަށް ހޫނުވެފަ އެވެ. އިޒްރޭލް އިން އީރާންގެ ހަކަތަ އުފައްދާ މަރުކަޒު ތަކަށް ހަމަލާ ދިނުމާއި، އޭގެ ބަދަލުގައި އީރާން އިން ޤަތަރުގައި ހުރި ވަސީލަތް ތަކަށް ހަމަލާ ދިނުމަކީ ސަރަހައްދީ ހަމަ ޖެހުމަށް އޮތް ބޮޑު ނުރައްކަލެއްގެ ގޮތުގައި މަސްރަހު ދިރާސާ ކުރާ ފަރާތްތަކުން ދެކެ އެވެ.
މަސްދަރު: އަލް އަރަބިއްޔާ
