އީރާން އިން ހުރިހާ ރަތް ރޮނގު ހުރަސް ކޮށްފި: ޤަތަރު

ޤަތަރުގެ ރަސް ލައްފާން ގޭސް ފެސިލިޓީ އަށް އަމާޒުކޮށް އީރާން އިން ހަމަލާ ދިނުމާ ގުޅިގެން، އެކަން ކުށްވެރިކޮށް ޤަތަރުގެ ފޮރިން މިނިސްޓްރީ އިން ބަޔާނެއް ނެރެފި އެވެ.

ޤަތަރުގެ ފޮރިން މިނިސްޓްރީ އިން ނެރެފައިވާ ބަޔާނެއްގައި ބުނެފައި ވަނީ، އީރާން އިން ރަތް ރޮނގު ހުރަސް ކޮށްފައިވާ ކަމަށެވެ. އަދި ޤަތަރުގެ ރަސް ލައްފާން ގޭސް ފެސިލިޓީ އަށް އަމާޒުކޮށް އީރާން އިން ދިން ހަމަލާ ކުށްވެރި ކުރާ ކަމަށް ބުނެފައިވެ އެވެ. 

މީގެ އިތުރުން އެ ބަޔާނުގައި ބުނެފައި ވަނީ، އީރާންގެ އެ ހަމަލާ އަކީ ސަރަހައްދީ ހަމަ ޖެހުމަށް ވެސް އޮތް ބޮޑު ނުރައްކަލެއް ކަމަށެވެ. އީރާން އިން ސަރަހައްދުގެ ޤައުމު ތަކަށް އަމާޒުކޮށް ދެމުން އަންނަ ހަމަލާ ތަކަކީ އާންމު ރައްޔިތުންނާއި، މަދަނީ އިންފްރާސްޓްރަކްޗާގެ އިތުރުން، ޤައުމުތަކުގެ މުހިންމު ވަސީލަތް ތަކަށް ނުރައްކާވާ ގޮތަށް ދެމުން އަންނަ ހަމަލާ ތަކެއް ކަމަށް ބުނެފައިވެ އެވެ.

މި ހަމަލާތަކާ އެކު، އީރާން އިން ހުރިހާ ރަތް ރޮނގެއް ހުރަސް ކޮށްފައިވާ ކަމަށް، ފޮރިން މިނިސްޓްރީގެ ބަޔާނުގައި ބުނެފައިވެ އެވެ. މީގެ އިތުރުން އެއްވެސް އަސާސެއް ނެތް މިފަދަ ހަމަލާ ތަކުގެ ސަބަބުން ސަރަހައްދަށް ކުރިމަތި ވެދާނެ ނުރައްކާތެރި ނަތީޖާ ތަކުން ސަލާމަތް ވުމަށް، ޤަތަރުން ވަނީ ގޮވާލައިފަ އެވެ. އަދި މަސްރަހު ފިނި ކުރުމަށް މަސައްކަތްކޮށް، ސަރަހައްދީ އަދި ބައިނަލްއަޤުވާމީ ސަލާމަތާއި ހަމަޖެހުން ޤައިމު ކުރުމަށް ހުރިހާ ފަރާތް ތަކުން އިސްކަން ދިނުމަށް ވެސް ބަޔާނުގައި ގޮވާލަވައިފަ އެވެ.