ރޫބިއޯ އާއި ހެގްސެތު ދިރިއުޅުއްވާ އަސްކަރީ މަަރުކަޒެއްގެ މަތިން ޑްރޯން ތަކެއް އުދުހުމާ އެކު، ބިރުވެރިކަން ބޮޑު ވެއްޖެ

އެމެރިކާގެ ސެކްރެޓަރީ އޮފް ސްޓޭޓް މާކޫ ރޫބިއޯ އާއި، ސެކްރެޓަރީ އޮފް ވޯ ޕީޓް ހެގްސެތު ދިރިއުޅުއްވާ އަސްކަރީ މަރުކަޒެއްގެ މަތިން ޑްރޯން ތަކެއް އުދުހެން ފެށުމާ އެކު، އެކަން ސަމާލުކަމަށް އައިސްފައިވާ ކަމަށް ރިޕޯޓު ކޮށްފި އެވެ.

މިކަން ރިޕޯޓު ކޮށްފައި ވަނީ ވޮޝިންޓަން ޕޯސްޓުގަ އެވެ. އެކަމާ ގުޅޭ މައުލޫމާތު ހުރި ތިން މަސްދަރަކުން ބުދަ ދުވަހު ބުނެފައި ވަނީ، ފޯޓް މެކްނެއާ އަސްކަރީ މަރުކަޒުގެ މަތިން މިދިޔަ ހަފުތާގެ ތެރޭގައި ޑްރޯން ތަކެއް ފެނިފައިވާ ކަމަށެވެ. އަދި އެއީ ގޮތް ނޭނގޭ ޑްރޯން ތަކެއް ކަމަށް ވެސް ފާހަގަ ކޮށްފައިވެ އެވެ. 

ވޮޝިންޓަން ޕޯސްޓުގައި ބުނެފައި ވަނީ އެ ޑްރޯން ތަކަކީ ކޮން ބައެއްގެ އެއްޗެއް ކަމެއް، ނުވަތަ ކޮން ތަނަކުން އައި އެއްޗެއް ކަމެއް އެމެރިކާގެ އޮފިޝަލުންނަށް މިހާތަނަށް ދެނެގަނެވިފައި ނުވާ ކަމަށެވެ. މި ހާދިސާއާ ގުޅިގެން ރޫބިއޯ އާއި ހެގްސެތު އެހެން ތަނަކަށް ބަދަލު ކުރުމާ މެދު އޮފިޝަލުން މަޝްވަރާ ކޮށްފައިވާ ކަމަށް ވެސް، ވޮޝިންޓަން ޕޯސްޓުގައި ބުނެފައިވެ އެވެ. ނަމަވެސް، އެމެރިކާ ސަރުކާރުގެ އިސް އޮފިޝަލުންނާ ހަވާލާދީ އެ ނޫހުގައި ބުނެފައި ވަނީ، މިހާތަނަށް ރޫބިއޯ އާއި ހެގްސެތު އެހެން ތަނަކަށް ބަދަލު ކޮށްފައި ނުވާ ކަމަށެވެ. 

މި ހާދިސާ ދިމާވެފައި މި ވަނީ، އެމެރިކާ އާއި އިޒްރޭލް އިން އީރާންއާ ދެކޮޅަށް ކުރިއަށް ގެންދާ ހަނގުރާމައިގެ ސަބަބުން، އެމެރިކާގެ އެލާޓް ލެވެލް ވެސް މަތި ކޮށްފައިވާ ދަނޑިވަޅެއްގަ އެވެ. މި ހާދިސާއާ ގުޅިގެން އެމެރިކާގެ ސްޓޭޓް ޑިޕާޓްމަންޓާއި، ޕެންޓަގަން އިން މިހާތަނަށް ވަކި އެއްޗެއް ބުނެފައި ނުވެ އެވެ. 

ޕެންޓަގަންގެ ތަރުޖަމާނު ސޯން ޕާނެލް ވަނީ، މި ހާދިސާއާ ގުޅިގެން ވޮޝިންޓަން ޕޯސްޓަށް މައުލޫމާތު ދިނުމަށް އިންކާރު ކުރައްވައިފަ އެވެ. އޭނާ ވިދާޅުވީ، ސާލަމަތީ ސަބަބު ތަކަށްޓަކައި ސެކްރެޓަރީ ހެގްސެތު ވަޑައިގަންނަވާ ތަންތަނާއި، އުޅުއްވާ ތަން ތަނުގެ މައުލޫމާތު ހިއްސާ ނުކުރެވޭނެ ކަމަށެވެ. އަދި އެ ފަދަ މައުލޫމާތުތައް ރިޕޯޓު ކުރުމަކީ، ނުހަނު ޒިންމާދާރުކަން ކުޑަ އަމަލެއްގެ ގޮތުގައި އޭނާ ވަނީ ސިފަ ކުރައްވައިފަ އެވެ.