ކެތްތެރި ވެގެން ތިބެވޭނީ ވަކި ވަރަކަށް، ކެތްތެރިކަން ކޮޅުން ލާނެ ދުވަހެއް ނޭނގޭ: ސައުދީގެ ފޮރިން މިނިސްޓަރު
ކެތްތެރި ވެގެން ތިބެވޭނީ ވެސް ވަކި ވަރަކަށް ކަމަށް ޕްރިންސް ފައިޞަލް ވަނީ ވިދާޅުވެފައި. އެއާ އެކު ޕްރިން ފައިޞަލް ވިދާޅުވީ އެ ކެތްތެރިކަން ކޮޅުން ލާނީ އެއް ދުވަހުން ކަމެއް، ނުވަތަ ދެ ދުވަހުން ކަމެއް، ނުވަތަ ހަފުތާ އަކުން ކަމެއް ދަންނަވަން ބޭނުންފުޅު ނުވާ ކަމަށް.
ސައުދީ އަރަބިއްޔާގެ ފޮރިން މިނިސްޓަރު ޕްރިންސް ފައިޞަލް ބިން ފަރުޙާން. | ގެޓީ އިމޭޖަސް
އީރާން އިން ސަރަހައްދުގެ ޤައުމު ތަކަށް ދެމުން އަންނަ ހަމަލާތަކާ ގުޅިގެން، ކެތްތެރިކަމާ އެކު ތިބެވޭނީ ވަކި ވަރަކަށް ކަމަށް ސައުދީ އަރަބިއްޔާގެ ފޮރިން މިނިސްޓަރު ޕްރިންސް ފައިޞަލް ބިން ފަރުޙާން ވިދާޅުވެއްޖެ އެވެ.
ސައުދީގެ ފޮރިން މިނިސްޓަރު ޕްރިންސް ފައިޞަލް މިހެން ވިދާޅުވެފައި ވަނީ، ބުދަ ދުވަހު ސައުދީ އަރަބިއްޔާގެ ވެރި ރަށް ރިޔާޟުގައި ކުރިއަށް ދިޔަ ޖީސީސީ އާއި، އަރަބި އަދި އިސްލާމީ ޤައުމު ތަކުގެ ފޮރިން މިނިސްޓަރުންގެ ބައްދަލުވުމަށް ފަހު އެވެ.
އީރާން އަށް ވަރަށް ބޮޑަށް ފާޑު ވިދާޅުވެ ވާހަކަ ދައްކަވަމުން ޕްރިންސް ފައިޞަލް ވިދާޅުވީ، ސައުދީ އަރަބިއްޔާ އާއި އެ ޤައުމުގެ ބައިވެރިންނަކީ ވަރުގަދަ ޤާބިލުކަން ލިބިގެންވާ ބައެއް ކަމަށެވެ. ނަމަވެސް، މިހާތަނަށް ސައުދީ އިން ކެތްތެރިކަން ދައްކަމުން އައިކަން ފާހަގަ ކުރައްވައި ޕްރިންސް ފައިޞަލް ވިދާޅުވީ، ކެތްތެރި ކަމަކީ ވަކި އިންތަކެއް އޮތް ކަމެއް ކަމަށެވެ.
ކެތްތެރި ވެގެން ތިބެވޭނީ ވެސް ވަކި ވަރަކަށް ކަމަށް އޭނާ ވަނީ ވިދާޅުވެފަ އެވެ. އެއާ އެކު ޕްރިން ފައިޞަލް ވިދާޅުވީ އެ ކެތްތެރިކަން ކޮޅުން ލާނީ އެއް ދުވަހުން ކަމެއް، ނުވަތަ ދެ ދުވަހުން ކަމެއް، ނުވަތަ ހަފުތާ އަކުން ކަމެއް ދަންނަވަން ބޭނުންފުޅު ނުވާ ކަމަށެވެ. މިއީ އީރާން އަށް އަމާޒުކޮށް، ސައުދީގެ ފޮރިން މިނިސްޓަރު ޕްރިން ފައިޞަލް ދެއްވި ވަރަށް ވަރުގަދަ އިންޒާރެކެވެ.
އިތުބާރު ގެއްލިއްޖެ ކަމަށް ވިދާޅުވެ، އީރާންއާ ދެކޮޅަށް އަސްކަރީ ފިޔަވަޅު އަޅަން ޖެހިދާނެ ކަމުގެ އިންޒާރު ސައުދީގެ ފޮރިން މިނިސްޓަރު ދެއްވައިފި
އެމެރިކާ އާއި އިޒްރޭލް އިން އީރާންއާ ދެކޮޅަށް ހަނގުރާމަ ފަށާފައި ވަނީ ފެބްރުވަރީ މަހުގެ 28 ވަނަ ދުވަހު އެވެ. އެ ހަމަލާ ތަކުގެ ރައްދުގައި އީރާން އިން ވެސް ވަނީ ހަމަލާ ދޭން ފަށައިފަ އެވެ. އެގޮތުން އީރާން އިން ވަނީ، ސަރަހައްދުގައި ހުރި އެމެރިކާގެ ބޭސް ތަަކަށް އަމާޒުކޮށް ވަރުގަދަ ހަމަލާ ތަކެއް ދީފަ އެވެ. އެ ހަމަލާތައް ހުއްޓުވުމުގެ ތެރޭގައި ބައެއް ޤައުމު ތަކަށް ގެއްލުންތައް ލިބިފައިވެ އެވެ.
އީރާން އިން ބުނެފައި ވަނީ އެ ޤައުމުން ސަރަހައްދީ އެެއްވެސް ޤައުމަކަށް އަމާޒުކޮށް ހަމަލާއެއް ނުދޭނެ ކަމަށެވެ. ނަމަވެސް، ސަރަހައްދުގެ ޤައުމު ތަކުގައި އެމެރިކާގެ އަސްކަރީ ބޭސްތައް ހުރުމަކީ، އީރާން އިން އަތް ބަނދެގެން އޮންނަން ޖެހޭ ސަބަބެއް ނޫން ކަމަށް އެ ޤައުމުން ބުނެފައިވެ އެވެ. އަދި އީރާންގެ ހަމަލާތައް އަމާޒު ކުރާނީ އެމެރިކާގެ އަސްކަރީ ބޭސް ތަކަށް ކަަމަށް އެ ޤައުމުން ވަނީ ތަކުރާރުކޮށް ބުނެފަ އެވެ.
މަސްދަރު: އަލް އަރަބިއްޔާ
