ދުނިޔޭގެ އެންމެ ބޮޑު ގޭސް ސްޓޭޝަން އަށް އިޒްރޭލް އިން ހަމަލާ ދިނުމުން، ނުތަނަވަސްކަން ބޮޑު ވެއްޖެ

ދުނިޔޭގެ އެންމެ ބޮޑު ޤުދުރަތީ ގޭސް ސްޓޭޝަން ކަމަށްވާ، ސައުތު ޕާސްއާ ގުޅުން ހުރި އީރާންގެ މަރުކަޒު ތަކަކަށް އިޒްރޭލް އިން ހަމަލާ ދީފައިވާއިރު، އެކަމުގެ ސަބަބުން އީރާން އިން ވެސް ވަރުގަދަ ހަމަލާ ތަކެއް ދީފި އެވެ. 

ސައުތު ޕާސް އަށް ދިން ހަމަލާއާ ގުޅިގެން އޮމާން އިން ވަނީ އެކަން ކުށްވެރި ކޮށްފަ އެވެ، އަދި އެ ހަމަލާ އަކީ ނުރައްކާތެރި ހަމަލާއެއްގެ ގޮތުގައި އޮމާން އިން ސިފަ ކޮށްފައިވެ އެވެ. މީގެ އިތުރުން ޔޫއޭއީ އިން ބުނެފައި ވަނީ، އެ ހަމަލާ އަކީ ދުނިޔޭގެ ހަކަތައިގެ ރައްކާތެރި ކަމަށް ނުރައްކާ ވާނެ ހަމަލާއެއް ކަމަށެވެ. 

ދުނިޔޭގެ އެންމެ ބޮޑު ގޭސް ސްޓޭޝަން އަށް އިޒްރޭލް އިން ހަމަލާ ދީފައިވާއިރު، މީގެ ކުރިން އެމެރިކާގެ ރައީސް ޑޮނަލްޑް ޓްރަމްޕް ވަނީ އީރާންގެ ހަކަތައިގެ ވަސީލަތް ތަަކަށް ހަމަލާ ދޭނެ ކަމުގެ އިންޒާރު ދެއްވައިފަ އެވެ. އިޒްރޭލްގެ މި ހަމަލާއާ ގުޅިގެން، އޭގެ ރައްދުގައި އީރާން ވަނީ މެދު އިރުމަތީގައި ހުރި މުހިންމު ހަަކަތައާ ގުޅުން ހުރި މަރުކަޒު ތަކަށް ހަމަލާ ދީފަ އެވެ. 

ސައުތު ޕާސް އަކީ 9700 އަކަ ކިލޯ މީޓަރުގެ ގޭސް ސްޓޭޝަންގެ ބައެއް ކަަމށްވާއިރު، މި ސްޓޭޝަން އީރާން އާއި ޤަތަރުން ހިއްސާ ކުރެ އެވެ. އީރާންގެ ސައުތު ޕާސް އަކީ މި ސްޓޭޝަންގެ ތިން ބައި ކުޅަ އެއް ބައި ކަމަށްވާއިރު، ޤަތަރުގެ ބަޔަށް ނޯތު ޑޯމް، ނުވަތަ ނޯތު ފީލްޑް ކިޔަ އެވެ. 

މި ގޭސް ސްޓޭޝަން އޮންނަނީ ޕާޝިއަން ގަލްފުގެ ދަށުގައި ކަމަށްވާއިރު، އީރާން އިން ހޮރްމޫޒް ކަނޑު އޮޅި ބަންދު ކުރުމާ ގުޅިގެން، ގާތް ގަނޑަކަށް 400 ކަނޑުދަތުރު ކުރާ ބޯޓުތައް ހުރީ މި ސަރަހައްދުގައި ހުއްޓިފައި އެވެ. ދުނިޔޭގެ ތެލުގެ ވިޔަފާރީގެ 20 އިންސައްތަ ކުރިއަށް ދަނީ ހޮރްމޫޒް ކަނޑު އޮޅިންނެވެ. 

މި ގޭސް ސްޓޭޝަންގައި އޮންނަ ޤުދުރަތީ ގޭސްގެ މިންވަރި، 14 އިން 51 ޓްރިލިއަން ކިއުބިކް މީޓަރަށް އަންދާޒާ ކުރެވިފައިވެ އެވެ. ބައިނަލްއަޤުވާމީ ހަކަތައާ ބެހޭ އެޖެންސީ އިން ބުނާ ގޮތުން، އީރާން އަކީ ދުނިޔޭގެ ހަތަރު ވަަނަ އަށް އެންމެ ބޮޑު ޤުދުރަތީ ގޭސް ބޭނުން ކުރާ ޤައުމެވެ.

ސައުތު ޕާސް އަކީ އީރާންގެ ހަކަތައާ ގުޅުން ހުރި ބިންގާ ކަމަށްވާއިރު، އީރާންގެ ކަރަންޓުގެ 80 އިންސައްތަ އުފައްދަނީ ގޭހުން ކަމަށާއި، އެ ގޭސްގެ ބޮޑުބައި ލިބެނީ ސައުތު ޕާސް އިން ކަމަށް ބައިނަލްއަޤުވާމީ ހަކަތައާ ބެހޭ އިދާރާ އިން ބުނެފައިވެ އެވެ.