ޓްރަމްޕްގެ ޚާއްސަ މަންދޫބު ސާޖިއޯ ގޯ ރާއްޖެ ވަޑައިގަންނަވަނީ

އެމެރިކާގެ ރައީސް ޑޮނަލްޑް ޓްރަމްޕްގެ ޚާއްސަ މަންދޫބު، ސާޖިއޯ ގޯ ދިވެހި ރާއްޖެ ވަޑައިގަންނަވާ ގޮތަށް ހަމަޖެހިއްޖެ އެވެ.

ސާޖިއޯ ގޯ އަކީ އެމެރިކާގެ ފަރާތުން ދެކުނު އޭޝިއާ އަދި މެދު ތެރޭގެ އޭޝިއާ އަށް ކަނޑަ އަޅުއްވާފައި ހުންނަވާ ޚާއްސަ މަންދޫބެވެ. ސަރަހައްދީ ޤައުމު ތަކަށް ކުރައްވާ ދަތުރުފުޅުގައި ބުރާސްފަތި ދުވަހު އޭނާ ވަނީ ސްރީ ލަންކާ އަށް ވަޑައިގެންފަ އެވެ. 

އެމެރިކާގެ ސްޓޭޓް ޑިޕާޓްމަންޓް އިން ބުނެފައި ވަނީ، ސާޖިއޯ ގޯގެ މި ދަތުރުފުޅަކީ އިންޑިއާ ކަނޑުގެ ޤައުމު ތަކާ އެކު އޮންނަ ގުޅުން ބަދަހި ކުރުމަށް ކުރައްވާ ދަތުރުފުޅެއް ކަމަށެވެ. ބުރާސްފަތި ދުވަހު ފެއްޓެވި މި ދަތުރުފުޅު ކުރިއަށް ދާނީ މާޗު މަހުގެ 24 ވަނަ ދުވަހާ ހަމައަށެވެ. 

ސްރީ ލަންކާ އަށް ފަހު، ދެން ސާޖިއޯ ގޯ ވަޑައިގަންނަވާނީ ރާއްޖެ އެވެ. ރާއްޖެ އަށް ކުރައްވާ ދަތުރުފުޅުގައި ދިވެހި ސަރުކާރުގެ އިސްވެެރިންނާ ބައްދަލު ކުރައްވައި، ދެ ޤައުމުގެ ދެ މެދުގައި އޮތް ބައިލެޓްރަލް ގުޅުން އިތުރަށް ވަރުގަދަ ކުރުމަށް މަޝްވަރާ ކުރައްވާނެ ކަމަށް ވަނީ ބުނެފަ އެވެ. އޭގެ ތެރޭގައި ސަލާމަތީ ދާއިރާ އިން އެއްބާރުލުން ދިނުމާއި، އުމްރާނީ ތަރައްޤީ އަދި އިޤްތިޞާދީ ކުރިއެރުމަށް އެމެރިކާ އިން އެހީތެރިކަން ފޯރުކޮށްދެވޭނެ ދާއިރާތައް ދެނެގަތުން ހިމެނޭ ކަމަށް ވެސް ބުނެފައިވެ އެވެ.

މި ދަތުރުފުޅުގައި ސާޖިއޯ ގޯ، ރާއްޖޭގެ ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒުއާ ބައްދަލު ކުރައްވާނެ ކަމަށް ވެސް ވަނީ ބެލެވިފަ އެވެ. ނަމަވެސް، އެމެރިކާ އިން ވެސް އަދި ރާއްޖެ އިން ވެސް އެފަދަ ކަމެއް ފާހަގަ ކޮށްފައި ނުވެ އެވެ. 

ސާޖިއޯ ގޯ ރާއްޖެ ވަޑައިގަންނަވާ މި ދުވަސްވަރު ދިމާވެފައި މި ވަނީ، އެމެރިކާ އާއި އިޒްރޭލް އެކުވެގެން އީރާާންއާ ދެކޮޅަށް ވަރުގަދަ ހަނގުރާމައެއް ކުރަމުން އަންނަ ދުވަސްވަރާ އެވެ.