އިތުބާރު ގެއްލިއްޖެ ކަމަށް ވިދާޅުވެ، އީރާންއާ ދެކޮޅަށް އަސްކަރީ ފިޔަވަޅު އަޅަން ޖެހިދާނެ ކަމުގެ އިންޒާރު ސައުދީގެ ފޮރިން މިނިސްޓަރު ދެއްވައިފި

އީރާންއާ ދެކޮޅަށް އަސްކަރީ ފިޔަވަޅު އެޅުމުގެ ހައްގު ސައުދީ އަރަބިއްޔާ އަށް ލިބިގެންވާ ކަމަށް ވިދާޅުވެ، އެ ޤައުމުގެ ފޮރިން މިނިސްޓަރު ޕްރިންސް ފައިޞަލް ބިން ފަރުޙާން ވަރުގަދަ އިންޒާރެއް ދެއްވައިފި އެވެ. 

ސައުދީގެ ވެރި ރަށް ރިޔާޟުގައި ބުދަ ދުވަހުގެ ރޭ އޮތް އަރަބި އަދި އިސްލާމީ ޤައުމު ތަކުގެ ފޮރިން މިނިސްޓަރުންގެ ކުއްލި ބައްދަލުވުމަށް ފަހު އޮތް ނޫސްވެރިންގެ ބައްދަލުވުމުގައި ވާހަކަ ދައްކަވަމުން ސައުދީގެ ފޮރިން މިނިސްޓަރު ވިދާޅުވީ، ހަނގުރާމައިގެ ކުރިން އީރާން އާއި ސައުދީއާ ދެމެދު އޮތް ކުޑަ ކުޑަ އިތުބާރު ވެސް މިހާރު މުޅިން ނެތިގޮސްފައިވާ ކަމަށެވެ. އަދި އީރާނުން ކުރަމުން އަންނަ ކަންތައްތަކާއި، އެ ޤައުމުން ނިންމަމުން އަންނަ ނިންމުންތައް އަލުން މުރާޖައާ ކުރުމަށް ވެސް ފޮރިން މިނިސްޓަރު ގޮވާލެއްވި އެވެ. 

އީރާން އިން މިދިޔަ ބުދަ ދުވަހު ސައުދީގެ ތެޔޮ ސާފު ކުރާ ކާރުޚާނާ އަކަށް ހަމަލާ ދީފައިވާކަން ފާހަގަ ކުރައްވައި ޕްރިންސް ފައިޞަލް ވިދާޅުވީ، އެފަދަ ހަމަލާ ތަކުގެ ބޭނުމަކީ ކޮބައިތޯ ވެސް ސުވާލު އުފެދޭ ކަމަށެވެ. އަދި އެފަދަ އަމަލު ތަކުގެ ނަތީޖާ ހިތްދަތި ވާނެކަން އީރާން އިން ދަންނަން ޖެހޭ ކަމަށް ވެސް ސައުދީގެ ފޮރިން މިނިސްޓަރު ޕްރިންސް ފައިޞަލް ވަނީ ވިދާޅުވެފަ އެވެ. 

މީގެ އިތުރުން ސައުދީގެ ފޮރިން މިނިސްޓަރު ޕްރިންސް ފައިޞަލް ވިދާޅުވީ، ސައުދީ އަރަބިއްޔާ އާއި ގަލްފުގެ އެހެން ޤައުމު ތަކަށް ފިއްތުންތައް ކުރިމަތި ކުރެވިދާނެ ކަމަށް އީރާން އިން ހީކުރުމަކީ، ވަރަށް ބޮޑު ކުށްހީއެއް ކަމަށެވެ. އީރާން އިން ކުރިމަތި ކުރާ މިފަދަ ފިއްތުން ތަކުގެ ސަބަބުން، ސިޔާސީ ގޮތުންނާއި، އަޚުލާޤީ ގޮތުން އެ ޤައުމަށް ނޭދެވޭ އަސަރުތައް ކުރާނެ ކަމަށާއި، ކޮންމެހެން ބޭނުންވެއްޖެ ޙާލަތެއްގައި އަސްކަރީ ފިޔަވަޅު އެޅުމުގެ ޙައްޤު ސައުދީ އިން ދަމަހައްޓާނެ ކަމުގެ އިންޒާރު ވެސް ޕްރިންސް ފައިޞަލް ދެއްވި އެވެ. 

އެމެރިކާ އާއި އިޒްރޭލް އިން އީރާންއާ ދެކޮޅަށް ފެށި ހަނގުރާމައިގެ ރައްދުގައި އީރާން އިން ވެސް ގެންދަނީ ވަރުގަދަ ހަމަލާ ތަކެއް ދެމުންނެވެ. އެގޮތުން އީރާން އިން އެންމެ ގިނަ ހަމަލާތައް އަމާޒު ކުރަނީ މެދު އިރުމަތީގައި ހުރި އެމެރިކާގެ އަސްކަރީ ބޭސް ތަަކަށެވެ. އަދި އެމެރިކާގެ އެމްބަސީ ތަަކަށް ވެސް އީރާން އިން ހަަަމަަލާ އަމާޒު ކުރާއިރު، ސައުދީގެ ވަލީ އަހުދު މުޙައްމަދު ބިން ސަލްމާން ވެސް މީގެ ކުރިން ވަނީ އީރާންގެ ހަމަލާތައް ކުށްވެރި ކުރާ ކަމަށް ވިދާޅުވެފަ އެވެ.