އަދާލަތު ޕާޓީއަށް ގިނަގުނަ ހިދުމަތްތަކެއް ކޮށްދެއްވާފައިވާ ޝެއިހް ހަސަން ލަތީފް އެ ޕާޓީން ވަކިވެވަޑައިގަންނަވައިފި
19 ނޮވެމްބަރު 2026 | ބުރާސްފަތި 13:37އަދާލަތު ޕާޓީ އުފެއްދުމުގައި އިސްކޮށް އުޅުއްވި ދީނީ އިލްމުވެރިޔާ ޝެއިހް ހަސަން ލަތީފް މޫސާ އެ ޕާޓީން ވަކިވެވަޑައިގަތީ ސިޔާސީ މަސްރަހާއި ޕާޓީގެ އެތެރޭގެ ކަންކަމާ މެދު ހުރި ކަންބޮޑުވުންތަކާ ގުޅިގެން. ޕާޓީގެ އިލްމުވެރިންގެ މަޖިލީހާއި މަޝްވަރާ މަޖިލީހުގައި ވެސް ޚިދުމަތް ކުރެއްވި ހަސަން ލަތީފް މި ނިންމުން ނިންމަވާފައި މިވަނީ، ވެރިކަން ކުރާ ޕީއެންސީއާއެކު އަދާލަތު ޕާޓީން ކޯލިޝަން ހަދާފައިވާ ދަނޑިވަޅެއްގައި


އަދާލަތު ޕާޓީއަށް ގިނަގުނަ ހިދުމަތްތަކެއް ކޮށްދެއްވާފައިވާ ޝެއިހް ހަސަން ލަތީފް އެޕާޓީން ވަކިވެއްޖެ | ސޯޝަލް މީޑިއާ
ދީނީ އިލްމުވެރިޔާ ޝެއިހް ހަސަން ލަތީފް މޫސާ އަދާލަތު ޕާޓީން ވަކިވެވަޑައިގެންފި އެވެ.
މިކަން ހާމަކޮށްފައި ވަނީ ހަސަން ލަތީފް "އެކްސް" ގައި ކުރެއްވި ޕޯސްޓެއްގަ އެވެ. އެގޮތުން، އޭނާ ވިދާޅުވީ ރާއްޖޭގެ ސިޔާސީ މަސްރަހު ހުރި ގޮތުންނާއި އަދާލަތު ޕާޓީގެ އެތެރޭގައި މިހާރު ހިނގަމުންދާ ބައެއް ކަންކަމާމެދު ނިހާޔަތަށް ކަން ބޮޑުވެވަޑައިގަންނަވާތީ ބުދަ ދުވަހު ރޭގެ ވަގުތެއްގައި އަދާލަތު ޕާޓީން ވެކިވެވަޑައިންގަންނަވާފައިވާ ކަމަށެވެ.
ހަސަން ލަތީފްއަކީ އެންމެ ފުރަތަމަ އަދާލަތު ޕާޓީ އުފެއްދުމުގައި މަސައްކަތް ކުރައްވާފައިވާ ބޭފުޅެކެވެ. ހަމައެއާއެކު، ހަސަން ލަތީފްއަކީ އަދާލަތު ޕާޓީގެ އިލްމުވެރިންގެ މަޖިލީހުގެ މެންބަރެއްގެ އިތުރުން މަޝްވަރާ މަޖިލީހުގެ ވެސް މެންބަރުކަން ކުރައްވާފައިވާ ބޭފުޅެކެވެ.
މީގެ އިތުރުން، އިސްލާމްދީނަށް ހޭލުންތެރިކަން އިތުރުކުރުވުމާއި، ދީނަށް ޚިދުމަތްކުރުމާއި ދީނީ އިލްމު އުނގަންނައިދިނުމުގެ ދާއިރާއިން ހިތްވަރު ދިނުމުގެ ގައުމީ އިނާމު ވަނީ ހަސަން ލަތީފްއަށް 2023 ވަނަ އަހަރު ލިބިވަަޑައިގަންނަވާފަ އެވެ.
ހިނގަމުން މިދާ ރިޔާސީ ދައުރުގެ ބާކީ އޮތް މުއްދަތުގައި ސަރުކާރުގައި ބައިވެރިވުމާއި، ކުރިއަށް އޮތް ރިޔާސީ އިންތިޚާބުގައި ރައީސް ޑރ. މުހައްމަދު މުއިއްޒުއަށް ތާއީދު ކުރުމަށް ނިންމައި، ވެރިކަން ކުރާ ޕާޓީ ޕީޕަލްސް ނޭޝަނަލް ކޮންގްރެސް (ޕީއެންސީ) އާއެކު އަދާލަތު ޕާޓީން ކޯލިޝަން ހަދާފައި ވަނީ ނޮވެންބަރު މަހުގެ 16 ވަނަ ދުވަހު އެވެ.











