ބުދަ ދުވަހުގެ ރޭ (މިރޭ) ޗެމްޕިއަންސް ލީގުގެ ސެމީ ފައިނަލް ދެވަނަ ލެގުގެ މެޗަށް ނުކުންނައިރު ސަމާލުވާން ޖެހޭ ކަމަށާއި ފައިނަލް ޔަގީންނުވާ ކަމަށް ރެއާލް މެޑްރިޑް ކޯޗު ޒިނެދިން ޒިދާން ބުނެފިއެވެ.

މެޗުގެ ނޫސްވެރިންނާއި ވާހަކަ ދައްކަމުން ޒިދާންބުނީ ރެއާލް މެޑްރިޑުން މިރޭގެ މެޗަށް ނުކުންނައިރު ސަމާލުވާން ޖެހޭ ކަމަށެވެ.

ފުރަތަމަ ލެގުގައި އެތުލެޓިކޯ މެޑްރިޑް އަތުން މޮޅުވިޔަސް އެވަރަކުން ފައިނަލަށް ދާނެކަން ޔަގީންނުވާ ކަމަށް ޒިދާން ބުންޏެވެ.

ޒިދާން ބުނި ގޮތުގައި މެޗެއްގެ 90 މިނިޓަކީ ނަތީޖާ ބަދަލުކުރަން ލިބޭ ގިނަ ވަގުތުތަކެވެ.

މި ދެޓީމުގެ ފުރަތަމަ ކުރިމަތިލުން ރެއާލް އިން ކާމިޔާބުކުރީ 0-3 ގެ ނަތީޖާއަކުންނެވެ. އެމެޗުގައި ރެއާލްގެ ތިން ލަނޑުވެސް ޖަހާފައިވަނީ ކްރިސްޓިއާނޯ ރޮނާލްޑޯއެވެ.

ފުރަތަމަ މެޗު ރެއާލްގެ ދަނޑުގައި ކުޅެފައިވާއިރު ދެވަނަ މެޗު ކުޅެންޖެހޭނީ އެތްލެޓިކޯގެ ދަނޑުގައެވެ. ޒިދާން ބުނާގޮތުގައި އެތުލެޓިކޯ ދަނޑުގައި 90 މިނިޓް ކުޅެން ޖެހޭއިރު އެއީ ދިގު ވަގުތެކެވެ.

މި މެޗަށް ތައްޔާރުވުމަށް ރެއާލުން ވަނީ އެންމެ ފަހުން ލީގުގައި ކުޅުނު މެޗުގައި ރޮނާލްޑޯ އަށް އަރާމްކުރަން ފުރުސަތު ދީފަ އެވެ.

އަނިޔާގެ ސަބަބުން ރެއާލްގެ ގަރެތު ބޭލް އަށް މިރޭގެ މެޗުގައި ނުކުޅެވޭނެ އެވެ.

މި ދެޓީމުގެ މީގެކުރިންވެސް ޗެމްޕިއަންސް ލީގުގައި ވަނީ ވާދަކޮށްފައެވެ. އެގޮތުން 2014 ވަނަ އަހަރާއި މިދިޔަ އަހަރު އެތުލެޓިކޯ ބަލިކޮށް ޗެމްޕިއަންކަން ހޯދި ރެއާލްއެވެ.