މޯހަން ބަގާންގެ ހެޑްކޯޗާއެކު ގިނަ ކުޅުންތެރިން އޭއެފްސީ ކަޕް މެޗަށް ރާއްޖެ ނާދޭ

އިންޑިއާގެ މޯހަން ބަގާންގެ ހެޑް ކޯޗު ސަންޖޯއި ސެންގެ އިތުރުން ބައެއް ކުޅުންތެރިން އޭއެފްސީ ކަޕްގެ ޕްލޭއޮފް އަށް ރާއްޖެ ނާންނަކަމަށް ގޯލްޑޮޓްކޮމް އިން ބުނެފި އެވެ.

މޯހަން ބަގާން ޓީމު އާދީއްތަ ދުވަހު ރާއްޖެ އައިސްފައިވާއިރު، އެޓީމުގެ ކޯޗުގެ އިތުރުން ފަސްޓް ޓީމުގައި ހިމެނޭ ޑެބްޖިތް، ޕްރިތަމް، ޕްރޯނޭ، ސޮވިކް އަދި އެންމެ މުހިންމު ކުޅުންތެރިޔާ ޖޭޖޭ ޓީމާއެކު ދަތުރުނުކުރާ ކަމަށް ގޯލްޑޮޓްކޮމް އިން ވަނީ ބުނެފައެވެ. މި ފަސް ކުޅުންތެރިންގެ އިތުރުން ނޯޑް ވެސް ޓީމާއެކު ދަތުރުނުކުރެއެވެ.

މީގެއިތުރުން ގޯލްޓްކޮމް އިން ބުނީ ކޯޗު ޓީމާއެކު ދަތުރުނުކުރީ އާއިލީ ޒިންމާތަކެއް އަދާކުރަން ކަމަށާއި، ޓީމަށް ވެލެންސިއާ މެޗުގައި އިރުޝާދު ދޭނީ އެސިސްޓެންޓް ކޯޗު ޝަކްރަބަތީ އެވެ.

މޯހަން ބަގާން ވަނީ ވެލެންސިއާ މެޗުގެ ކުރިން އިންޑިއަން ސުޕާ ލީގުގައި ޝިވަޖިއަންސްއާ ދެކޮޅަށް ކުޅުނު މެޗު 1-3 ގެ ނަތީޖާއިން ކާމިޔާބުކޮށްފައެވެ. މީގެއިތުރުން ވެލެންސިއާ ވަނީ ޗެރިޓީ ޝިލްޑް މެޗުގައި މާޒިޔާ އަތުން 0-1 ގެ ނަތީޖާއިން ބަލިވެފައެވެ.

ވެލެންސިއާ ޕްލޭއޮފުން ޖާގަ ހޯދީ ބޫޓާންގެ ތިމްޕޫ އެފްސީ 0-3 ގެ އެގްރިގޭޓް ނަތީޖާއިން ކާމިޔާބުކޮށްގެންނެވެ. މޯހަން ބަގާން ޕްލޭއޮފުން ޖާގަ ހޯދީ ކޮލޮމްބޯ އެފްސީއާ ވާދަކޮށް 3-4 ގެ އެގްރިގޭޓް ނަތީޖާއިން ބަލިކުރުމަށްފަހު އެވެ.