މިނިވަން 50 ޗެމްޕިއަންޝިޕްގައި ޓީމުތަކަށް ދޭން ޖެހޭ ފައިސާ މި އަހަރު ބަޖެޓުގެ ތެރެއިން ދެނީ!
މިނިވަން 50 ޗެމްޕިއަންޝިޕްގައި ޓީމުތަކަށް ދޭން ޖެހޭ ބައެއް ފައިސާތައް ހުންނާނެ: އެފްއޭއެމް
މިނިވަން 50 ޗެމްޕިއަންޝިޕްގެ ފައިނަލް މެޗުގެ ތެރެއިން
މިނިވަން 50 ޗެމްޕިއަންޝިޕްގައި ޓީމުތަކަށް ދޭންޖެހޭ ފައިސާ މިއަހަރުގެ ބަޖެޓުގެ ތެރެއިން ދޭނެ ކަމަށް ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން ބުނެފި އެވެ.
ރާއްޖެއެމްވީ އަށް މައުލޫމާތު ދެމުން އެފްއޭއެމްގެ ޖެނެރަލް ސެކެޓްރީ ހުސެއިން ޖަވާޒް (ޖަވާ) ވިދާޅުވީ، މިނިވަން 50 ޗެމްޕިއަންޝިޕްގައި ޓީމުތަކަށް ދޭން ޖެހޭ ބައެއް ފައިސާތައް ހުންނާނެ ކަމަށާއި، އެ ފައިސާތައް މި އަހަރު އަލަށް ހަދާ ބަޖެޓްގައި ހިމަނަން ނިންމާފައިވާ ކަމަށެވެ.
އެހެން ނަމަވެސް ޓީމުތަކަށް ދޭން ޖެހޭ ފައިސާގެ ތަފްސީލެއް ނުދެއްވައެވެ. ރާއްޖެއެމްވީ އަށް އެނގިފައިވާ ގޮތުގައި އެފްއޭއެމް ދަރަނީގެ ގޮތުގައި ހިމެނޭ 17 މިލިއަން ރުފިޔާ ތެރޭގައި ޓީމުތަކަށް ދޭން ޖެހޭ 1.4 މިލިއަން ރުފިޔާ ވެސް ހިމެނެއެވެ.
މީގެ އިތުރުން ނިމިގެންދިޔަ މިނިވަން ޗެމްޕިއަންޝިޕްގައި ބައެއް ޓީމުތަކަށް ދޭން ޖެހޭ ފައިސާ އަދި ދެވަނަ ޑިވިޝަންގެ ބައެއް ކްލަބްތަކަށް ދޭންޖެހޭ ފައިސާ ވެސް މި އަހަރު އެފްއޭއެމް އިން ދޭން މަސައްކަތްކުރަމުން އަންނަ ކަމަށް ޖަވާ ވަނީ ވިދާޅުވެފައެވެ.
މިނިވަން ޗެމްޕިއަންޝިޕަކީ އެފްއޭއެމްއާ ފީފާ އިން އެކުލަވާލި ނޯމަލައިޒޭޝަން ކޮމެޓީން ތައާރަފްކުރި މުބާރާތަކެވެ. އެގޮތުން ފުރަތަމަ ބޭއްވި މުބާރާތް ރާއްޖޭގެ މިނިވަންކަމަށް 50 އަހަރު ފުރުނު އަހަރާ ދިމާވުމުން އެ މުބާރާތަށް ކިޔާފައިވަނީ މިނިވަން ޗެމްޕިއަންޝިޕެވެ.
މިނިވަން ޗެމްޕިއަންޝިޕުން އާ މޫނުތައް ފެނިގެންދާއިރު، ވަރުގަދަ ޓީމުތައް ވެސް ވަނީ ފެނިގެންގޮސްފައެވެ. އެގޮތުން ފުރަތަމަ ބޭއްވި މިނިވަން ޗެމްޕިއަންޝިޕްގެ ޗެމްޕިއަންކަން ހޯދި ސ.ފޭދޫ ވަނީ ގައުމީ މުބާރާތުގައި މިދިޔަ އަހަރު ވާދަކޮށް ރަނގަޅު ނަތީޖާތަކެއް ވެސް ހޯދާފައެވެ.
