އާސެނަލްގެ ކޯޗު އާސެން ވެންގާ ހަތަރު މެޗަށް ސަސްޕެންޑުކޮށް 25،000 ޕައުންޑުން ޖޫރިމަނާކޮށްފި އެވެ.

ވެންގާ ޖޫރިމައިނާކުރީ ބާންލީ އަތުން 1-2 ގެ ނަތީޖާއަކުން އާސެނަލް މޮޅުވި މެޗުގެ ފަހު ވަގުތުކޮޅުގައި ހަތަރު ވަނަ އޮފިޝަލް ޓައިލާ ކޮށްޕާލުމުންނެވެ. އަދި އޭނާގެ މައްޗަށް އެފްއޭއިން ތުހުމަތުކޮށްފައިވަނީ ހުތުރުބަހުން ހަތަރު ވަނަ އޮފިޝަލާ މުހާތަބުކުރުމެވެ.

އެ މެޗުގައި ރެފްރީގެ ނިންމުންތަކާ ވެންގާ ހިތްހަމަ ނުޖެހުނީ 93 ވަނަ މިނެޓުގައި ބާންލީ އަށް ރެފްރީ ޖޯން މޮސް ދިން ޕެނަލްޓީއާ ގުޅިގެންނެވެ. އެ މެޗުގައި ވެންގާގެ އަމަލުތަކާއެކު ފަހު މިނެޓުތައް އޭނާ ހޭދަކުރަން ޖެހިފައިވަނީ ޓަނެލް އޭރިޔާގައެވެ.

ބާންލީ އަށް ލިބުނު ޕެނަލްޓީ އެޓީމުގެ އެންޑްރޭ ގްރޭ ކާމިޔާބުކުރިއިރު، އޭގެ ސިކުންތުކޮޅެއްފަހުން އާސެނަލް އަށް ލިބުނު ޕެނަލްޓީއެއް ކާމިޔާބުކޮށް އެލެކްސަސް ސަންޗޭޒް ވަނީ އެޓީމަށް ލީޑު ނަގައިދީ މެޗު ކާމިޔާބުކޮށްދީފައެވެ.

މެޗަށްފަހު ވާހަކަ ދައްކަމުން ވެންގާ ބުނީ އޭނާގެ އަމަލުތައް ފަހުވަގުތު ހުރިގޮތާ މެދު ފަހުން ދެރަވި ކަމަށާއި، އެއްވެސް އެއްޗެކޭ ނުބުނެ ހަމަޖެހިގެން އެ ދަނޑިވަޅުގައި ގެއަށް ދާންޖެހޭ ކަމަށެވެ. އެގޮތުން އޭނާ ވަނީ އޭނާގެ އަމަލުތަކަށް މައާފަށްވެސް އެދިފައެވެ.

ވެންގާގެ މި ސަސްޕެންޝަނާއެކު އޭނާ އަށް ޗެލްސީއާ ދެކޮޅަށް އަންނަ މަހުގެ ހަތަރުވަނަ ދުވަހު އާސެނަލް ކުޅޭ މެޗުގައި ބެންޗުގައި ހުރުމުގެ ފުރުސަތުވެސް ގެއްލޭނެއެވެ. އެ މެޗުގެ އިތުރުން ވެންގާ އަށް އެފްއޭކަޕްގައި އަންނަ ހޮނިހިރު ދުވަހު ސައުތްހެމްޓަންއާ ދެކޮޅަށް ކުޅޭ މެޗު، ވަޓްފޯޑްއާ ދެކޮޅަށް ކުޅޭ މެޗު އަދި ޕްރިމިއާ ލީގުގައި ހަލް ސިޓީއާ ދެކޮޅަށް ކުޅޭ މެޗުގައިވެސް ބެންޗުން ފުރުސަތު ގެއްލޭނެއެވެ.