އޮފީސް ހޭންޑްބޯލް: ފައިނަލްގެ ދެވަނަ ޖާގަ ޔޫތު މިނިސްޓްރީއަށް

ދެވަނަ އިންޓަ އޮފީސް ހޭންޑްބޯލް މުބާރާތުގެ އަންހެން ޑިވިޝަނުގެ ފައިނަލްގެ ފަހު ޖާގަ ޔޫތު މިނިސްޓްރީން ހޯދައިފި އެވެ.

ޔޫތު މިނިސްޓްރީން މި މުބާރާތުގެ ފައިނަލްގެ ޖާގައެއް ކަށަވަރުކުރީ ބުރާސްފަތި ދުވަހު ހަވީރު ކުޅުނު ސެމީ ފައިނަލް މެޗުގައި އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) އާއި ބައްދަލުކޮށް ވާދަވެރި ކުޅުމަކަށްފަހު 12 ޕޮއިންޓް 11 ޕޮއިންޓުން މެޗު ކާމިޔާބުކޮށްގެންނެވެ.

މި މެޗުގެ މޮޅު ކުޅުންތެރިއަކަށް ހޮވިފައި ވަނީ ޔޫތު މިނިސްޓްރީގެ ޝިޒްނާ ރަޝީދެވެ.

މި ޑިވިޝަންގެ ފައިނަލް މެޗު ހޮނިހިރު ދުވަހުގެރޭ ކުޅުމަށް ހަމަޖެހިފައިވާ އިރު ފައިނަލްގައި ޔޫތު މިނިސްޓްރީއާއި ވާދަކުރާ އެންމެ ފަހުގެ ޗެމްޕިއަން އިމިގްރޭޝަނެވެ. މިފަހަރުގެ މުބާރާތުގައި ބައިވެރިވެފައިވަނީ ފިރިހެން ބައިގަ 4 ޓީމާއި، އަންހެން ބައިގަ 8 ޓީމެވެ.