ކޮވިޑަށް ޕޮޒިޓިވްވެފައިވާ މީހުންނާއި އައިސޮލޭޝަންގައި ތިބޭ މީހުންނަށް އެހީތެރިޔަކާނުލާ ވޯޓުލެވޭ ގޮތަށް ހަމަޖައްސައިފި
ޕޮޒިޓިވް މީހުންނާއި އައިސޮލޭޝަންގައި ތިބޭމީހުންނަށް އެ ކަނޑައެޅިފައި އޮންނަ ގަޑީގައި އަމިއްލައަށް ވޯޓުލުމުގެ ފުރުސަތު ލިބޭނެ
އިލެކްޝަންސް ކޮމިޝަންގެ ރައީސް އަހްމަދު ޝަރީފް
ކޮވިޑަށް ޕޮޒިޓިވްވެފައިވާ މީހުންނާއި އައިސޮލޭޝަނުގައި ތިބޭ މީހުންނަށް އެހީތެރިކާނުލާ ވޯޓުލެވޭ ގޮތަށް ހަމަޖައްސައިފިއެވެ.
ރާއްޖެ އެމްވީއަށް ވާހަކަދަައްކަވަމުން އިލެކްޝަންސް ކޮމިޝަންގެ ރައީސް އަހްމަދު ޝަރީފް ވިދާޅުވީ، ކޮވިޑަށް ޕޮޒިޓިވް ވެފައިވާ މީހުންނަށް މިހާރު އެހީތެރިޔަކާނުލާ ވޯޓު ލެވޭނެ ކަމަށެވެ. މިގޮތަށް ނިންމަން ޖެހުނީ ގާނޫނުގައި ވޯޓަކީ ސިއްރު އެއްޗެއްކަމަށް ކަނޑައަޅާފައި އޮންނާތީވެ، ބައެއްގެ ވޯޓުގެ ސިއްރުކަން ގެއްލޭ ގޮތަށް އަމަލު ކުރުމަށް މަޖުބޫރު ކުރުމަކީ، އީސީއަށް ލިބިގެންވާ ބާރެއް ނޫން ކަމަށްވާތީ ކަމަށެވެ.
ޝަރީފް ވިދާޅުވީ، ޕޮޒިޓީވް ވެފައިވާ މީހެއްވެސް ރަނގަޅަށް އަތް ސެނެޓައިޒް ކުރުމަށްފަހު ވޯޓު ކަރުދާހުގައި އަތްލުމުން ނުރައްކަލެއް ނެތްކަމަށް އެޗްޕީއޭގެ ޓެކްނިކަލް ޓީމުން ލަފާ ދީފައިވާ ކަމަށެވެ. އެހެންކަމުން ޕޮޒިޓިވް މީހުންނާއި އައިސޮލޭޝަންގައި ތިބޭމީހުންނަށް އެ ކަނޑައެޅިފައި އޮންނަ ގަޑީގައި އަމިއްލައަށް ވޯޓުލުމުގެ ފުރުސަތު ލިބޭނެ ކަމަށް ޝަރީފް ވިދާޅުވިއެވެ.
އޭޕްރީލް މަހުގެ 10 ވަނަ ދުވަހު ބާއްވާ ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބުގައި ވޯޓުލާ ދުވަހު ކަރަންޓީނުގައި އަދި ކޮވިޑަށް ޕޮޒިޓިވްވެފައި ތިބޭ މީހުންނަށް ވޯޓުލެވޭނީ އެފޮއްޓަކަށް ވޯޓުލާން ގޮސްފައި ތިބި އެންމެން ވޯޓުލާ ނިމުމުންކަމަށް ޝަރީފް ވަނީ ކުރިން ވިދާޅުވެފައެވެ.
އީސީން އަންނަނީ އިންތިޚާބަށް ވާންޖެހޭ އެންމެ ފަހުގެ ތައްޔާރީތައް ވަމުންނެވެ. އެގޮތުން އޮފިޝަލުން ތަމްރީނު ކުރުމާއި، އިންތިޚާބާ ގުޅިގެން އާންމު ރައްޔިތުން ހޭލުންތެރި ކުރުމަށް ވެސް މަސައްކަތް ކުރެއެވެ. ކޮވިޑް-19އާ ގުޅިގެން އިންތިޚާބުގެ ކަންކަމަށް މިވަނީ ވަރަށް ބޮޑު ބަދަލުތަކެއްވެސް އައިސްފައެވެ.
