އަހަރަކު އެއްފަހަރު ބައި އިލެކްޝަން ބާއްވާ ގޮތަށް ލޯކަލް ކައުންސިލްތަކުގެ އިންތިޚާބުގެ ޤާނޫނަށް ގެންނަން މަސައްކަތް ކުރި އިސްލާހު ފާސްނުކޮށް ތަޅުމުން ބޭރުކޮށްލައިފިއެވެ.

އެފަދަ އިސްލާހެއް މަޖިލީހަށް ހުށަހަޅުއްވާފައި ވަނީ ސަރުކާރުގެ ފަރާތުން، ވެލިދޫ ދާއިރާގެ މެންބަރު މުޙައްމަދު ޢަބްދުالله ޝަފީގުއެވެ. އެ އިސްލާހު ފާސްކުރަން ނުފެންނަ ކަމަށް މަޖިލީހުގެ ލާމަރުކަޒީ ކޮމިޓީ އިން ވަނީ ނިންމާފައެވެ. އެ އިސްލާހު ބަލައިގަންނަން ފެންނަކަމަށް ވޯޓުދެއްވީ ޖުމުލަ 2 މެންބަރުންނެވެ. އަދި އިސްލާހު ބަލައިގަންނަން ނުފެންނަ ކަމަށް 48 މެންބަރުން ވަނީ ވޯޓުދެއްވާފައެވެ. އެ ބިލް ކޮމިޓީ އަށް އަނބުރާ ފޮނުވަން ފެނޭތޯ ބެލުމަށް ނެގި ވޯޓުގައި 55 މެންބަރުން ވަނީ އެ އިސްލާހު އިތުރަށް ދިރާސާކުރަން ކޮމިޓީ އަށް ފޮނުވަން ނުފެންނަކަމަށް ފާސްކޮށްފައެވެ.

މިހާރު ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނު ބުނާގޮތުން ލޯކަލް ކައުންސިލްތަކުގެ އަދި އަންހެނުންގެ ތަރައްޤީ އަށް މަސައްކަތް ކުރާ ކޮމިޓީތަކުގެ ހުސްވާ ގޮނޑިއަށް މެންބަރުން އިންތިޚާބުުކުރުމަށް ބާއްވާ ބައި-އިލެކްޝަން 60 ދުވަހުގެ ތެރޭގައި ބާއްވަން ޖެހެއެވެ. މެމްބަރު ޝަފީގް ހުށަހެޅުއްވި އިސްލާހަކީ ބައި-އިލެކްޝަންތައް ދެން ބާއްވާނީ ކައުންސިލްގެ ނުވަތަ ކޮމިޓީގެ ގޮނޑިއެއް ހުސްވާތާ ގިނަ ވެގެން 365 ދުވަހުގެ ތެރޭގައި ކަަމަށް ކަނޑައެޅުމަށް ހުށަހެޅުއްވި އިސްލާހެކެވެ.

ޝަފީއު ހުށަހެޅުއްވި އިސްލާހުގައި އެ ގާނޫނުގެ 9 ވަނަ މާއްދާ އިސްލާހުކުރަން ވަނީ ހުށަހަޅާފައެވެ. އެގޮތުން ކައުންސިލް މެންބަރެއްގެ މަގާމް ހުސްވުމުން ބައި-އިލެކްޝަނަށް ކުރިމަތިލުމަށް އެދޭ މީހުންނަށް އެ ފުރުސަތު ހުޅުވިއްޖެކަން އިލެކްޝަންސް ކޮމިޝަނުން އާއްމުކޮށް އިއުލާންކުރަން ވާނެ ކަަމަށް އެ އިސްލާހުގައި ވަނީ ބުނެފައެވެ. މީގެ އިތުރުން ލޯކަލް ކައުންސިލެއްގެ ހުސްވެފައިވާ ގޮނޑިއަށް މެމްބަރަކު އިންތިޚާބުކުރާނީ އަހަރަކު 1 ފަހަރު ކަަމަށާއި، ދެ ބައި އިލެކްޝަންގެ ދެމެދުގައި 365 ދުވަހަށް ވުރެ ދިގު މުއްދަތެއް، އަދި 300 ދުވަހަށް ވުރެ ކުރު މުއްދަތެއް ފާއިތުވެެން ނުވަނެ ކަމަށް ކަނޑަައަޅަން އެ ގާނޫނުގެ 26 ވަނަ މާއްދާ އަށް އަކުރެއް އިތުރުކުރަން ހުށަހެޅިއެވެ.