ކައުންސިލްތަކާއި ޑަބްލިއުޑީސީގެ ބައި-އިލެކްޝަން އަހަރަކު އެއްފަހަރު ބާއްވަން ގާނޫނަށް އިސްލާހު ހުށަހަޅައިފި
ގާނޫނުގައި މިހާރު ކަނޑައަޅާފައިވާ 60 ދުވަހުގެ ބަދަލުގައި، އެ ބައި-އިލެކްޝަންތައް ދެން ބާއްވާނީ، އެއިން ކައުންސިލެއްގެ ނުވަތަ ކޮމިޓީއެއްގެ ގޮނޑި ހުސްވިކަން އަނގާތާ ގިނަވެގެން 365 ދުވަހުގެ ތެރޭގައި
ލޯކަލް ކައުންސިލް އިންތިހާބު 2020ގެ ތެރެއިން
ލޯކަލް ކައުންސިލްތަކާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ ބައި-އިލެކްޝަން އަހަރަކު އެއްފަހަރު ބާއްވަން ލޯކަލް ކައުންސިލްތަކުގެ އިންތިހާބުގެ ގާނޫނަށް އިސްލާހު ހުށަހަޅައިފިއެވެ.
މި ބިލު މަޖިލީހަށް ހުށަހެޅުއްވީ ވެލިދޫ ދާއިރާގެ މެންބަރު މުހައްމަދު އަބްދުﷲ ޝަފީގުއެވެ. މި ބިލުގެ ފުރަތަމަ ކިއުން ވަނީ މިއަހަރުގެ 3 ވަނަ ދައުރުގެ 11 ވަނަ ޖަލްސާއަށް އިއްވާފައެވެ.
ބިލު ހުށަހަޅާ ސަބަބެއްގެ ގޮތުގައި ބުނެފައިވަނީ ލޯކަލް ކައުންސިލްތަކުގެ އަދި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ ހުސްވާ ގޮނޑިއަށް މެންބަރުން އިންތިހާބުކުރުމަށް ބާއްވަންޖެހޭ ބައި-އިލެކްޝަން ބޭއްވުމަށް ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގައި މިހާރު ކަނޑައަޅާފައިވާ 60 ދުވަހުގެ ބަދަލުގައި، އެ ބައި-އިލެކްޝަންތައް ދެން ބާއްވާނީ، އެއިން ކައުންސިލެއްގެ ނުވަތަ ކޮމިޓީއެއްގެ ގޮނޑި ހުސްވިކަން އަނގާތާ ގިނަވެގެން 365 ދުވަހުގެ ތެރޭގައި ކަމުގައި ކަނޑައެޅުމަށްޓަކައި، ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނަށް ގެނެވޭ އިސްލާހުތަކާ ގުޅިގެން، ލޯކަލް ކައުންސިލްތަކުގެ އިންތިހާބުގެ ގާނޫނަށް ގެންނަން ޖެހޭ އިސްލާހުތައް ގެނައުމެވެ.
ލޯކަލް ކައުންސިލްތަކުގެ އިންތިހާބުގެ ގާނޫނުގެ 9 ވަނަ މާއްދާގެ (ށ) އަށް ގެނެސްފައިވާ އިސްލާހުގައި ބުނެފައިވަނީ ލޯކަލް ކައުންސިލެއްގެ މެންބަރެއް މަގާމު ހުސްވުމުގެ ސަބަބުން އެ ގޮނޑިއަށް މެންބަރަކު އިންތިހާބުކުރަންޖެހޭ ހާލަތުގައި، އެ ހުސްވި ގޮނޑިއަށް މެންބަރަކު އިންތިހާވުކުރުމަށް މި ގާނޫނުގެ 1-26 ވަނަ މާއްދާގެ ދަށުން ބާއްވާ ބައި-އިލެކްޝަން ބޭއްވުމަށްޓަކައި އެ ބައި-އިލެކްޝަނަށް ކުރިމަތިލުމަށް އެދޭ މީހުންނަށް އެ ފުރުސަތު ހުޅުވިއްޖެކަން، މި ގާނޫނުގެ ދަށުން ހަދާ ގަވާއިދުގައި ބަޔާންކުރާ މުއްދަތުގެ ތެރޭގައި، އިލެކްޝަންސް ކޮމިޝަނުން އާންމުކޮށް އިއުލާންކުރަންވާނެ ކަމަށެވެ.
މި ގާނޫނުގެ 26 ވަނަ މާއްދާގެ ފަހަތަށް އަކުރެއް އިތުރުކުރުމަށް ވަނީ ހުށަހަޅާފައެވެ. 1-26 ވަނަ މާއްދާގެ (ހ) ގައި ބުނެފައިވަނީ ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގެ 15 ވަނަ މާއްދާގެ (ށ) ނުވަތަ 29 ވަނަ މާއްދާގެ (ށ) ނުވަތަ 45 ވަނަ މާއްދާގެ (ށ) ގެ ދަށުން، ލޯކަލް ކައުންސިލެއްގެ ހުސްވެފައިވާ ގޮނޑިއަށް މެންބަރުން އިންތިހާބުކުރަން ބާއްވާ ބައި-އިލެކްޝަން ބާއްވަންވާނީ އަހަރަކު އެއްފަހަރުއެވެ.
މި މާއްދާގެ (ށ) ގައި ބުނެފައިވަނީ މި މާއްދާގެ (ހ) ގައި ބަޔާންކުރާ ގޮތުގެ މަތިން ބާއްވާ ދެ ބައި-އިލެކްޝަނެއްގެ ދެމެދުގައި 365 ދުވަހަށްވުރެ ދިގު މުއްދަތެއް އަދި 300 ދުވަހަށްވުރެ ކުރު މުއްދަތެއް ފާއިތުވެފެން ނުވާނެ ކަމަށެވެ.
މި ގާނޫނުގެ 9 ވަނަ މާއްދާގެ (ށ) ގައި މިހާރު އޮތްގޮތުން، ލޯކަލް ކައުންސިލެއްގެ މެންބަރަކު މެންބަރުކަމުން ވަކިވުމުގެ ސަބަބުން އެއް ގޮނޑިއަށް މެންބަރު އިންތިހާބުކުރަންޖެހޭ ހާލަތުގެ އެ ހުސްވި ގޮނޑިއަށް މެންބަރަކު އިންތިހާބުކުރުމަށް ބާއްވާ ލޯކަލް ކައުންސިލްގެ ބައި-އިލެކްޝަން ބޭއްވުމަށްޓަކައި އެ ގޮނޑި ހުސްވި ތާރީހުން ފެށިގެން ގިނަވެގެން 15 ދުވަހުގެ ތެރޭގައި އެ ކައުންސިލްގެ ބައި-އިލެކްޝަނަށް ކުރިމަތިލުމަށް އެދޭ މީހުންނަށް އެ ފުރުސަތު ހުޅުވިއްޖެކަން އިލެކްޝަންސް ކޮމިޝަނުން އާންމުކޮށް އިއުލާންކުރަންވާނެ ކަމަށެވެ.
