ނިމިގެންދިޔަ ލޯކަލް ކައުންސިލް އިންތިޚާބުގައި އެމްޑީޕީއަށް 3 ސިޓީއެއްގެ މޭޔަރުކަމާއި 11 އަތޮޅެއްގެ ކައުންސިލްގެ ރައީސްގެ ގޮނޑި ކާމިޔާބުކުރެވިފައިވާއިރު، ޕީޕީއެމް އަށް އެއް ސިޓީއެއްގެ މޭޔަރުގެ ގޮނޑި އަދި 7 އަތޮޅެއްގެ ކައުންސިލްގެ ރައީސްގެ ގޮނޑި ކާމިޔާބުކުރެވިފައިވާ ކަމަށް އިލެކްޝަންސް ކޮމިޝަން(އީސީ)ގެ ވަގުތީ ނަތީޖާއިން ދައްކައިފިއެވެ.

އެންމެ ފަހުން ގާނޫނަށް ގެނައި ބަދަލާއެކު ފުރަތަމަ ފަހަރަށް ސިޓީތަކުގެ މޭޔަރުން އިންތިޚާބުކުރުމަށާއި އަތޮޅު ކައުންސިލްގެ ރައީސުން އިންތިޚާބުކުރުމަށް ވަނީ ވޯޓުލާފައެވެ. އެގޮތުން 4 ސިޓީ އެއްގެ މޭޔަރުންނާއި 18 އަތޮޅެއްގެ ކައުންސިލްގެ ރައީސުން އިންތިޚާބުކުރުމަށް ވަނީ ވޯޓުލާފައެވެ.

މީގެތެރެއިން އެމްޑީޕީއަށް މޭޔަރުކަން ކާމިޔާބުކުރެވިފައިވާ ސިޓީތަކަކީ ކުޅުދުއްފުށި ސިޓީ އާއި ފުވައްމުލަކު އަދި އައްޑޫ ސިޓީއެވެ. ޕީޕީއެމް އަށް ކާމިޔާބުކުރެވިފައިވަނީ މާލެ ސިޓީގެ މޭޔަރުގެ ގޮނޑިއެވެ.

އީސީގެ ވަގުތީ ނަތީޖާ ދައްކާގޮތުން އަތޮޅު ކައުންސިލްގެ ރައީސުންގެ ގޮނޑިއަށް ބަލާއިރު އެމްޑީޕީއަށް ކާމިޔާބުކުރެވިފައިވާ 11 އަތޮޅަކީ ހއ، ހދ، ށ ،ނ، ބ ،އއ، އދ، ވ، މ، ދ އަދި ލ އަތޮޅެވެ. ޕީޕީއެމްއަށް ކާމިޔާބުކުރެވިފައިވާ 7 އަތޮޅަކީ ރ، ޅ، ކ، ފ، ތ، ގއ އަދި ގދ އެވެ.

އިންތިޚާބުގައި މައި ގިނަ ގޮނޑިތަކެއް އެމްޑީޕީއަށް ކާމިޔާބުކުރެވިފައި ވީނަމަވެސް ކުރިން ބޮޑު ކާމިޔާބީއެއް އެމްޑީޕީން ހޯދަމުން އައި މާލެ ސިޓީ އާއި އައްޑޫ ސިޓީގެ މެޖޯރިޓީ އެޕާޓީއަށް ވަނީ ގެއްލިފައެވެ.

އެމްޑީޕީގެ އިސްވެރިން ހާމަކުރާގޮތުގައި މާލެ ސިޓީގެ މެޖޯރިޓީ ގެއްލުނުނަމަވެސް އިންތިޚާބު ކާމިޔާބުކުރެވިފައިވަނީ އެޕާޓީއަށެވެ. ޕީޕީއެމްގެ އިސްވެރިން ހާމަކުރަމުންދަނީ މާލެ ސިޓީން އެމްޑީޕީއަށް ލިބުނު ބޮޑު ނާކާމިޔާބީ އާއި އައްޑޫ ސިޓީގައި ހިފަހައްޓަމުން އައި މެޖޯރިޓީ ގެއްލިގެންދިޔުމުން އިންތިޚާބުގައި އެމްޑީޕީއަށް ނާކާމިޔާބު ވެފައިވާކަމަށެވެ.

އީސީން އަންނަނީ ވަގުތީ ނަތީޖާތައް އިއުލާންކުރަމުންނެވެ. އަދި ގާނޫނުން އީސީއަށް ލިބިދޭ 14 ދުވަހުގެ ތެރޭގައި ދާއިމީ ނަތީޖާ އިއުލާންކުރާނެކަމަށް އީސީން ބުނެއެވެ. އަނެއްކޮޅުން ނަތީޖާ ކަށަވަރުކުރުމަށް ތިން ފޮއްޓެއްގެ ތިން ދާއިރާއެއްގެ ސެކިޔުރިޓީ އުރަ ކަނޑައިގެން ހުކުރު ދުވަހުގެ ރޭ ވަނީ ބަލާފައެވެ. އެކަމާއި ގުޅިގެން އިދިކޮޅު ޕީޕީއެމް ޕީއެންސީ ކޯލިޝަންގެ ސަޕޯޓަރުން ވަނީ އިހުތިޖާޖުކުރުމަށް ނިކުމެފައެވެ.