ނަތީޖާ ކަށަވަރުކުރުމަށް 3 ދާއިރާއެއްގެ ސެކިއުރިޓީ އުރަ ކަނޑަން ނިންމައިފި

ތިން ވޯޓު ފޮއްޓެއްގައި ހިމެނޭ ތިން ދާއިރާއެއްގެ ނަތީޖާ ކަށަވަރުކުރުމަށް ސެކިއުރީޓީ އުރަ ކަނޑަން އިލެކްޝަންސް ކޮމިޝަނުން ނިންމައިފިއެވެ.

ރާއްޖެއެމްވީއާ ވަހަކަދައްކަވަމުން އިލެކްޝަންސް ކޮމިޝަނުގެ ރައީސް އަހްމަދު ޝަރީފު ވިދާޅުވީ، ނަތީޖާ ކަށަވަރުކުރުމަށް ކަނޑަން ނިންމާފައިވަނީ ތިން ވޯޓު ފޮއްޓެއްގައި ހިމެނޭ ތިން ދާއިރާއެއްގެ ސެކިއުރިޓީ އުރަ ކަމަށެވެ. އެއީ ސެކިއުރިޓީ އުރަ 3 ކަމަށާއި، ވޯޓު ގުނުން މިރޭ ކުރިއަށްގެންގޮސް މާދަމާގެ ނިޔަލަށް ވަގުތީ ނަތީޖާ އިއުލާން ކުރެވޭނެ ކަމަށް ވިދާޅުވިއެވެ. އޭގެ ތެރޭގައި ހިމެނެނީ ކޭޓީ-3 ގެ މ. މުލަކު ދާއިރާއާއި، އެލްޓީ-2ގެ ފ. ނިލަންދޫ ދާއިރާއާއި، ވައިޓީ-21ގެ މ. މުލި ދާއިރާއެވެ. 

އެއްވެސް ސެކިއުރިޓީ އުރައެއް ހުޅުވާއިރު، ބަލަންތިބޭ މީހުންނަށް އޮޅުންއަރާ ފަދަ ކަމެއް ނުކުރާނެ ކަމަށާއި، ކޮންމެ ސެކިއުރިޓީ އުރައެއް ހުޅުވާއިރު އެ ސެކިއުރިޓީ ހުޅުވާ ބޭނުން ބުނާނެކަމަށް ޝަރީފް ވިދާޅުވިއެވެ.

ޝަރީފު ވިދާޅުވީ ކުރިން 18 ފޮއްޓެއްގެ ސެކިއުރިޓީ އުރަ ކަނޑަން ނިންމި ނަމަވެސް ސެކިއުރިޓީ އުރަ ނުކަނޑާ، ގުނާ ޝީޓް ނަގައިގެންނާއި، ކައުންޓާފޮއިލް ބަލައިގެން އެ ފޮށިތަކުގެ ނަތީޖާ ކަށަވަރުވެފައިވާކަމަށެވެ.

ތިން ވޯޓު ފޮއްޓެއް ކަނޑާ އަލުން ވޯޓު ގުނުމަށް އިލެކްޝަންސް ކޮމިޝަނުން ނިންމަވާފައިވާއިރު، އިންތިހާބުގެ ބައެއް ދާއިރާތަކުގެ ނަތީޖާ ޝީޓުގައި މައްސަލަތަކެއް ހުރެގެން އިލެކްޝަންސް ކޮމިޝަނުން ވެސް ދަނީ އެ މައްސަލަ ބަލަމުންނެވެ. އިލެކްޝަންސް ކޮމިޝަނުން ބުނީ އިންތިޚާބާ ގުޅިގެން މިހާތަނަށް 89 ޝަކުވާ އިލެކްޝަންސް ކޮމިޝަނަށް ހުށަހަޅާފައިވާކަމަށެވެ. އޭގެ ތެރެއިން 21 ޝަކުވާއަކީ ސިޔާސީ ޕާޓީތަކުން ހުށަހަޅާފައިވާ ޝަކުވާތައްކަމަށް އެ ކޮމިޝަނުން ބުނެފައިވެއެވެ.