ނަތީޖާގެ ސައްހަކަން ކަށަވަރުކުރުމަށް އަލުން ބަލަންޖެހޭ ފޮށިތައް ބަލަންޖެހޭތޯ ޑަބަލްޗެކްކުރަނީ

ނިމިގެންދިޔަ ލޯކަލް ކައުންސިން އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބުގައި ނަތީޖާ ކަށަވަރުކުރުމަށް އަލުން ބަލަންޖެހޭ 18 ފޮއްޓެއްވާކަމަށް އިލެކްޝަންސް ކޮމިޝަން(އީސީ)ން ހާމަކޮށްފައިވާއިރު އެފޮށިތަކުގެ ސެކިޔުރިޓީ އުރަ ކެނޑުމުގެ ކުރިން އުރަތައް ކަނޑަންޖެހޭތޯ ޔަގީންކުރުމަށް ޑަބަލް ޗެކްކުރަމުންދާ ކަމަށް އެކޮމިޝަނުގެ ނާއިބުރައީސް އިސްމާއީލް ހަބީބު ވިދާޅުވެއްޖެއެވެ.

އިންތިޚާބުގެ ނަތީޖާ ހާމަކުރުމަށް އީސީން ކުރަމުންދާ މަސައްކަތްތަކާއި ގުޅޭގޮތުން "ރާއްޖެއެމްވީ"އަށް މައުލޫމާތު ދެއްވަމުން ހަބީބު ވިދާޅުވީ އަދި އެއްވެސް ފޮއްޓެއްގެ ސެކިޔުރިޓީ އުރަ ކަނޑާފައިނުވާކަމަށެވެ. އަލުން ފޮއްޓެއް ބަލާނަމަ އެފޮއްޓަކާއި ގުޅުންހުރި ދާއިރާތަކުގެ ކެންޑިޑޭޓުންނަށް 3 ގަޑިއިރުގެ ކުރިން އަންގާނެކަމަށް ހަބީބު ވިދާޅުވިއެވެ. އަދި ފޮށިތައް އަލުން ކަނޑަންޖެހޭތޯ ބެލުމަށް ނަތީޖާތައް ޑަބަލް ޗެކްކުރަމުންދާ ކަމަށް ހަބީބު ވިދާޅުވިއެވެ.

އީސީން މިހާރު އަންނަނީ އިންތިޚާބުގެ ވަގުތީ ނަތީޖާ އިއުލާންކުރަމުންނެވެ. ހަބީބު ވިދާޅުވީ މަސައްކަތްކުރަނީ ވަގުތީ ނަތީޖާ ހުކުރު ދުވަހުގެ ނިޔަލަށް އިއުލާންކޮށް ނިންމުމަށް ކަމަށެވެ. އަދި ޤާނޫނުގައިވާ ގޮތުގެ މަތިން އިންތިޚާބުގެ ދާއިމީ ނަތީޖާ 14 ދުވަހުގެ ތެރޭގައި އިއުލާންކުރާނެކަމަށް ހަބީބު ވިދާޅުވިއެވެ.

ނިމިގެންދިޔަ އިންތިޚާބުގެ 18 ފޮއްޓެއްގެ ނަތީޖާ ކަށަވަރުކުރަންޖެހޭ ކަމަށް އިލެކްޝަންސް ކޮމިޝަނުން އަންގާރަ ދުވަހު ބޭއްވި ނޫސްވެރިންގެ ބައްދަލުވުމުގައި އެކޮމިޝަނުގެ ރައީސް އަހުމަދު ޝަރީފް ވަނީ ވިދާޅުވެފައެވެ. ޝަރީފް ވިދާޅުވީ ފޮށިތަކުގެ ނަތީޖާ ކަށަވަރުކުރުމަށްޓަކައި، ފޮށިތަކުގެ ޝީޓްތަކުގައި ހުރި މައްސަލަތައް ދެނެގަނެ ހައްލު ކުރުމުގެ މަސައްކަތް ކުރުމަށް ނިންމާފައިވާކަމަށެވެ. އަދި ވޯޓުލީ މީހުންގެ އަދަދާއި، ސައްޙަ ވޯޓާއި ބާތިލް ވޯޓުގެ އަދަދު ޗެކް ކުރުމަށްފަހު، މައްސަލައެއް ނެތްތަނަމަ އެފޮށިތަކުގައި އިތުރު ކަމެއް ނުކުރާނެ ކަމަށް ވިދާޅުވިއެވެ.

ޝަރީފް ވިދާޅުވީ، ވޯޓުލީ މީހުންގެ ތަފާސްހިސާބު ދިމާވާކަމަށް ވަނީނަމަ، މި މަސައްކަތުގެ ތެރެއިން، އިތުރު ކަމެއް ނުކުރާނެ ކަމަށެވެ. ހަމަ އެހެންމެ، އެއްވެސް ސެކިއުރިޓީ އުރައެއް ހުޅުވާއިރު، ބަލަންތިބޭ މީހުނަށް އޮޅުންއަރާ ފަދަ ކަމެއް ނުކުރާނެ ކަމަށް ވިދާޅުވިއެވެ. އެގޮތުން ކޮންމެ ސެކިއުރިޓީ އުރައެއް ހުޅުވާއިރު އެ ސެކިއުރިޓީ ހުޅުވާ ބޭނުން ބުނާނެކަމަށް ޝަރީފް ވިދާޅުވިއެވެ.

މީގެ އިތުރުން، ވޯޓު އަލުން ގުނާނީ ނަތީޖާ ކަށަވަރުކުރެވޭނެ އިތުރު އެއްވެސް ގޮތެއް ނެތްނަމަ އެންމެ ފަހުކަމެއްގެ ގޮތުގައި ކަމަށް ޝަރީފް ވިދާޅުވިއެވެ.

އިލެކްޝަންސް ކޮމިޝަނުން އަންގާރަދުވަހު ޝީޓްތަކުގައި މައްސަލަ ފާހަގަކުރެވުނު 18 ފޮށީގެ ނަތީޖާ ކަށަވަރުކުރުމަށް މަސައްކަތްކުރިއެވެ. އެހެން ނަމަވެސް އިލެކްޝަންސް ކޮމިޝަނުގެ މަސައްކަތާ ގުޅިގެން، އިދިކޮޅު ޕީޕީއެމްއާއި ވެރިކަން ކުރާ އެމްޑީޕީން ވަނީ ހަމަނުޖެހުންތަކެއް ހިންގާފައެވެ. މި ހަމަނުޖެހުންތަކާއި ގުޅިގެން، އެ މަސައްކަތް ވަނީ ފަސްކޮށްފައެވެ.