ކައުންސިލަރުންގެ ހުވާކުރުން މޭމަހުގެ މެދުތެރޭގައި

ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތް ކުރާ ކޮމިޓީތަކުގެ އިންތިޚާބުގައި، އިންތިޚާބުވި ކައުންސިލަރުން ހުވާކުރުމުގެ ރަސްމިއްޔާތު ބޭއްވުމަށް ހަމަޖެހިފައިވަނީ އަންނަ މޭ މަހުގެ މެދު ތެރޭގައިކަމަށް ލޯކަލް ގަވަރުމަންޓް އޮތޯރިޓީ (އެލްޖީއޭ)އިން ހާމަކޮށްފިއެވެ.

ކައުންސިލަރުން ހުވާކުރުމާ ގުޅޭގޮތުން ރާއްޖެ އެމްވީއާއި ވާހަކަދައްކަވަމުން އެލްޖީއޭގެ ސީއީއޯ އަފްޝަން ލަތީފް ވިދާޅުވީ އަލަށް އިންތިޚާބުވި ކައުންސިލަރުން ހުވާކުރުމުގެ ރަސްމިއްޔާތު ރޯދައިގެ ފަހުން ބޭއްވުމަށް ހަމަޖެހިފައިވާކަމަށެވެ. އަދި ކައުންސިލަރުން ހުވާކުރާނެ ތަރީޚު ވަރަށް އަވަހަށް އިޢުލާން ކުރައްވާނެކަމަށް އޭނާ ވިދާޅުވިއެވެ. މިކަމުގެ އިތުރު ތަފްސީލެއް އަފްޝަން ދެއްވާފައެއް ނުވެއެވެ.

ކޮވިޑް-19އާ ގުޅިގެން ދެ ފަހަރެއްގެ މަތީން ފަސްކުރަންޖެހުނު ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތް ކުރާ ކޮމިޓީތަކުގެ އިންތިޚާބުގެ ވޯޓުލުން ކުރިއަށް ގެންގޮސްގައިވަނީ އޭޕްރީލް 10 ވަނަ ދުވަހުއެވެ. އިންތިޚާބުގެ ވަގުތީ ނަތީޖާ އަންނަ ހުކުރު ދުވަހުގެ ކުރިން އިއުލާން ކުރުމަށް ހަމަޖެހިފައިވާއިރު، ދާއިމީ ނަތީޖާވެސް ވީހާވެސް އަވަހަށް އިއުލާން ކުރުމަށް މަސައްކަތް ކުރަމުންދާކަމަށް އިލެކްޝަން ކޮމިޝަނުން ވަނީ ބުނެފައެވެ.

ކައުންސިލް އިންތިޚާބު ނުބޭއްވި ލަސްކުރަންޖެހުމުން މިހާރު ކައުންސިލްތަކުގެ ދައުރު ދިގުކޮށް، ލާމަރުކަޒީ ޤާނޫނަށް ވަނީ ބަދަލުތަކެއް ގެނެސްފައެވެ. އަދި ޤާނޫނުގައި ބުނާގޮތުން މިހާރު ތިއްބެވި ކައުންސިލަރުންނާއި ކައުންސިލަރުން ހުވާކުރުމާ ހަމައަށް ކައުންސިލްގައި ދެމިތިބޭނެއެވެ. ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބުގައި 3،814 ކެނޑިޑޭޓުން ވާދަކުރިއެވެ. އޭގެ ތެރޭގައި ހިމެނެނީ ލޯކަލް ކައުންސިލް އިންތިޚާބުގައި ވާދަކުރި 2234 ކެނޑިޑޭޓުންނާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބުގައި ވާދަކުރާ 1580 ކެނޑިޑޭޓުންނެވެ. ދެ އިންތިޚާބުގައި 1912 މަޤާމަށް ބޭފުޅުން ވަނީ އިންތިޚާބުކޮށްފައެވެ.

ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތް ކުރާ ކޮމިޓީތަކުގެ އިންތިޚާބުގައި، އިންތިޚާބުވި ކައުންސިލަރުން ހުވާކުރުމުގެ ރަސްމިއްޔާތު ބޭއްވުމަށް ހަމަޖެހިފައިވަނީ އަންނަ މޭ މަހުގެ މެދު ތެރޭގައިކަމަށް ހާމަކޮށްފައިވާއިރު، އިންތިޚާބުގެ ނަތީޖާއާއިމެދު ޚިޔާލު ތަފާތުވުންތަކެއް ވަނީ އުފެދިފައެވެ. ނިމިދިޔަ ލޯކަލް ކައުންސިލް އަދި އަންހެނުންގެ ތަރައްގީއަށް މަސައްކަތްކުރާ ކޮމެޓީތަކުގެ އިންތިޚާބުގައި، 18 ފޮއްޓެއްގެ ނަތީޖާ ކަށަވަރުކުރަންޖެހޭކަމަށް އިލެކްޝަންސް ކޮމިޝަނުންވެސް ވަނީ ބުނެފައެވެ. ޝަރީފް ވިދާޅުވީ، އެ ފޮށިތަކުގެ ނަތީޖާ ކަށަވަރުކުރުމަށްޓަކައި، ފޮށިތަކުގެ ޝީޓްތަކުގައި ހުރި މައްސަލަތައް ދެނެގަނެ ހައްލު ކުރުމުގެ މަސައްކަތް ކުރުމަށް ނިންމާފައިވާކަމަށެވެ. އަދި ވޯޓުލީ މީހުންގެ އަދަދާއި، ސައްޙަ ވޯޓާއި ބާތިލް ވޯޓުގެ އަދަދު ޗެކް ކުރުމަށްފަހު، މައްސަލައެއް ނެތްތަނަމަ އެފޮށިތަކުގައި އިތުރު ކަމެއް ނުކުރާނެ ކަމަށް ވިދާޅުވިއެވެ.

ޝަރީފް ވިދާޅުވީ، ވޯޓުލީ މީހުންގެ ތަފާސްހިސާބު ދިމާވާކަމަށް ވަނީނަމަ، މި މަސައްކަތުގެ ތެރެއިން، އިތުރު ކަމެއް ނުކުރާނެ ކަމަށެވެ. ހަމަ އެހެންމެ، އެއްވެސް ސެކިއުރިޓީ އުރައެއް ހުޅުވާއިރު، ބަލަންތިބޭ މީހުނަށް އޮޅުންއަރާ ފަދަ ކަމެއް ނުކުރާނެ ކަމަށް ވިދާޅުވިއެވެ. އެގޮތުން ކޮންމެ ސެކިއުރިޓީ އުރައެއް ހުޅުވާއިރު އެ ސެކިއުރިޓީ ހުޅުވާ ބޭނުން ބުނާނެކަމަށް ޝަރީފް ވިދާޅުވިއެވެ.