ލ. މާވަށުގައި ބެހެއްޓިފައިވާ ވޯޓު ފޮއްޓަކަށް ޕީޕީއެމް ސަޕޯޓަރަކު އޮޅުވާލައިގެން ވޯޓު ލާފައިވާ މައްސަލައެއް އިލެކްޝަންސް ކޮމިޝަނަށް ހުށައަޅައިފިއެވެ.
ރާއްޖެއެމްވީއަށް މައުލޫމާތު ލިބިފައިވާ ގޮތުގައި އެމީހާ ވަނީ މާވަށުގައި ބެހެއްޓުނު 06.02 ވޯޓު ފޮއްޓަށް އެންމެންގެ ކުރިމަތީގައި ވޯޓް ލާފައެވެ. ނަމަވެސް އޭނާ ވޯޓުލާން ޖެހޭ ދާއިރާ ޓީ-9ގެ ނަތީޖާ ޝީޓް ދައްކާގޮތުން އެދާއިރާއަށް އެއްވެސް މީހަކު ވޯޓްލާފައެއް ނުވެއެވެ.
ނަން ހާމަ ނުުކުރުމަށް އެދި ރާއްޖެއެމްވީއަށް މައުލޫމަތު ދިން މީހާ ބުނިގޮތުގައި މި އޮޅުވާލުން ފާހަގަ ކުރެވިފައި ވަނީ އިންތިޚާބު ނިމުނު ފަހުން ކެންޑިޑޭޓުންގެ މަސައްކަތުންނެވެ. ނަމަވެސް އަދި މިވީތަނަށް 06.2ގެ އިލެކްޝަންސް އޮފިޝަލުންގެ ފަރާތުން އެއްވެސް މައްސަލައެއް ވޯޓުލީ މަރުކަޒުގައިވެސް، އަދި އޭގެ ފަހުން ވެސް ފާހަގަކޮށްފައި ނުވުމުން މި އަމަލަކީ ރޭވިގެން ހިންގާފައިވާ ޖަރީމާއެއް ކަމާއި ގަސްތުގައި ރައްޔިތުންގެ ހައްގަށް އަރައިގަތުންކަމުގައި މާވަށުގެ ބައެއް ރައްޔިތުން ދަނީ ފާހަގަ ކުރަމުންނެވެ.
އަދި މިފަދަ ބޮޑެތި މައްސަލަތައް ފާހަގަވެފައި އޮއްވާ އިންތިޚާބުގެ ދާއިމީ ނަތީޖާ އިއުލާނު ކުރުމަކީ ކޮށްގެން ވާނެކަމެއް ނޫންކަމަށާއި އެގޮތަށް އެކަން ކޮށްފިނަމަ މުޅި އިންތިޚާބުގެ ސައްހަކަން ގެއްލުނީ ކަމަށްބުނެ މާވަށުގެ ބައެއް ރައްޔިތުންދަނީ ޝަކުވާކުރަމުންނެވެ. މި އަމަލު ހިންގި ފަރާތާއި ހިންގުމުގައި އެހީތެރިވެދިން އެންމެހާ ފަރާތްތަކަށް ހައްގު އަދަބު ދިނުމަށް އެރަށުގެ ބައެއް ރައްޔިތުން ދަނީ ގޮވާލަމުންނެވެ.
މި މައްސަލައާއި ގުޅޭ ތަފްސީލީ މައުލޫމާތު އިލެކްޝަންސް ކޮމިޝަނުން ލިބޭގޮތް ވަނީ ނުވެފައެވެ.
