59 ފޮއްޓަކަށް 50 ދާއިރާއަށް ވުރެ ގިނަ މީހުން ވޯޓުލާނެ، ތިން ފޮއްޓަކަށް 200 ދާއިރާ އާ ގާތަށް ރަޖިސްޓްރީކުރި

އޭޕްރީލް މަހުގެ 10 ވަނަ ދުވަހު ބޭއްވުމަށް ހަމަޖެހިފައިވާ ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބުގައި ވޯޓުލުމަށްޓަކައި 59 ފޮއްޓެއްގައި 50 ދާއިރާއަށް ވުރެ ގިނަ ދާއިރާގެ މީހުން ރަޖިސްޓްރީކޮށްފައިވާ ކަމަށް އިލެކްޝަންސް ކޮމިޝަން (އީސީ)ގެ ރައީސް އަހުމަދު ޝަރީފް ވިދާޅުވެއްޖެއެވެ.

އިންތިޚާބާއި ގުޅިގެން އީސީން ވަމުން އަންނަ ތައްޔާރީތަކާއި ގުޅޭގޮތުން "ރާއްޖެއެމްވީ"އަށް ދެއްވި އިންޓަރވިިއު އެއްގައި ޝަރީފް ވިދާޅުވީ މިފަހަރުގެ އިންތިޚާބުގެ ނަތީޖާ ގެނައުމުގައި ކުރީގެ އިންތިޚާބުތަކުގައި ނެގި ވަގުތަށް ވުރެ ގިނަ ވަގުތު ނަގާނެކަމަށެވެ. އެއީ މިފަހަރު ބޭއްވިގެންދަނީ ދެ އިންތިޚާބުކަމުގައިވާތީ ކަމަށް ޝަރީފް ވިދާޅުވިއެވެ. އަތޮޅުތެރޭގައި ކޮންމެ ވޯޓެއް ހަތަރު ފަހަރު ގުނަންޖެހޭނެކަމަށް ޝަރީފް ވިދާޅުވިއެވެ.

ރީރަޖިސްޓްރޭޝަން ހުރި ގޮތުން ބައެއް ފޮށިތަކުގައި 100ށް ވުރެ ގިނަ ދާއިރާތަކުގެ މީހުން ރަޖިސްޓްރީކޮށްފައި އެބަހުރި ކަމަށް ޝަރީފް ވިދާޅުވިއެވެ.

ވޯޓު ގުނުން ލަސްވެގެންދާނެތީ މިހާރު ކަނޑައަޅާފައި ވާނީ 30 ދާއިރާއަށް ވުރެ ގިނައިން ހުންނަ ފޮށިތަކުގައި ވޯޓު ގުނުމަށް އިތުރު އޮފިޝަލުން ހަމަޖައްސާގޮތަށް ކަމަށް ޝަރީފް ވިދާޅުވިއެވެ. އެގޮތުން އެފަދަ ކޮންމެ ފޮއްޓެއްގެ ވޯޓު ގުނުމަށް އިތުރު 5 މީހުން ޓްރެއިންކޮށްފައިވާ ކަމަށް ޝަރީފް ވިދާޅުވިއެވެ.

ޝަރީފް ވިދާޅުވީ ދާއިރާތައް ގިނަ ފޮށިތަކުގައި ލަސްތަކެއް ހުރިނަމަވެސް މާގިނަ ދާއިރާތައް ނުހުންނަ ފޮށިތައް ގުނަން ފަށާތާ ދެތިން ގަޑިއިރު ތެރޭގައި ނަތީޖާ އިއުލާންކުރެވޭނެ ކަމަށް ބެލެވޭ ކަމަށެވެ.

ކުރިޔަށް އޮތް އިންތިޚާބުގައި 735 ވޯޓު ފޮއްޓެއް ބަހައްޓައެވެ. ކޮވިޑާއި ގުޅިގެން އެޗްޕީއޭއިން އެކުލަވާލި ގައިޑްލައިންގެ ސަބަބުންވެސް ވޯޓު ފޮށީގެ އަދަދު ވަނީ އިތުރުވެފައެވެ. އެގޮތުން އެއްވެސް ފޮއްޓަކަށް 600ށް ވުރެ ގިނަ މީހުންނަށް ވޯޓު ނުލެވޭ ގޮތަށް ވަނީ ހަމަޖައްސާފައެވެ.