އިންތިޚާބުގައި ވޯޓުދިނުމުގެ ހައްގު ލިބިފައިވާ މީހުންގެ ފައިނަލް ލިސްޓު އާންމުކޮށްފި

އޭޕްރީލް މަހުގެ 10 ވަނަ ދުވަހު ބޭއްވުމަށް ހަމަޖެހިފައިވާ ލޯކަލް ކައުންސިލް އިންތިޚާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިޚާބުގައި ވޯޓުލުމުގެ ހައްގު ލިބިފައިވާ މީހުންގެ ފައިނަލް ލިސްޓު އިލެކްޝަންސް ކޮމިޝަން(އީސީ)ން އާންމުކޮށްފިއެވެ.

ފައިނަލް ލިސްޓް އާންމުކޮށްފައި ވަނީ ވަގުތީ ލިސްޓެއް އާންމުކުރުމަށްފަހު އެލިސްޓަށް ޝަކުވާ ހުށަހެޅުމުގެ ފުރުސަތު ހުޅުވާލުމަށްފަހުއެވެ. އެފުރުސަތުގައި 70 ޝަކުވާއެއް ވަނީ ހުށަހަޅާފައެވެ.

Advertisement

މިފަހަރުގެ އިންތިޚާބުގައި ވޯޓުލުމުގެ ހައްގު ލިބިގެން ވަނީ 273،128 މީހުންނަށެވެ. މީގެތެރޭގައި އިންތިޚާބު ފަސްވުމުގެ ސަބަބުން ވޯޓު ދިނުމުގެ ހައްގު ލިބުނު 5134 މީހުންވެސް ހިމެނެއެވެ.

1414 އަށް އެސް.އެމް.އެސް ((VR space IDNO Send to 1414) ކޮށްގެން ވޯޓު ދިނުމުގެ ހައްގު ލިބިފައިވާ މީހުންގެ ރަޖިސްޓަރީ ޗެކްކުރެވޭނެކަމަށް އިލެކްޝަންސް ކޮމިޝަނުން ބުނެއެވެ.

މިފަހަރުގެ އިންތިޚާބުގައި 735 ވޯޓު ފޮއްޓެއް ބަހައްޓާނެއެވެ. ވޯޓު ފޮށީގެ އަދަދު އިތުރުވެފައިވަނީ ކޮވިޑާއި ގުޅިގެން އެޗްޕީއޭއިން އެކުލަވާލި ގައިޑްލައިނުގެ ސަބަބުންނެވެ.

އޭޕްރީލް މަހުގެ 10 ވަނަ ދުވަހު ވޯޓުލާއިރު ވޯޓުލުމުގެ ކަންކަން ކުރިޔަށްދާނީ ހެނދުނު 7ން ފެށިގެން ހަވީރު 5 ޖަހަންދެނެވެ. އެއަށްފަހު ކޮވިޑަށް ޕޮޒިޓިވްވެފައިވާ މީހުންނާއި ކަރަންޓީނުގައި ތިބި މީހުންނަށް ވޯޓު ލުމުގެ ފުރުސަތު ލިބިގެންދާނެކަމަށް އީސިން ބުނެއެވެ.

ކޮވިޑް-19 ގެ ސަބަބުން މޮނިޓަރިންގެ ހާލަތުގައި އޮންނަ ރަށަކަށްވެސް ވޯޓުލާން ދެވިދާނެކަމަށް އިލެކްޝަންސް ކޮމިޝަނުގެ ރައީސް އަހުމަދު ޝަރީފް ވަނީ ވިދާޅުވެފައެވެ. އޭނާ ވިދާޅުވީ އަތޮޅުތެރޭގައި ދިރިއުޅޭ މީހުން އެއްރަށުން އަނެއްރަށަށް ވޯޓުލުމަށް ދިއުމުގެ ހުއްދަ ދޭނެކަމަށް ހެލްތް ޕްރޮޓެކްޝަން އޭޖެންސީން އަންގާފައިވާ ކަމަށެވެ. އަދި މޮނިޓަރިން ހާލަތުގައި އޮންނަ ރަށަކަށްވެސް އެ ރަށެއްގެ ޓާސްކްފޯހާ ގުޅިގެން ހަމައެކަނި ވޯޓުލުމަށް ހުއްދަ ލިބޭނެ ކަމަށެވެ.

ކޮވިޑްގެ ސަބަބުން މިފަހަރުގެ އިންތިޚާބު ބޭއްވުމަށް ވަނީ ބޮޑެތި ގޮންޖެހުންތަކަކާއި ކުރިމަތިވެފައެވެ.