ވަކިވަކި ވޯޓު އަދި ވޯޓު ކަރުދާސް ބާތިލްވާނީ ކިހިނެއްކަން އެނގެން ޖެހޭ- ޝަރީފް
21 މާރިޗު 2021 | އާދީއްތަ 08:14ވޯޓު ކަރުދާހުގައި އެއް ވޯޓަށްވުރެ ގިނަ ވޯޓު ވާނެ
އެމްޑީޕީ ޕްރައިމަރީގެ ވޯޓުލުން --- ފޮޓޯ : ޔޫސުފް ސޮފްނާން
އިންތިޚާބުގައި ވަކިވަކި ވޯޓު އަދި ވޯޓު ކަރުދާސް ބާތިލްވާނެ ހާލަތު އެނގެންޖެހޭ ކަމަށް އިލެކްޝަންސް ކޮމިޝަންގެ ރައީސް އަހްމަދު ޝަރީފު ވިދާޅުވެއްޖެއެވެ. ކުރިއަށް އޮތް ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބުގެ ވޯޓު ކަރުދާހުގައި އެއް ވޯޓަށްވުރެ ގިނަ ވޯޓު ވާނެ ކަމަށާއި، ވަކިވަކި ވޯޓާއި، މުޅި ވޯޓު ކަރުދާސް ބާތިލްވާ ހާލަތު ތަފާތުވާނެ ކަަމަށް ޝަރީފް ވިދާޅުވިއެވެ.
އިންތިޚާބުތަކާބެހޭ ޢާންމު ޤާނޫނުގެ 51 ވަނަ މާއްދާގެ (ހ) އާ އެއްގޮތްވާ ގޮތުގެ މަތިން ވޯޓު ކަރުދާހުގައި އެ މީހަކަށް ފެންނަ ކެންޑިޑޭޓެއްގެ ނަމާ ދިމާގައި ރަނގަޅު ފާހަގަ ޖެހުން ފިޔަވައި، އިތުރު އެހެން ފާހަގައެއް ޖަހާފައިވާ ނުވަތަ ލިޔުމެއް ލިޔެފައިވާ ނުވަތަ ކުރެހުމެއް ކުރަހާފައިވާނަމަ މުޅި ވޯޓު ކަރުދާސް ބާތިލް ވާނެއެވެ. އެ ކައުންސިލަކަށް އެ އިދާރީ ދާއިރާއަކުން ނުވަތަ އެ ރަށަކުން ނުވަތަ އަވަށަކުން އިންތިޚާބުކުރަންޖެހޭ އަދަދަށް ވުރެ ގިނަ ކެންޑިޑޭޓުންގެ ނަމާ ދިމާގައި ރަނގަޅު ފާހަގަ ޖަހާފައިވާނަމަވެސް މުޅި ވޯޓު ކަރުދާސް ބާތިލްވާނެއެވެ.
އިންތިޚާބުކުރަންޖެހޭ މެންބަރުންގެ އަދަދަށް ނުވަތަ އެއަށްވުރެ މަދުން އެ މީހަކަށް ފެންނަ ކެންޑިޑޭޓުންގެ ނަމާ ދިމާގައި ރަނގަޅު ފާހަގަ ޖަހާފައިވާ ވޯޓު އެއީ ޞައްޙަ ވޯޓެވެ. ފާހަގަޖެހުމަށް ޚާއްޞަކޮށްފައިވާ ގޮޅީގައި ނޫން ނަމަވެސް އެ ކައުންސިލަކަށް އިންތިޚާބުކުރަންޖެހޭ މެންބަރުންގެ އަދަދަށް ނުވަތަ އެއަށްވުރެ މަދު ކެންޑިޑޭޓުގެ ނަމާ ދިމާގައި ނުވަތަ ނިޝާނުގައި ރަނގަޅު ފާހަގަ ޖަހައިފައިވާ ވޯޓުވެސް ޞައްޙަ ވޯޓުގެ ގޮތުގައި ބަލާނެ ކަމަށް ޤާނޫނުގައިވެއެވެ.
ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބު އޮންނާނީ، އަންނަ އެޕްރީލް މަހުގެ 10 ގައެވެ.
