އިންތިޚާބަށް އޮފިޝަލުން ތަމްރީންކުރުމުގެ މަސައްކަތް ރާއްޖޭގެ ހުރިހާ ހިސާބެއްގައި ފަށައިފި
14 މާރިޗު 2021 | އާދީއްތަ 09:56ތަމްރީން ޕްރޮގްރާމް ކުރިއަށްދަނީ އެޗްޕީއޭގެ ގައިޑްލައިނާ އެއްގޮތަށް
އިލެކްޝަން އޮފިޝަލުން ތަމްރީންކުރުން
ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބަށް ބޭނުންވާ އޮފިޝަލުން ތަމްރީންކުރުމުގެ މަސައްކަތް ރާއްޖޭގެ ހުރިހާ ހިސާބެއްގައި، އިލެކްޝަންސް ކޮމިޝަނުން ފަށައިފިއެވެ.
އެޗްޕީއޭގެ ގައިޑްލައިނާ އެއްގޮތަށް އިންތިޚާބު ކުރިއަށްގެންދަންޖެހޭތީ އަށްހާހަށްވުރެ ގިނަ އޮފިޝަލުން މިފަހަރުގެ އިންތިޚާބުގައި ހަރަކާތްތެރިވާނެއެވެ. އިލެކްޝަންސް ކޮމިޝަނުން ވިދާޅުވީ، ކުރިއަށް އޮތް އިންތިޚާބުގައި އަތޮޅުތަކުގެ ވޯޓްލާ މަރުކަޒުތަކުގައި ހަރަކާތްތެރިވާ އޮފިޝަލުންގެ %80 މީހުން ހަމަވެފައިވާކަމަށެވެ. އަދި މާލޭގައި ޤާއިމުކުރާ ވޯޓްލާ މަރުކަޒުތަކަށް ބޭނުންވާ އޮފިޝަލުންގެ %60 ހަމަވެފައިވާކަމަށްވެސް އެކޮމިޝަނުން ވަނީ ބުނެފައެވެ.
މާލެއިން އަތޮޅުތެރެއަށް މީހުން ފޮނުވައިގެން އޮފިޝަލުން ތަމްރީންކުރުމުގެ ޕްރޮގްރާމް ކުރިއަށްގެންދަނީ، މިފަދަ ތަމްރީންތައް ހިންގުމަށް އެޗްޕީއޭއިން އެކުލަވާލާފައިވާ ގައިޑްލައިނާ އެއްގޮތަށްކަމަށް އިލެކްޝަން ކޮމިޝަނުންވަނީ ބުނެފައެވެ.
އަދި މިހާރު މޮނީޓަރިންއަށް ލާފައިވާ ރަށްތަކުގައި އޮފިޝަލުން ތަމްރީންކުރަން ފަށާނީ އެރަށެއްގައި މޮނީޓަރިންގެ ހާލަތު އުވާލުމުންނެވެ.
ވޯޓުލާ މަރުކަޒުތަކުގައި ހަރަކާތްތެރިވާނެ އޮފިޝަލުން ހޯދަން މި މަހު ކުރީކޮޅު އީސީން ކުރި އިއުލާނުގައި އެ ކޮމިޝަނުން ވަނީ، އެ ކޮމިޝަނަށް ބޭނުންވާ އަދަދަށް މަސައްކަތަށް އެކަށޭނަ މީހުން ނުލިބޭނަމަ، އޮފިޝަލުން ހަމަވަންދެން ފޯމް ބަލައިގަންނާނެ ކަމަށް ބުނެފައެވެ.
އެޗްޕީއޭގެ ގައިޑްލައިނާ އެއްގޮތަށް އިންތިޚާބު ބާއްވާއިރު، ބަހައްޓާނެ ވޯޓް ފޮށީގެ ޢަދަދު ވެސް ވަނީ އިތުރުވެފައެވެ. އެގޮތުން ކުރިން އިންތިޚާބުގައި ބަހައްޓަން ނިންމީ 532 ވޯޓް ފޮށްޓެވެ. ނަމަވެސް މިހާރު އެ ޢަދަދު ވަނީ 735 އަށް އިތުރުވެފައެވެ
ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބު ބޭއްވުމަށް ހަމަޖެހިފައިވަނީ އެޕްރީލް 10 ގައެވެ.
