އޮކްޓޫބަރު 15 ވަނަ ދުވަހު ގެސްޓްހައުސްތައް ހުޅުވާލާއި ލޮކަލް ޓޫރިޒަމް އަލުން ފަށައިގަތުމަށް 9 ކައުންސިލަކުން ތައްޔާރު ކަމަށް ޓޫރިޒަމް މިނިސްޓްރީ އިން ހާމަކޮށްފިއެވެ.

ހެލްތު އެމަޖެންސީ އޮޕަރޭޝަން ސެންޓަރ (އެޗްއީއޯސީ) އިން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޓޫރިޒަމް މިނިސްޓްރީގެ ސީނިއާ އެގްޒެކުއިޓިވް ޑިރެކްޓަރ އަލީ ރައްޒާން ވިދާޅުވީ ގެސްޓްހައުސް ވިޔަފާރި އަލުން ފަށައިގަތުމަށް ފުރިހަމަ ކުރަންޖެހޭ ޕްރޮސީޖަރތައް މި ސިނާއަތުގައި ހަރަކާތްތެރިވާ ފަރާތްތައް ދަނީ ކުރަމުން ކަމަށެވެ.

އެގޮތުން، މިހާތަނަށް 35 ގެސްޓްހައުސް އެއް ހުޅުވުމުގެ ހުއްދަ ޓޫރިޒަމް މިނިސްޓްރީ އިން ދީފައިވާ ކަމަށް ރައްޒާން ފާހަގަކުރެއްވިއެވެ. ރައްޒާން ވިދާޅުވީ ގެސްޓްހައުސްތައް ހުޅުވުމުގެ ހުއްދަ ދޭއިރު، އެންމެ ފުރަތަމަ އެ މިނިސްޓްރީން ބަލާ އެއް ކަމަކީ އާންްމުކޮށްފައިވާ ގައިޑްލައިންގައިވާ ގޮތަށް ރަށު ލެވަލްގައި ވާންޖެހޭ ތައްޔާރީތައް ވެފައިވޭތޯ ކަމަށެވެ.

އެގޮތުން އެއީ ކަރަންޓީން އަދި އައިސޮލޭޝަން އެރޭޖްމެންޓާއި ރަށުގައި ސިއްހީ ގޮތުން ފުރިހަމަ ކުރަންޖެހޭ ކަންކަން ފުރިހަމަކޮށް، މިކަންތައްތައް ފުރިހަމަކަމަށް އެރަށެއްގެ ރަށު ކައުންސިލުން މިނިސްޓްރީއަށް އެކަންތައް ކަށަވަރުކޮށްދީ ފަތުރުވެރިންނަށް ރަށް ހުޅުވާލުމުގެ އިއުތިރާޒެއް ނެތްކަމަށް ކައުންސިލުން މިނިސްޓްރީއަށް ދޭން ޖެހޭ ކަމަށް ރައްޒާން ފާހަގަކުރެއްވިއެވެ. އަދި، ހުއްދަ ދިނުމުގެ ކުރިން، ރަށުގެ ވަކިވަކި ގެސްޓްހައުސްތަކުން މިނިސްޓްރީގެ ގައިޑްލައިނާ އެއްގޮތަށް ތައްޔާރުކޮށްފައިވާ އެސްއޯޕީ ވެސް ބަލައި ފާސްކުރާނެ ކަމަށް ރައްޒާން ވިދާޅުވިއެވެ.

ރައްޒާން ވަނީ، ގެސްޓްހައުސްތައް ހުޅުވާލުމުގެ ކުރިން މިނިސްޓްރީގެ ގައިޑްލައިންގައިވާ ކަންތައްތަކަށް މީހުން އަހުލުވެރުކުރުމުގެ ގޮތުން މިނިސްޓްރީ އިން ރަށު ކައުންސިލްތަކާއި ގުޅިގެން އެ ރަށްރަށުގައި ހަރަކާތްތެރިވާ ގެސްޓްހައުސްތަކުން ރައްޔިތުންގެ ހޭލުންތެރިކަން އިތުރުކުރުމަށް ޕްރޮގްރާމްތައް ބާއްވާފައިވާނެ ކަމަށް ވިދާޅުވެފައެވެ.

ޓޫރިޒަމް މިނިސްޓްރީން ވަނީ ރާއްޖޭގެ 104 ރިސޯޓަކާއި ތިން ހޮޓެލްގެ އިތުރުން 116 ސަފާރީއަށް ވެސް ފަތުރުވެރިންނަށް ހިދުމަތް ދިނުމުގެ ހުއްދަ ދީފައެވެ.