ރާއްޖެގައި ކޮރަޕްޝަން އިންތިހާއަށް އެބައޮތް ކަމަށާއި ނަޒާހަތްތެރިކަމުގެ މިންގަނޑުން ރާއްޖެއޮތީ ފެއިލްވެފަ ކަމަށް ޓްރާންސްޕޭރަންސީ މޯލްޑިވްސްއިން ބުނެފި އެވެ.
ޓްރާންޕޭރަންސީން މޯލްޑިވްސް އިން އެގޮތަށް ބުނީ ޓްރާންސްޕޭރަންސީ އިންޓަރނޭޝަނަލްއިން މިދިއަ ހަފްތާގައި ނެރުނު ކޮރަޕްޝަން އިންޑެކްސް ރިޕޯޓާ ހަވާލާދީ އެވެ.
ބުދަ ދުވަހުގެ ރޭ ރާއްޖެޓީވީ "ފަލަ ސުރުހީ" ޕްރޮގްރާމްގައި ޓްރާންސްޕޭރަންސީ މޯލްޑިވްސްގެ ސީނިއަރ ޕްރޮޖެކްޓް ކޯޑިނޭޓަރ އާހިދު ރަޝީދު ވިދާޅުވީ ޓްރާންޕޭރަންސީ އިންޓަރނޭޝަނަލުން 2016 ވަނަ އަހަރު އެކުލަވާލި ކޮރަޕްޝަން އިންޑެކްސްގައި ރާއްޖެ އޮތީ 176 ގައުމުގެ ތެރެއިން 95 ވަނަ އަށް ކަމަށާއި ރާއްޖެ 95 ވަނަގައި އޮތީ ކޮރަޕްޝަނާއި ނަޒާހަތްތެރި ކަމުގެ މިންގަޑުން 36 އިންސައްތަ މާކްސާއެކު ފެއިލް ވުމުގެ ސަބަބުން ކަމަށެވެ.
އާހިދު ވިދާޅުވީ އެ ރިޕޯޓަކީ ޓްރާންސްޕޭރަންސީ އިންޓަރނޭޝަނަލްއިން 1995 އިން ފެށިގެން ކޮންމެ އަހަރު ނެރެމުންދާ އިންޑެކްސްއެއް ކަމަށެވެ. މި އިންޑެކްސްގަ ދުނިޔޭގެ ގައުމުތަގެ ތެރެއިން އެންމެ ގިނައިން ކޮރަޕްޝަންގެ އަމަލުތައް ގިނައީ އަދި މަދީ ކޮން ގައުމެއްގަ ކަން އެނގިގެންދާނެ އެވެ. އަދި ބޮޑެތި ޖަމްއިއްޔާ ޖަމާއަތްތަކުންނާއި ބޮޑެތި ވިޔަފާރި ކުންފުނި ތަކުންނާއި އިންވެސްޓަރުންނަށް އެ މައުލޫމާތަކީ ވަރަށް މުހިއްމު މައުލޫމާތު ތަކެއް ކަމަށް ވެސް އާހިދު ވިދާޅުވި އެވެ.
އާހިދު ވިދާޅުވީ އެ އިންޑެކްސްގެ އެންމެ މުހިއްމު ކަމަކީ އަދި އެ އިންޑެކްސްއިން ރަނގަޅު ވަނަ އެއްގައި އޮތް ގައުމެއް ކަމަށްވާނަމަ ނުވަތަ ކޮރަޕްޝަންގެ އަމަލުތައް މަދު ގައުމެއްނަމަ އިންވެސްޓަރުން އެގައުމެއްގައި އިންވެސްޓް ކުރުމުގެ ފުރުސަތު ވަރަށް ބޮޑުވެގެންދާނެ ކަމަށެވެ. ހަމައެގޮތަށް ގައުމެއްގަ ކޮރަޕްޝަން އިތުރުވެގެންދާނަމަ އެ ގައުމެއްގައި އިންވެސްޓަރުން އިންވެސްޓް ކުރަން ޖެހިލުންވާނެ ކަމަށްވެސް އާހިދު ވިދާޅުވި އެވެ.
އާހިދު ވިދާޅުވީ ފާއިތުވެ ދިޔަ ހަތަރު އަހަރު ރާއްޖެ އެލިސްޓްގައި ނުހިމެނި އޮތީ ކޮންމެހެން ރާއްޖޭގައި ކޮރަޕްޝަން ނެތިގެން ނުވަތަ ގިނަ ވެގެން ނޫން ކަމަށާއި ކޮރަޕްޝަން އިންޑެކްސް އެކުލަވާލަނީ ޓްރާންސްޕޭރަންސީ އިންޓަރނޭޝަނަލުން ގަބޫލު ކުރާ ބައިނަލްއަގްވާމީ 12 ޖަމްއިއްޔާއަކުން އެކި ގައުމުތަކުގެ ކުރެވޭ ދިރާސާތަކުގެ މައްޗަށް ކަމަށެވެ. އެގޮތުން އެ 12 ޖަމްއިއްޔާއިން ކޮންމެ އަހަރެއްގައި ވެސް އެކި ގައުމުތަކުގައި ސާރވޭތަކާއި ދިރާސާތައް ކުރާނެ ކަމަށެވެ. އެގޮތުން އެ 12 ޖަމްއިއްޔާއިން ކުރާ 13 ދިރާސާއެއްގެ މައްޗަށް ބަލާފަ އޭގެ އެވްރެޖް އިންޑެކްސްއެއް ޓްރާންޕޭރަންސީ އިންޓަނޭޝަނަލުން އެކުލަވާލާ ކަމަށެވެ. އަދި ޓްރާންސްޕޭރަންސީ އިންޓަރނޭޝަނަލުން ކޮރަޕްޝަން އިންޑެކްސްގަ ގައުމުތައް ހިމެނުމަށް ގެންގުޅޭ މިންގަނޑަކީ އެތަނުން މަދުވެގެން ތިން ދިރާސާއެއް ކުރެވުނީމަ އެ ގައުމެއް ކޮރަޕްޝަން އިންޑެކްސްގަ ހިމެނުން ކަމަށެވެ. އެގޮތުން 2012 އިން 2015 އަށް ރާއްޖޭގައި ހެދިފައިއޮތީ އެތަނު ދެ ދިރާސާ ކަމަށާއި އެހެންކަމުން އެ ހަތަރު އަހަރު ރާއްޖެ ކޮރަޕްޝަން އިންޑެކްސްގަ ނުހިމެނޭ ކަމަށް އާހިދު ވިދާޅުވި އެވެ.
މިދިއަ 2016 ވަނަ އަހަރު ރާއްޖޭގައި ކޮންފައިވާ ތިން ދިރާސާއަކީ ވޯލްޑް ބޭންކުގެ ދިރާސާއަކާއި ގްލޯބަލް އިންސައިޓް އަދި ވެރައިޓީސް އޮފް ޑިމޮކްރެސީއިން ހަދާފައިވާ ތިން ދިރާސާގެ މައްޗަށް ކަމަށެވެ. އާހިދު ވިދާޅުވީ އެތިން ދިރާސާގައި މައިގަނޑު ގޮތެއްގައި ބަލާލާފައިވަނީ ކޮރަމްޝަންގެ އަމަލުތައް އޮތް މިންވަރާއި ކޮރަޕްޝަންގެ އަމަލުތައް ހިންގުމަށް ފުރުސަތު އޮތް މިންވަރުގެ މައްޗަށެވެ.
އެގޮތުން ދިރާސާ ކުރާއިރު އެގައުމެއްގައި މިނިވަން މުއައްސަސާތަކުގެ މިނިވަންކަމާއި ނޫސްވެރިކަމުގެ މިނިވަންކަމާއި މަދަނީ މަޖްއިއްޔާތަކަށް މިނިވަންކަމާއެކު މަސައްކަތް ކުރުމުގެ ފުރުސަތު އޮތް މިންވަރުގެ މައްޗަށާއި އަދުލްއިންސާފުގެ ދާއިރާގެ މައްޗަށް ވެސް ބަލާނެ ކަމަށް އާހިދު ވިދާޅުވި އެވެ.
